Ol Wasman i Go Pas Long Wok—Wasman Bilong Skul Bilong Wok Autim Tok
1 Wasman bilong Skul Bilong Wok Autim Tok em i wanpela wasman i stap strong long ol samting bilong spirit na em i save wok strong long givim tok na skulim ol manmeri na i stret yumi mas daun long em na wok gut wantaim em. (1 Ti 5:17) Wanem ol wok bilong em?
2 Em i save lukautim laibreri bilong Skul Bilong Wok Autim Tok long Haus Kingdom. Em i gat bikpela laik long kirapim olgeta long insait long skul, sapos ol i inapim pinis ol mak. Em i save stretim gut lista long fail i gat nem bilong ol lain i mekim tok bambai em i ken makim ol long mekim tok na givim pepa inap 3-pela wik paslain long taim bilong mekim tok. Em i gat wok long save gut long olgeta sumatin insait long kongrigesen na save bilong ol wan wan. Sampela taim em i makim narapela brata long helpim em long wokim sedyul bilong skul, tasol em yet i bosim wok bilong makim wanem wanem tok na husat i mas mekim dispela tok.
3 Bilong helpim em long skulim gut ol sumatin, long olgeta wan wan wik wasman i mas redi gut na stadi gut long ol tok bilong skul. Long dispela rot, em inap kirapim kongrigesen long pilim tru ol tok bilong skul, na em inap skelim ol sumatin i kamapim gut olgeta tok o nogat, na em i save kamapim ol bikpela tok bai kamap long rivyu bilong raitim.
4 Bihain long tok bilong ol sumatin, wasman bai tok amamas long sumatin na kamapim klia, bilong wanem pasin bilong em long mekim tok i gutpela o i gat wanem as na em i mas wok strong moa long stretim dispela. Sapos wanpela sumatin i laik bai wanpela i helpim em long redim tok bilong em, orait wasman o narapela em wasman i makim, em i ken helpim dispela sumatin.
5 Wasman bilong Skul na ol narapela brata em wasman i makim bilong helpim ol sumatin, ol i save mekim bikpela wok. Olsem na sapos yumi laik bai ol i helpim yumi, yumi mas kam long ol miting bilong Skul long olgeta taim. Na tu, yumi mas mekim ol tok bilong yumi long skul, na bihainim ol tok wasman bilong Skul i givim bilong stretim yumi, na ol tok em i givim long ol narapela sumatin tu. Long dispela rot, bai yumi wok yet long kamap gutpela moa long wok bilong autim tok bilong Kingdom long ol haus bilong ol man.—Ap 20:20; 1 Ti 4:13, 15.