Save i Kam Long God i Bekim Planti Askim
1 Paslain long yu kisim stretpela save long tok i tru, ating yu gat planti askim long i stap bilong yumi em yu no inap bekim. Taim yu kisim save long ol bekim bilong dispela askim long Baibel, yu bin amamas tru, a? Nau yu inap helpim ol narapela long painim ol bekim bilong ol dispela wankain askim. (Skelim wantaim 2 Timoti 2:2.) Yu inap toktok wantaim ol narapela long save bilong God em inap bringim man long laip oltaim. (Jo 17:3) Tasol olsem wanem yu ken helpim man long pilim tru olsem dispela save inap helpim em? Orait, tingim ol askim bilong yu em tok i tru i bin kamapim bekim bilong en. Ol man i wok long painim tok i tru, ol i gat laik long kisim save long wanem samting? Taim yumi tingim ol dispela samting, dispela bai helpim yumi long tilim buk Save i Bringim Man Long Laip Oltaim. Ol dispela tok inap helpim yu taim yu redi long autim tok long Jun.
2 Planti man i laik save bilong wanem pen na hevi i pulap long graun, olsem na taim yu mekim dispela tok ating ol bai amamas long harim tok:
◼ “Taim bikpela win o guria i bagarapim ol samting, o taim pasin raskol na pasin bilong bagarapim man i go bikpela, planti taim ol man i laik save bilong wanem ol kain samting nogut olsem i kamap. Bai yu bekim dispela askim olsem wanem?” Larim man i bekim tok na tok tenkyu long bekim bilong em. Nau opim buk Save long sapta 8, na stori long ol tok i stap long paragraf 2. Tokim em olsem dispela buk i kamapim ol tok Baibel i mekim long bilong wanem ol pasin nogut i wok long kamap, na yu ken tok: “Sapos yu laik kisim dispela buk, mi bai amamas long lusim wantaim yu long K1.50 tasol.”
3 Taim yu go bek bilong lukim man i kisim buk “Save,” yu ken tok olsem:
◼ “Mi laik save long tingting yu bin kisim long i gat wanem as na planti pen na hevi i stap long graun. Yu wanbel long tok Baibel i mekim bilong bekim dispela askim olsem i stap long dispela buk?” Larim man i bekim tok. Kaunim paragraf 17 long pes 77 bilong buk Save, na tokim em yu laik kaunim Rom 9:14 long Baibel bilong em yet. Nau yu ken tok: “Dispela gutnius em olsem, God i no save mekim pasin i no stret na kamapim pen na hevi i save bagarapim yumi. Em i bin tok promis long givim yumi laip oltaim na yumi ken i stap bel isi na amamas. Nem bilong namba wan sapta bilong dispela buk em ‘Yu Inap i Stap Amamas Long Bihain!’ Mi laik stori long yu long olsem wanem yu na ol famili bilong yu inap kisim ol dispela samting.” Opim buk long sapta 1 na soim em long pasin bilong yumi long mekim stadi. Stadi i go long dispela sapta, inap long yu skelim olsem em inap long man long dispela taim.
4 Yu ken mekim wok long kirap bilong tok i stap long pes 12 long buk “Toktok Gut,” aninit long het-tok “Lapun/Dai”:
◼ “Olsem wanem? Yu laik save, ‘Yumi bilong i stap nau tasol na i dai na em tasol? O i gat narapela samting i kamap taim yumi dai?’ [Larim man i bekim tok.] Baibel i tokim yumi long ol samting i save painim yumi taim yumi dai. [Kaunim Saveman 9:5, 10.] Na Baibel i tok, ol man i bilip ol i ken wetim gutpela samting i kamap. [Opim buk Save long paragraf 13, pes 84; kaunim na stori long tok bilong Jisas long Jon 11:25.] Dispela sapta olgeta i kamapim ol tok bilong bekim dispela askim, Wanem samting i painim ol famili bilong yumi i dai pinis? Sapos yu laik kaunim dispela buk, mi ken lusim wantaim yu long K1.50 tasol.”
5 Taim yu mekim gobek, yu ken kolim gen nem bilong yu na bihain yu ken tok:
◼ “Bipo yumi bin toktok long ol samting i save painim man taim em i dai. Planti man i bilip olsem taim man i dai em i go long heven o em i go long hel. Tasol olsem wanem, yu ting i gat rot na ol inap i stap laip gen hia long graun? [Larim man i bekim tok.] Baibel i tok, ol manmeri i kirap bek pinis ol bai insait long dispela lain i gat pasin daun em ol bai stap laip long dispela graun. [Kaunim Song 37:11, 29, na stori long paragraf 20 long pes 88 bilong buk Save.] Dispela gutpela samting bilong wetim em i bin strongim bel bilong planti milion manmeri em bipo ol i save pret long i dai. Dispela buk bai helpim yu long save gut long dispela samting. Inap mi soim yu olsem wanem dispela buk inap helpim yu?”
6 Sapos yu laik mekim tok i no hatwok, yu ken traim dispela tok:
◼ “Mi laik soim yu wanpela piksa long dispela buk Save i Bringim Man Long Laip Oltaim. Em wanpela naispela piksa tru, a?” Opim buk bambai man i ken lukim pes 4-5. Larim man i bekim tok. Nau kaunim tok long pes 5. Bilong pinisim tok yu ken tok olsem: “Yu ken kisim dispela buk bilong yu ken kaunim, pe bilong en em K1.50 tasol.” Sapos em i bin amamas long harim tok, askim em, wanem taim i stret long yu ken go bek na lukim em.
7 Yumi kisim pinis dispela save i kam long God em inap bekim ol bikpela askim long i stap bilong yumi ol man. Givim bel long redi gut, na Jehova bai blesim ol wok yu mekim bilong givim dispela save bilong givim laip long ol man i wok long painim tok i tru.