Tok Bilong God Inap Helpim Yumi
1 “Olsem wanem? I stap bilong yumi long nau i olsem God i laikim? Tru, ol manmeri i stap long olgeta hap bilong graun. Tasol yu ting ol i stap wanbel na amamas? Ol i stap gutpela olsem Man bilong wokim ol i laik bai ol i stap? Nogat, a? Ol i bruk bruk. Pasin birua i stap. Pasin nogut i stap. I gat pait. Planti planti manmeri ol i hangre na ol i gat sik. Planti ol i gat hevi long painim haus na wok na mani bilong baim kaikai samting. Dispela i no litimapim nem bilong God a? Olsem na yumi ken save, i stap bilong yumi i no wankain olsem God i laikim.”
2 Em tok bilong wanpela paragraf long namba wan sapta bilong buk Yu Inap i Stap Oltaim Long Paradais Long Graun. Ol dispela tok i makim tru taim bilong yumi long nau, winim long taim ol i wokim dispela buk—em 14 yia i go pinis. Ol man i mas save olsem Tok Bilong God inap stiaim ol na i kamapim ol tok bilong helpim ol long stretim ol hevi i painim ol. Long mun Disemba bai yumi wok strong long helpim ol man taim yumi tilim buk Stap Oltaim long K2.00. Tru, taim yumi tilim wanpela buk long man, dispela tasol i no inap helpim em long bihainim tok bilong God. Yumi mas mekim ol gobek na tingting long kirapim Baibel-stadi wantaim em. Sapos yumi mekim olsem, bai i gat helpim bilong yumi. (Mt 28:19, 20) Em hia sampela tok yumi ken mekim:
3 Sapos yu bungim man i lapun liklik, yu ken traim long mekim tok olsem: “Mi gat wanpela askim: Taim yu yangpela yet, ol manmeri i bin mekim wanem kain pasin long ol narapela? [Larim man i bekim tok.] Sindaun bilong ol man i senis tru long nau, a? Yu ting wanem samting i as bilong dispela senis? [Larim man i bekim tok.] Samting yumi lukim long nau i truim wanpela tok profet bilong Baibel. [Kaunim 2 Timoti 3:1-5.] Baibel i kolim stret ol samting i kamap long nau, na Baibel i tok promis tu long nupela taim klostu bai kamap. Long dispela as, mipela i kirapim olgeta man long kaunim Baibel.” Soim em buk Stap Oltaim long sapta 18 em i kamapim sampela narapela tok profet bilong las de em yumi lukim ol truim bilong en. Tilim buk long K2.00 na stori olsem buk inap helpim man long save gut long ol samting em i kaunim long Baibel. Stretim rot bilong i go bek lukim em na bai yutupela i ken stori moa long dispela samting.
4 Taim yu go bek bilong lukim lapun yu bin tilim buk long em, yu ken tok olsem:
◼ “Taim mitupela i bin toktok long pastaim, mitupela i tok olsem, long planti samting pasin bilong ol man long nau i go nogut tru winim pasin nogut bilong ol man long sampela yia i go pinis. Tasol mi laik soim yu olsem, Baibel i tok yumi inap wetim ol gutpela samting tru i kamap bihain. [Kaunim Kamapim Tok Hait 21:3, 4.] Yumi save olsem dispela em i tok bilong God, na dispela i mas kirapim yumi long kisim save long ol narapela samting Baibel i toktok long en.” Opim buk Stap Oltaim long sapta 19 na stori long ol gutpela blesing olsem ol piksa i kamapim. Tokim em, yu laik mekim Baibel-stadi wantaim em, i no gat pe.
5 Sapos yu toktok wantaim wanpela yangpela, yu ken tok olsem:
◼ “Mi gat wanpela askim: Yu wanpela yangpela, olsem na yu save pilim olsem i gat as na yu ken ting ol gutpela samting bai painim yu long bihain? Yu ting wanem samting bai kamap long bihain? [Larim em i bekim tok.] Tasol gutpela tru, i gat as na yumi ken ting ol gutpela samting bai kamap long bihain. [Kaunim Song 37:10, 11.] Ol man i gat kain kain tingting long dispela samting, olsem na mipela i bin wokim dispela buk Yu Inap i Stap Oltaim Long Paradais Long Graun. Lukim ol samting buk i kamapim i olsem as na yumi mas kaunim na stadi long Baibel. [Kaunim paragraf 18-19 long pes 15.] Taim yumi save ol tok bilong Baibel i tru, yumi inap bilip tru long ol gutpela samting bai kamap long bihain. Sapos yu laik kaunim dispela buk, mi bai amamas long tilim wanpela long yu long K2.00 tasol.”
6 Taim yu go bek bilong lukim yangpela i bin kisim buk “Stap Oltaim,” yu ken kirapim tok olsem:
◼ “Mi bin amamas long harim yu tok olsem yu tingim ol samting bai kamap long bihain. Ating yu inap tingim dispela tok promis long Baibel mi bin soim long yu, em i stori long gutpela samting bai painim yumi long bihain. Nau mi laik soim narapela tok promis long yu. [Kaunim Kamapim Tok Hait 21:3, 4.] Dispela buk mi bin lusim wantaim yu i kamapim klia olsem, Baibel em i tok bilong God, na i no bilong ol man. Dispela samting i mas kirapim yumi long mekim wanpela samting. Dispela samting em i olsem: [Kaunim paragraf 6 long pes 48.] Sapos yu laik, mi bai amamas long mekim Baibel-stadi wantaim yu, i no gat pe.” Sapos em i laik stadi, askim em, em i gat Baibel bilong em yet o nogat. Sapos em i no gat, tokim em yu laik kisim wanpela bilong em i kam.
7 Man i no save wanem samting bai helpim em long karim ol hevi, ating em bai harim tok sapos yu mekim tok olsem:
◼ “Long taim bilong yumi, klostu olgeta man i karim ol bikpela hevi. Planti man i save go lukim ol kain kain man bilong givim tingting long ol. Sampela i save lukim ol glasman samting bilong helpim ol. Yu ting yumi inap painim we ol gutpela tok em inap tru long helpim yumi? [Larim man i bekim tok.] Baibel i kamapim wanpela bikpela samting yumi olgeta i mas save long en.” Kaunim Jeremaia 10:23. Opim buk Stap Oltaim long pes 102 na kaunim paragraf 9-10. “Dispela buk bai helpim yu long save, olsem wanem olgeta hevi bilong yumi bai pinis aninit long Kingdom bilong God. Yu laik kaunim?” Tilim buk long K2.00 na stretim rot bilong i go bek lukim em.
8 Sapos long namba wan taim yupela i bin stori olsem God i mas helpim yumi, taim yu go bek, yu ken toktok moa long dispela samting olsem:
◼ “Taim mi bungim yu long namba wan taim, yumi bin tok olsem, bilong karim ol hevi bilong nau, yumi mas larim God i helpim yumi. Ating bai yu amamas long save long laik bilong God long ol famili, na wanem samting bai helpim yumi long i stap amamas insait long famili, olsem buk mi bin lusim wantaim yu i stori long en. [Kaunim paragraf 1-3 long pes 238 bilong buk Stap Oltaim.] Mi amamas long mekim Baibel-stadi wantaim yu, i no gat pe, na nau mi laik soim yu long pasin bilong mekim olsem.”
9 Jehova bai blesim wok bilong yumi taim yumi helpim ol yangpela na ol lapun long pilim tru ol tok bilong Baibel na olsem wanem em inap helpim yumi long i stap bilong yumi.—Sng 119:105.