Wanpela Gutpela Skul i Stap Long Olgeta Hap
DISPELA skul i no bilong gavman na em i no gat bikpela pe, na em i no wanpela yunivesiti i gat nem na sampela man tasol inap i go long en, nogat. Ol sumatin i no save baim dispela skul. Ating klostu long hap bilong yu i gat dispela skul. Nem bilong en: Skul Bilong Wok Autim Tok, na em i save kamap long ol haus lotu bilong ol Witnes Bilong Jehova. Inap olsem 5 milion manmeri long olgeta hap bilong graun i insait long dispela skul.
Ating yu laik save: ‘Ol man i mas mekim wanem bilong insait long dispela skul? Skul i lainim ol long wanem samting? Ol i wokim long wanem pasin? Skul i helpim ol man olsem wanem?’
Ol Lo
Olgeta man inap go long Skul Bilong Wok Autim Tok, tasol ol man i insait long en i mas wanbel long ol tok bilong nambawan buk bilong dispela skul, em Baibel. Ol i mas bihainim pasin i stret long ol lo bilong Baibel. Olsem na ol sumatin bilong dispela skul i no ken mekim pasin pamuk, stil, dring, smok, kaikai buai, na ol kain pasin olsem.—1 Korin 6:9-11.
Planti skul long nau i no gat lo olsem skulmanki i mas pasim klos bilong skul olsem yunifom, tasol ol sumatin i insait long Skul Bilong Wok Autim Tok, ol i mas pasim klos i stret na i klin. (1 Timoti 2:9, 10) Skul i no kolim hamas krismas sumatin i mas kisim na em i ken insait long dispela skul. Sampela pikinini i gat 4-pela o 5-pela krismas na ol inap rit, ol i insait long dispela skul na planti taim ol i kamapim wanpela tok o kaunim Baibel samting, olsem sampela man na meri i winim 90 krismas samting ol i save mekim.
Pasin Bilong Skul na Samting Ol i Skul Long En
Long planti ples ol i save wokim Skul Bilong Wok Autim Tok namel long wik long apinun. Dispela i opim rot na planti man inap insait long skul. Longpela bilong en i olsem 45 minit. Bihain long wasman bilong skul i mekim liklik tok amamas bilong kirapim skul, namba wan man bilong givim tok bai kamapim tok bilong em insait long 10 i go 15 minit long wanpela buk bilong skul. Bihain, inap 3 i go 5 minit em bai kamapim ol askim bambai ol man i stap long skul i ken kolim gen sampela tok em i bin stori long en.
Bihain, wanpela man i save gut long wok tisa, em bai kamapim ol bikpela tok bilong hap bilong Baibel sedyul bilong skul i bin makim bilong ol sumatin i ken kaunim long dispela wik. Sampela taim em 2-pela, 3-pela o 4-pela sapta bilong Baibel. Ol i makim 6-pela minit bilong em i ken kamapim tok bilong em. Ol sumatin i save bihainim sedyul bilong skul long kaunim Baibel long haus, ol bai kaunim Baibel olgeta insait long wanpela hap taim.
Bihain, 3-pela sumatin bai kamapim tok bilong ol. Wan wan tok i olsem 5-pela 5-pela minit. Wanpela sumatin bai kaunim wanpela hap bilong Baibel sedyul i makim bilong kaunim long haus. Narapela tupela sumatin bai kamapim tok ol i bin kisim long sampela buk bilong skul. Skul i save strongim olgeta sumatin long lukim ol dispela buk na pepa bilong skul long haus paslain long ol i kam long skul. Bihain long wan wan sumatin i kamapim tok bilong em, wasman bilong skul bai mekim liklik tok amamas long sumatin, na sampela taim em bai givim liklik tok bilong helpim sumatin long stretim pasin bilong em long kamapim tok.
Ol tok wasman bilong skul i mekim bilong helpim sumatin, em i save kisim long Buk Bilong Skul Bilong Wok Autim Tok, em wanpela buk ol sumatin i insait long skul i mas kaunim gut. Bilong stretim wanpela samting i ken helpim tok bilong em long bihain, ating wasman bilong skul bai askim sumatin long lukim wanpela sapta long buk bilong skul, olsem: “Lukluk Long Ol Man; Mekim Wok Long Autlain,” o “Ol Gutpela Tok Piksa,” o “Kolim Gen Tok; Wokim Han,” o “Kolim Strong Ol Bikpela Tok; Senisim Pasin Bilong Toktok.”
Long sampela kantri, insait long Skul Bilong Wok Autim Tok i gat narapela skul—skul bilong helpim ol man long rit rait. Long ol dispela klas, planti tausen man i bin lain long ritim buk o long stretim pasin bilong ol long rit. Olsem: Long Meksiko namel long 1946 na 1994, winim 127,000 man i bin lain long rit.
Helpim Planti Milion
Long olgeta hap Skul Bilong Wok Autim Tok i save helpim wok bilong papamama bambai ol pikinini i ken kisim gutpela skul. Moriah i gat 16 krismas na em i tok: “Mi bin lain long stadi gut bilong painim ol tok bilong helpim mi long redim tok bilong mi, na taim mi redim pinis, mi traim traim planti taim. Olsem na nau ol wok tisa i givim mi long haiskul, i no hatwok long mi.”
Matthew i gat 15 krismas na em i bin insait long Skul Bilong Wok Autim Tok taim em i gat 7-pela krismas. Em i tok: “Taim mi tingim skul bilong ol wanlain bilong mi, skul bilong mi i save winim bilong ol. Mi lain pinis long stadi na long putim gut yau na long kamapim gut ol tok.” Brata bilong Matthew, em Phil, em i gat 17 krismas, na em i tok: “Skul Bilong Wok Autim Tok i bin strongim bel bilong mi. Mi save, sapos mi kisim wanpela wok, mi inap mekim.”
Skul Bilong Wok Autim Tok i bin skulim ol man na meri tu. Skul i bin helpim gut Michael long inapim sampela mak, olsem na em i no pret long sanap long ai bilong ol bikman bilong kampani samting na mekim wanpela tok. Michael i tok: “Taim mi nupela insait long skul, mi man bilong pret na sem—nau nogat. Skul i bin helpim mi long lusim pasin bilong sem, na givim save long mi, na helpim mi long toktok gut, na strongim bel bilong mi—em ol samting mi mas kisim bilong winim pasin bilong sem.” Wanpela papa i tok: “Mi ting ol samting mi bin lus long en taim mi yangpela, nau mi kisim pinis.”
Long wanpela liklik ples long Latin-Amerika sampela man bilong Dipatmen Bilong Edukesen, ol i kam bilong harim Skul Bilong Wok Autim Tok. Bihain long ol i harim tok wanpela man bilong ples i mekim, wanpela bilong ol dispela man bilong edukesen, na em i wanpela het-tisa, em i tok: “Olsem wanem dispela man, em longtaim pinis mipela i save em i no inap rit rait, na em i no save long tok Spen, tasol em inap mekim tok long dispela tok ples [em i no mekim long tok ples bilong em yet], na em i sanap na mekim long ai bilong ol man? Tasol nau em i mekim olsem.”
Tru tumas, long olgeta hap Skul Bilong Wok Autim Tok em i wanpela nambawan skul! Em inap helpim ol yangpela na ol lapun long kisim gutpela skul. Olsem wanpela yangpela i tok: “Sapos wanpela i tingting long insait long skul, i gutpela em i mekim nau.”
[Piksa long pes 13]
Skul Bilong Wok Autim Tok i save helpim planti milion man long kisim gutpela skul