Skul Bilong Helpim Yumi Long Mekim Nambawan Bikpela Wok

¹ Ol manmeri i go long skul bilong kisim save long ol samting bilong helpim ol long winim ol mak ol i putim. Tasol i no gat wanpela mak bilong winim i bikpela moa long wok bilong givim biknem long Man bilong givim laip na helpim ol narapela long save long em na long ol samting em bai kamapim. Wok bilong Skul Tiokratik Bilong Autim Tok em bilong helpim yumi long skulim ol narapela long bilip bilong yumi. Olsem na taim yumi go long dispela skul long olgeta wik, yumi kisim ol save i helpim yumi long insait long wok i winim ol narapela.

² “Sediul Bilong Skul Tiokratik Bilong Autim Tok Bilong 2003” i stap long Wok Kingdom bilong las mun. Sediul i stori long olsem wanem ol bai lukautim skul. I gutpela long putim sediul bilong yu insait long buk Kisim Helpim Long Skul Tiokratik Bilong Autim Tok, em yu mas bringim i kam long Skul Tiokratik Bilong Autim Tok long olgeta wik. Skelim sampela wok bilong Skul Tiokratik Bilong 2003.

³ Pasin Bilong Toktok: Stat long Janueri, olgeta miting bilong skul bai kirap long wanpela tok i gat 5 minit, tok hia bai stori long wanpela pasin bilong toktok o long samting bilong rit, stadi, o skulim narapela. Wasman skul bai mekim dispela tok, o em bai makim narapela elda long mekim. Brata inap stori long insait bilong wanpela pasin bilong toktok na bilong wanem em i bikpela samting. Na bihain em i ken kamapim sampela stori bilong Baibel na em i ken soim olsem wanem man i ken kamapim dispela pasin, na bikpela samting em i laik helpim odiens long save olsem wanem dispela pasin inap mekim wok autim tok bilong yumi i kamap gutpela moa.

⁴ Tok Namba 1: Ol brata ol i makim bilong givim instraksen-tok i mas “kirapim ol man long tingim olsem wanem dispela tok i gutpela helpim.” Dispela i makim olsem brata bai soim kongrigesen olsem wanem ol i ken mekim wok long dispela tok. Sapos yu kisim dispela asainmen, lukim pes 48-49 bilong buk Skul Bilong Autim Tok bilong kisim save long olsem wanem yu ken redim tok, na tu, skelim gut ol tok indeks i makim aninit long het-tok “Kamapim olsem tok inap helpim man.”

⁵ Sediul Bilong Ritim Baibel: Sapos bipo yu hatwok long inapim Baibel ritim bilong wik, i gutpela long strong long bihainim gut sediul bilong dispela yia. Husat ol man i mekim olsem bai inapim Ol Skripsa Grik taim pinis bilong yia i kamap. Pes 10 paragraf 5 bilong buk Skul Bilong Autim Tok i kamapim as na i gutpela long kirap ritim Baibel long Ol Skripsa Grik pastaim.

⁶ Ol Bikpela Tok Yumi Ritim Long Baibel: Mipela skruim dispela tok i go inap 10 minit na bai odiens i ken kamapim sampela tingting bilong ol long Baibel ritim bilong wik. Brata i mekim dispela tok i mas bihainim stret taim. Tok hia bai kamap long olgeta wik, na long wik bilong riviu tu. Taim yu ritim ol sapta sediul i makim, traim tingim ol tok em bai i gutpela long helpim yu long taim bilong famili-stadi, o long wok autim tok, o long i stap bilong yu. Wanem sampela pasin bilong Jehova i kamap ples klia long ol samting em i mekim long ol manmeri na ol bikpela lain? Yu lainim wanem samting na i strongim bilip bilong yu na helpim yu long amamas moa long Jehova? Yu ken kamapim ol bikpela tok bilong ol sapta bilong dispela asainmen yu laikim, yu ken kamapim tu sampela tok long ol ves brata bai ritim long Tok Namba 2, long wanem, brata i ritim ol ves bai i no stori long ol.

⁷ Tok Namba 2: Namba wan asainmen bilong ol sumatin long olgeta wik em bilong rit. Ol tok bilong ritim bai kam long hap bilong Baibel ritim bilong wik, tasol long laspela hap bilong mun nogat. Long laspela hap bilong mun brata bai ritim hap bilong Wastaua. Sumatin i mas ritim tasol hap ol i makim, no gat kirap bilong tok o pinis bilong tok. Long dispela rot em i ken tingim tasol pasin bilong em long rit.—1 Ti. 4:13.

⁸ Tok Namba 3 na 4: Sampela tok bai i gat bikpela hap ol i kisim long buk Toktok Gut bilong stori long en, na sampela tok bai i gat liklik hap tasol, na long sampela narapela tok ol i makim tim tasol. Husat i kisim ol asainmen i no gat planti tok ol i makim bilong kamapim o ol i kisim tim tasol, ol i ken skelim ol buk na nius bilong yumi bilong kisim sampela tok. Ating dispela bai mekim na i isi moa long ol sista i mekim ol tok i stret long helpim bilong ol.

⁹ Kain Kain Pasin Bilong Mekim Tok: Olsem pes 45 bilong buk Skul Bilong Autim Tok i kamapim, wasman skul inap makim wanpela pasin bilong mekim tok. Sapos em i no makim, orait sista inap yusim lista long pes 82 na makim. Sapos sista i mekim tok bilong skul wanpela taim long olgeta tupela tupela mun, orait dispela 30 narapela narapela pasin bilong mekim tok i stap long lista bai inap long faipela yia. Ol sista i makim namba 30, em “Mekim long narapela pasin i stret long hap yu sindaun long en,” ol i ken raitim ol bai mekim olsem wanem long hap daunbilo o baksait long pepa bilong ol long skul (S-89-MP). Wasman skul bai raitim det sumatin i mekim tok long pes 82 bilong buk bilong sumatin, det bai stap long spes arere long dispela pasin bilong mekim tok sista i yusim. Brata i ken putim det long taim em i makim tok kaunsel fom.

¹⁰ Tok Kaunsel Fom: Tok kaunsel fom i stap insait long buk bilong yu. Em i stap long pes 79-81. Olsem na yu mas givim buk bilong yu long wasman skul bihain long olgeta tok yu givim. Wasman skul i mas holim wanpela notbuk na bai em i ken save wanem ol tok kaunsel ol sumatin bai wok long en.

¹¹ Riviu: Wasman skul bai mekim riviu bilong Skul Tiokratik Bilong Autim Tok olsem hap i gat ol askim na bekim. Riviu bai kamap long olgeta tupela tupela mun, na em bai kisim inap 30 minit. Ol askim brata bai kamapim long riviu bai stap yet long Wok Kingdom. Sapos wik sediul i makim bilong mekim riviu i wankain long wik bilong kibung sekit o wik bilong wasman sekit, orait mekim ol tok sediul i makim bilong wik antap, na mekim riviu long wik bihain.

¹² Ol Nambatu Klas: Long ol kongrigesen em namba bilong ol lain i insait long skul i winim 50, ol elda inap kamapim ol nambatu klas. “Ating long nambatu klas ol i ken mekim olgeta tok bilong sumatin o tupela laspela tok tasol.” (buk Skul Bilong Autim Tok, pes 285) Dispela em bilong helpim ol kongrigesen i gat planti sista, tasol ol i no gat planti brata bilong mekim ol tok bilong rit. Ol elda i mas makim ol brata i gat save bilong lukautim ol dispela klas.

¹³ Ol Nambatu Brata Bilong Givim Tok Kaunsel: Olsem sediul bilong Skul Tiokratik Bilong Autim Tok i makim, ol elda bai makim nambatu brata bilong givim tok kaunsel bihain long miting, em bai givim dispela tok kaunsel long ol elda na kongrigesen sevent i mekim ol bikpela tok yumi ritim long Baibel na ol instraksen-tok. Brata bilong mekim dispela wok i mas i gat save, i mas wanpela brata em ol narapela elda bai rispek long tok kaunsel bilong em. Tok kaunsel bilong em i mas strongim brata, em bai tok amamas long gutpela pasin bilong toktok brata i kamapim na wok tisa brata i mekim, na wanpela o tupela samting brata i ken wok long mekim i kamap gutpela moa. Sapos em wanpela brata i mekim ol tok planti taim, i no gat wok long givim tok kaunsel long em bihain long olgeta tok em i mekim. Tasol brata bilong givim tok kaunsel i mas bihainim gutpela tingting na save olsem ol brata i save mekim ol pablik-tok samting, ol tu inap kisim helpim bilong mekim gutpela wok moa.—1 Ti. 4:15.

¹⁴ Tok Bilong Putim Yau Long En: Wanem samting inap helpim brata i givim kaunsel long skelim gut tok bilong narapela? Long planti sapta bilong buk Skul Bilong Autim Tok, em namba i stap long en, namba 3 blok i stori long ol samting i gutpela long tingim. Wasman skul i ken tingim tu ol narapela tok bilong buk i gutpela long helpim em long skelim kwik olsem wanem brata i kamapim gut ol bikpela tok na olsem wanem tok i gutpela long helpim ol narapela. Olsem: Lukim ol askim long antap bilong pes 55 na long ol tok long laspela paragraf bilong pes 163.

¹⁵ Hap Bilong Raitim Ol Tok: Buk Skul Bilong Autim Tok i gat bikpela hap arere long ol pes na ol narapela spes ol i wokim bilong yu ken raitim ol tok long taim yu mekim stadi bilong yu yet na long taim yu stap long miting bilong Skul Tiokratik Bilong Autim Tok. (Lukim pes 77, 92, 165, 243, 246, na 250.) Long olgeta wik yu mas karim buk i kam wantaim yu. Long namba wan tok bilong skul opim buk na bihainim tok brata i kamapim. Larim buk i op i stap inap long skul i pinis. Tingim ol tok em wasman skul i mekim. Tingim gut ol samting bilong skulim narapela, ol askim, ol stori, kain kain pasin bilong kamapim sampela tok, ol tok piksa, ol samting brata i soim odiens, na tok bilong skelim olsem wanem tupela samting i narapela kain em ol brata bilong mekim tok i yusim. Sapos yu raitim gut ol bikpela tok, bai yu inap tingim gen na mekim wok long ol dispela tok yu bin kisim long skul.

¹⁶ Jisas Krais i save olsem wok bilong autim tok long gutnius bilong Kingdom bilong God em i nambawan gutpela wok man i ken kisim. Em i nambawan bikpela wok God i givim long em. (Mk. 1:38) Em i tok: “Mi mas autim gutnius bilong kingdom bilong God long ol arapela taun tu. God i salim mi na mi kam bilong mekim dispela wok.” (Lu. 4:43) Yumi bin tok yes long bihainim em, olsem na yumi bisi tru long wok bilong autim gutnius, na oltaim yumi laik kamap gutpela moa long wok bilong “givim biknem long God.” (Hi. 13:15) Bilong mekim olsem, yumi laik wok strong long insait long Skul Tiokratik Bilong Autim Tok oltaim, em skul i helpim yumi long mekim wok i winim ol narapela wok.