Wok Bilong Yu Insait Long Skul Bilong Wok Autim Tok
1 Skul Bilong Wok Autim Tok i bin skulim planti milion Witnes Bilong Jehova long mekim wok olsem wokman bilong gutnius. Yumi planti i tingim namba wan taim yumi bin go insait long dispela Skul; yumi pret na pilim olsem yumi no inap, tasol nau yumi pilim tru wok bilong dispela Skul long lainim yumi long mekim gut tok na long kamap gutpela tisa bilong Tok Bilong God. (Skelim wantaim Aposel 4:13.) Olsem wanem? Yu insait long dispela gutpela Skul?
2 Husat inap go insait? Pes 73 bilong buk Lo i tok: “Olgeta manmeri i save go long ol miting bilong kongrigesen, na ol nupela manmeri tu, sapos ol i bihainim ol lo bilong Kristen, ol i ken i go insait long dispela Skul.” Ol kain lo olsem i stap long pes 98-99. Mipela i singautim olgeta manmeri i winim mak—ol man, ol meri, na ol pikinini—long go lukim wasman bilong Skul na tokim em yu laik insait long Skul.
3 Program Bilong Skul Bilong 1997: Program bilong Skul Bilong Wok Autim Tok bilong 1997 i kamapim planti kain kain tok bilong Baibel. Bai yumi lain gut long pasin bilong toktok na skulim gut man, na tu, ol gutpela tok bilong Baibel em program i kamapim long olgeta wik, em bai lainim yumi long planti samting. (Snd 9:9) Sapos yumi lukim ol tok em bai kamap long Skul, na kaunim ol sapta bilong Baibel em sedyul i makim, na oltaim yumi go long dispela miting, long dispela rot bai program bilong Skul i helpim tru yumi long ol samting bilong spirit.
4 Long 1997, klostu olgeta kaunim bilong Baibel bilong Tok Namba 2 ol i sotpela—ol i no longpela olsem bilong ol yia i go pinis. Taim sumatin i redim dispela tok, em i mas skelim gut ol minit bilong en, na nau em i mas tingim hamas hap taim bilong dispela faipela minit em i ken lusim bilong mekim kirap bilong tok na pinis bilong en. Long dispela rot bai sumatin inap mekim gutpela wok long dispela faipela minit, na lain tu long kisim pasin bilong kaunim gut tok na mekim ol tok long toktok bilong em yet.—1 Ti 4:13.
5 Sista i mekim Tok Namba 3 na em i kisim ol tok long buk Save, em i ken mekim olsem wanpela gobek o Baibel-stadi, o em i ken mekim olsem em i autim tok long kain kain taim na ples. Tasol bikpela samting, em i mas mekim gutpela wok tisa—em i mekim tok olsem gobek o stadi samting, em i no bikpela samting.
6 Olsem na maski yu mekim Tok Namba Wan, o kamapim ol bikpela tok bilong hap bilong Baibel em sedyul i makim, o yu mekim Tok Namba 2 o 3 o 4, yu ken soim olsem yu pilim tru wok bilong dispela Skul, olsem: Redim gut ol tok na traim pastaim, givim bel tru na amamas long mekim, no ken kalapim ol minit bilong en, putim gut yau long ol tok wasman bilong Skul i givim long yu bilong helpim yu na wok long bihainim, na olgeta taim wok long mekim ol tok em wasman i makim bilong yu. Long dispela rot, wok bilong yu insait long Skul bai helpim yu yet na olgeta narapela i harim tok bilong yu.