Redi Gut Pastaim—Em Rot Bilong Mekim Gut Wok
1 Sapos yu redi gut paslain long yu go autim tok, dispela bai helpim yu long daunim pret. Taim yu go klostu long haus, bai yu save pinis long wanem tok yu laik autim. Bai yu no pret taim man i no wanbel long ol bilip bilong yumi. Taim yu pinis long autim tok na yu go bek long haus, bai yu pilim olsem yu gat strong, long wanem, yu save yu bin wok strong long mekim wok autim tok. Tru tumas, pasin bilong redi gut pastaim em i rot bilong mekim gut wok bilong autim tok na lainim ol man.
2 Pol i tok yumi mas redi gut pastaim—yumi mas “redi long autim gutnius . . . , na putim dispela pasin olsem su” bilong yumi. (Ef 6:15) Bilong mekim olsem, yumi mas redim tingting na bel bilong yumi, na bilip olsem sampela man bai harim, na amamas long mekim dispela wok. Sapos yumi redi gut long autim tok i tru wantaim ol narapela, wok yumi mekim bai kamapim gutpela kaikai bilong Kingdom, na yumi amamas.—Ap 20:35.
3 Ol Samting Yumi Ken Mekim Bilong Redi Long Autim Tok: Gutpela sapos yumi redim wanpela tok yumi bai amamas long mekim; ating yumi ken kisim long buk Toktok Gut o long laspela pes bilong Wok Kingdom. Tingim gut wanem skripsa yu laik kamapim, na wanem tok yu bai kolim bilong kamapim ol bikpela tok. No ken holim long tingting olgeta wan wan tok yu laik mekim; mobeta yu tingim wanem tok yu laik kamapim na kolim long toktok bilong yu yet, na kamapim long wanpela pasin yu ting man bai amamas long harim.
4 Lukim ol tok bilong buk yu laik tilim, na tingim wanem tok i gutpela bilong kamapim long man. Tingim olsem wanem yu ken senisim tok bilong yu taim yu bungim wanpela man, o wanpela meri, o wanpela lapun, o wanpela yangpela.
5 Olsem wanem? Yu bin traim ol tok yu laik mekim? Toktok wantaim famili bilong yu o sampela narapela pablisa long wanem ol tok bai i gutpela long mekim, na nau yu ken mekim traim wantaim ol na bai yupela olgeta i ken save gut long ol tok bilong mekim. Traim sampela pasin bilong bekim tok long ol man i no laik harim tok bilong yumi. Sapos yu mekim traim olsem, dispela bai helpim yu long pasin bilong toktok gut, na yu bai mekim gut moa wok bilong autim tok, na yu no pret.
6 Yu mas redim gut ol tok yu laik mekim na mekim traim, na tu, yu mas askim yu yet, ‘Klos mi laik pasim i stret long wok autim tok? Ol buk bilong tilim na ol narapela samting mi mas mekim wok long en, ol i stap pinis long paus bilong autim tok? Paus na ol buk i klin? Mi gat buk Toktok Gut, ol liklik nius, notbuk, na pensil?’ Sapos yumi redi gut pastaim, dispela bai helpim yumi long mekim gut wok bilong yumi long autim tok.
7 Taim yumi mekim pinis olgeta samting bilong redi gut, yumi mas beten askim Jehova long salim spirit holi bilong em i kam bilong helpim yumi na bai wok bilong yumi i ken kamap gutpela. (1 Jo 5:14, 15) Sapos yumi redi gut pastaim, bai yumi kisim bikpela amamas long “mekim tru dispela wok” bilong yumi.—2 Ti 4:5.