“Redi Long Mekim Olgeta Kain Gutpela Wok”
1 Taim Jisas i kirapim nupela wok bilong autim tok, em i lusim hap taim bilong redim ol disaipel bilong em. (Mt. 10:5-14) Yumi olgeta i bisi, tasol sapos yumi lusim sampela minit bilong redi paslain long yumi go autim tok long ol haus, dispela bai helpim wok bilong yumi long karim gutpela kaikai.—2 Ko. 9:6.
2 Rot Bilong Redim Ol Tok: Bilong redi gut, pastaim yumi mas save long tok bilong ol buk na nius yumi tingting long tilim. Yumi mas tingting tu long ol manmeri long teritori bilong yumi. Ol i save tingting planti long wanem ol samting? Planti man i gat wanem kain bilip na lotu? Yumi ken lukluk long ol tok i stap long Wok Kingdom Bilong Yumi na buk Toktok Gut Wantaim Ol Man Long Baibel bilong kisim tingting long ol tok yumi ken mekim.
3 Pasin bilong putim gut yau long ol soim i save kamap long Miting Bilong Wok bai helpim yumi tu. Taim yumi lain gut pinis long mekim tok yumi laik autim, bai yumi no gat wok long lusim bikpela hap taim bilong redim ol tok. Tasol sapos long olgeta taim paslain long yumi go autim tok, yumi lusim liklik hap taim bilong tingim ol tok yumi bai mekim na wok long stretim stretim ol tok bilong yumi, orait bai yumi inap mekim gut moa wok autim tok. Na yumi mas sekim tu olsem olgeta buk na nius samting yumi mas i gat ol i stap pinis insait long bek bilong autim tok.
4 Wanem samting bai helpim yumi long tingim ol tok yumi laik autim? Pasin bilong kolim long maus em wanpela rot i helpim yumi long tingim ol tok yumi laik mekim. Sampela i save mekim traim long ol dispela tok long taim bilong famili stadi. Sampela i raitim long liklik pepa ol bikpela tok ol i laik mekim na ol i lukluk long pepa paslain liklik long ol i go long haus.
5 Helpim Yumi: Taim yumi redi gut, dispela i helpim yumi long mekim gut moa wok autim tok na kisim bikpela amamas long en. Em i helpim yumi long stap isi na yumi no pret tumas. Yumi inap tingim gut moa man bilong haus na yumi no tingting tasol long ol tok yumi laik mekim. Na tu, taim yumi save gut long tok bilong ol buk na nius yumi laik tilim, dispela bai helpim yumi long givim bel moa long tilim ol nius.
6 Baibel i strongim yumi long “redi long mekim olgeta kain gutpela wok.” (Ta. 3:1) Wok bilong autim gutnius i nambawan gutpela wok yumi inap mekim. Taim yumi redi gut, yumi soim olsem yumi rispek long man bilong haus i laik harim tok, na yumi rispek long Jehova, em dispela God yumi mekim wok bilong em.—Ais. 43:10.