Save i Bringim Man Long Laip
1 Jisas i beten long Papa, “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru.” (Jo 17:3) Em i gutpela pe tru, a? Long rot bilong buk Save i Bringim Man Long Laip Oltaim, yumi inap helpim man long kisim save long ol samting em i mas mekim bilong kisim laip oltaim. Yumi ken tok wanem bilong kirapim tingting bilong man na bai em i gat laik long kisim buk Save na kaunim ol tok bilong en?
2 Planti man i laik toktok long beten, olsem na yu ken askim olsem:
◼ “Planti hevi i save painim yumi olgeta long nau, olsem na yu ting beten inap helpim yumi? [Larim man i bekim tok.] Planti man i pilim olsem ol i bin kam klostu long God long rot bilong beten, na olsem Baibel i tok promis, dispela i bin givim strong long ol. [Opim pes 156 bilong buk Save, na kaunim Filipai 4:6, 7.] Tasol maski man i beten, ating sampela taim em i pilim olsem God i no harim beten bilong em. Dispela sapta i stori long ‘Rot Bilong Go Klostu Long God.’ [Tilim buk long K1.50.] Dispela sapta i stori tu long olsem wanem yumi ken harim tok bilong God—yumi yet i toktok long God, na em tu i toktok long yumi. Yumi ken stori long dispela samting taim mi kam bek lukim yu.”
3 Sapos yu laik kirapim stadi taim yu autim tok long man long namba wan taim, yu ken tok:
◼ “Mi kam tokim yu long wanpela rot yu ken stadi long Baibel, no gat pe. Olsem wanem? Bipo yu bin stadi long Baibel? [Larim man i bekim tok.] Mi laik soim yu wanpela buk em mipela save mekim wok long en bilong helpim ol man long stadi.” Soim buk Save long man bilong haus, na opim long pes 3 i gat lista bilong ol tok i stap insait, na nau yu ken kamapim askim: “I gat sampela tok hia yu laik save Baibel i tok wanem long en?” Opim long sapta em i gat laik long save long en, na kaunim ol het-tok. Tokim em yu laik soim em pasin bilong yumi long kisim save long ol dispela tok long rot bilong stadi. Maski yu kirapim stadi o nogat, tilim buk long K1.50 na stretim rot bilong go bek lukim em.
4 Long nau planti man i laik kisim stretpela save long trupela God. (Ais 2:2-4) Em wok bilong yumi long helpim planti man long kisim save long Jehova, em save i bringim man long laip oltaim.—1 Ti 2:4.