Olsem Wanem Yumi Ken Yusim Ol Tok Ol i Redim Pinis
1 Ol tok yumi ken mekim bilong tilim ol magasin bilong yumi na ol narapela buk samting i save kamap olgeta taim long Wok Kingdom. Taim yumi autim tok, yumi no gat wok long kolim olgeta wan wan tok olsem i stap long Wok Kingdom. Ol dispela tok i bilong givim yumi tingting long wanem tok yumi ken mekim. Yumi inap autim gut tok sapos yumi mekim ol tok bilong tilim ol magasin na buk samting long toktok bilong yumi yet. Taim yumi mekim tok long toktok bilong yumi yet, dispela bai mekim na man bilong haus i no pret na tu dispela i kamapim klia olsem yumi bilipim tru tok yumi autim.—2 Ko. 2:17; 1 Te. 1:5.
2 Senisim Tok Bilong Yu: Ol pasin long hap yumi stap long en i stiaim pasin bilong yumi long autim tok. Olsem wanem? Yu inap long tok gude long man bilong haus na kirapim tok bilong yu o ol man long hap bilong yu i laik bai yu mas tokaut stret long wanem samting yu laik toktok long en? Pasin bilong ol wan wan hap na ol wan wan man i no wankain. Yumi mas bihainim gutpela tingting tu taim yumi laik givim askim. Sampela askim i stret long sampela hap tasol long narapela hap ol dispela askim inap mekim ol man bilong haus i sem. Olsem na yumi mas bihainim gutpela tingting na senisim tok bilong yumi na bai i stret long hap bilong yumi.
3 Na tu, yumi mas tingim sindaun na tingting bilong ol man long teritori bilong yumi taim yumi redim ol tok bilong autim tok. Olsem: Ating taim yu toktok wantaim wanpela strongpela Katolik long Matyu 6:9, 10, tok yu mekim long em bai i narapela kain long tok yu bai mekim long wanpela man i no save long beten ol i kolim “Papa Bilong Mipela.” Sapos yumi redi gut pastaim, yumi inap mekim ol tok em ol man yumi bungim ol bai i gat laik long harim.—1 Ko. 9:20-23.
4 Maski yumi laik mekim wok long olgeta wan wan tok olsem i stap long Wok Kingdom o sampela tok tasol, yumi mas redim gut ol tok yumi laik mekim. Yumi mas ritim gut ol stori o sapta insait long buk o nius em yumi laik tilim na painim ol tok bai kirapim laik bilong man long harim tok. Orait mekim wok long ol dispela tok insait long toktok bilong yumi. Long rot bilong save gut long ol tok i stap insait long ol buk na nius bilong yumi, yumi inap long givim bel long tilim.
5 Ol Narapela Pasin Bilong Autim Tok: Olsem wanem? Yumi mas mekim wok tasol long ol tok ol i redim pinis bilong tilim ol nius samting? Nogat. Sapos yu laik mekim wok long narapela pasin bilong tilim ol magasin o yu laik yusim narapela skripsa, orait yu ken mekim olsem. Yu ken mekim olsem moa yet long ol magasin, painim rot bilong toktok wantaim ol man long ol narapela stori i stap insait long ol magasin em ol stori ol man long hap bilong yu i gat laik long en. Taim yupela i laik mekim soim long pasin bilong tilim ol magasin long Miting Bilong Wok, yupela i ken stretim rot bilong mekim soim long sampela pasin bilong tilim ol magasin i gutpela long hap bilong yupela. Long dispela rot olgeta bai inap long givim bel long autim tok.
[Askim Bilong Stadi]
1. Yumi mas i gat wanem kain tingting long ol tok yumi ken mekim bilong tilim ol magasin samting em ol i redim pinis?
2. Bilong wanem yumi mas tingim pasin bilong ples yumi stap long en taim yumi redim ol tok yumi laik mekim long autim tok?
3. Bilong wanem yumi mas tingim sindaun na tingting bilong ol man yumi toktok wantaim ol?
4. Bilong wanem pasin bilong redi gut i bikpela samting?
5. Bilong wanem yumi mas bihainim ol narapela pasin bilong autim tok? Olsem wanem yumi inap mekim olsem?