Olsem Wanem Skul Tiokratik Bilong Autim Tok i Save Helpim Yumi
1 Ol lain bilong Jehova tasol i gat wanpela gutpela rot tru bilong kisim skul i kam long Jehova. (Ais. 54:13; Jo. 6:45) Tasol dispela skul inap helpim yumi sapos yumi yet i wok strong long kisim dispela skul. Olsem wanem? Yu inap luksave long ol gutpela samting em Skul Tiokratik Bilong Autim Tok i mekim long yu long ol samting bilong spirit?
2 Ol Gutpela Tok i Kamap: Planti wasman skul i bin luksave olsem taim kongrigesen i skul gut long pasin bilong toktok, dispela i bin helpim olgeta insait long kongrigesen long mekim gut wok bilong ol long autim tok. Na tu, wanpela wasman skul i luksave olsem long dispela hap we odiens i kamapim tingting bilong ol long Baibel ritim bilong wik, dispela i kirapim planti moa long bihainim sediul bilong Baibel ritim. Long Tok Namba 2, planti brata i tok gutpela samting i kamap nau taim ol i no gat wok long kamapim ol kirap na pinis bilong tok, na dispela i givim ol sampela haptaim moa bilong redim gut ol tok ol bai ritim. Ol brata ol i makim bilong mekim Tok Namba 2 ol i wok strong long mekim pasin bilong ol long rit i kamap gutpela moa.—1 Ti. 4:13.
3 Olgeta i Kisim Helpim: Pasin bilong bekim tok long ol miting em samting bilong amamas. (Snd. 15:23) Yumi save kisim ol askim bilong riviu paslain long taim bilong riviu na dispela i helpim yumi long redim na insait long en taim riviu i kamap. Na tu, kirap long Wastaua bilong Janueri 1, 2004, ol i putim sampela bikpela tok bilong ol buk bilong Baibel na dispela i go stret wantaim ol hap bilong Baibel em sediul i makim bilong ritim long olgeta wik long Skul Tiokratik Bilong Autim Tok. Ol dispela tok long Wastaua i bin helpim planti long kamapim ol gutpela tok long hap bilong Bikpela Tok Bilong Baibel.
4 Olgeta i insait long skul i gat gutpela wok tru long redim na mekim ol tok long skul. Yumi olgeta inap kisim helpim long ol tok bilong wasman skul taim em i givim tok bilong helpim yumi. Olgeta wan wan sumatin bai kisim sampela helpim moa long tok kaunsel wasman skul i givim ol bihain long miting. Olgeta eksasais i stori long pasin bilong toktok i stap long pinis bilong olgeta wan wan sapta bilong buk Skul Bilong Autim Tok i givim sampela helpim moa long yumi.
5 Taim yumi harim sampela gutpela tingting na gutpela tok bilong Baibel long taim bilong skul na bihain long en, orait raitim ol dispela tok long buk Skul Bilong Autim Tok. Tingim tingim ol tok yu bin lainim, na skelim olsem wanem dispela skul i kam long God i helpim yu long kamap strong long ol samting bilong spirit.