Tilim Ol Nius i Save Autim Tok i Tru
1 Nius Wastaua i Tokaut Long Kingdom Bilong Jehova na poroman bilong em, Kirap! i mekim bikpela wok bilong autim tok bilong Kingdom na kamapim ol disaipel. (Mt. 24:14; 28:19, 20) Yumi amamas long tilim dispela tupela nius, taim yumi insait long narapela narapela rot bilong mekim wok bilong Kingdom.
2 Insait long ol yia i go pinis, yumi bin lukim olsem sais na sampela stori bilong ol dispela nius i bin senis, na pasin bilong tilim ol tu i senis. Ol i bin mekim ol dispela senis na bai ol man i laikim moa yet ol nius bilong yumi na ol nius bai helpim ol gut, na long dispela rot tok bilong Kingdom i ken go daun long bel bilong “olgeta manmeri, bai ol i ken save long as bilong tok tru.”—1 Ti. 2:4.
3 Kirap long Janueri 2006, yumi bin lain long mekim narapela narapela tok bilong tilim wanpela Awake! i save kamap long olgeta wan wan mun. Nau bai yumi mekim wankain pasin bilong tilim wanpela Wastaua i Tokaut Long Kingdom Bilong Jehova long olgeta wan wan mun. Na tu, yumi ken tilim Kirap! i save kamap long olgeta 3-pela 3-pela mun. Ol tok yumi ken mekim bilong tilim ol dispela nius i stap long laspela pes bilong Wok Kingdom Bilong Yumi. Ol dispela tok i save kamapim sampela tok bilong namba 1 o namba 2 atikol bilong nius, tasol sampela taim ol bai kamapim tok bilong ol narapela atikol em planti man i gat laik long ritim. Yumi inap mekim gutpela wok long ol tok bilong tilim ol nius i stap long Wok Kingdom sapos yumi save gut long ol tok bilong atikol yumi soim long man bilong haus, na yumi mekim dispela tok long toktok bilong yumi yet na bai tok i stret long teritori bilong yumi.
4 Wok Kingdom i gat tupela tok yumi ken bihainim bilong tilim ol wan wan nius, tasol yu ken mekim ol narapela tok tu. Ating wanpela as bilong mekim olsem, em planti man long teritori bilong yupela bai i gat laik long ritim narapela atikol i stap long nius. O ating yu pilim olsem yu inap mekim gutpela tok bilong tilim nius taim yu stori long wanpela atikol insait long nius em yu yet i laikim.
5 Rot Bilong Redim Ol Tok: Namba wan samting, yu mas save gut long atikol yu laik stori long en taim yu tilim nius. Ating sampela taim yu no inap save gut long olgeta wan wan atikol i stap long nius paslain long yu kirap tilim dispela nius long wok autim tok. Tasol yu mas soim olsem yu amamas na pilim tru ol tok bilong dispela atikol yu soim long man. Yu inap mekim olsem sapos yu save gut long ol tok bilong atikol.
6 Taim yu redim ol kirap bilong tok, yu mas redi long senisim tok. Bilong kirapim toktok, yu ken kamapim wanpela gutpela askim i kirapim tingting bilong man na i stret long atikol i stap long nius. Oltaim bilip olsem Tok Bilong God i gat strong long kirapim bel bilong man. (Hi. 4:12) Makim wanpela skripsa i stret long tok yu kamapim, em i gutpela sapos dispela skripsa o ol tok bilong en i stap long atikol yu soim long man. Skelim olsem wanem yu ken kamapim tok bilong skripsa i stret wantaim dispela atikol.
7 Taim Rot i Op: Bilong tok bilong tilim ol nius i ken kamapim gutpela kaikai, yu mas mekim wok long en. Wok wantaim kongrigesen bilong tilim ol nius long Sarere. Tilim ol nius long ol manmeri em bipo ol i bin kisim ol buk na nius bilong yumi. Oltaim tilim nius long ol Baibel sumatin bilong yu na long ol narapela man yu inap bungim taim yu mekim gobek. Ating yu inap tilim ol nius long ol man yu toktok wantaim ol taim yu go long maket, taim yu raun long PMV samting, o taim yu sindaun na wet long lukim dokta. Mekim ol tok bilong yu i kamap gutpela moa taim yu wok long tilim ol nius.
8 Nius Wastaua na Kirap! i gutpela tru. Ol i litimapim nem bilong Jehova olsem King bilong heven na graun. (Ap. 4:24) Ol i kamapim gutnius bilong Kingdom Bilong God i mekim gut bel bilong ol man na i strongim ol long bilip long Jisas Krais. (Mt. 24:14; Ap. 10:43) Na tu, ol i stori long ol samting i wok long kamap long graun na i wok long truim ol tok profet bilong Baibel. (Mt. 25:13) Helpim ol man long teritori bilong yupela long kisim helpim long ol dispela nius na redi long tilim ol nius long olgeta taim rot i op long mekim olsem!
9 Taim yu tilim wanpela nius, o yu bin toktok gut wantaim wanpela man long tok bilong Baibel, yu mas redi long givim wanpela askim o tok bilong kirapim tingting bilong man na dispela bai opim rot bilong yu long mekim gobek na yu inap stori moa long tok bilong Baibel. Sapos yumi givim bel long planim ol pikinini kaikai bilong tok i tru, yumi ken bilip tru olsem Jehova bai kirapim ol man husat i gat laik tru long save long Em na mekim wok bilong Em long harim tok.—1 Ko. 3:6.
[Askim Bilong Stadi]
1. Nius Wastaua na Kirap! i mekim wanem wok?
2. Ol i bin mekim wanem ol senis long nius Wastaua na Kirap!, na bilong wanem ol i mekim olsem?
3. Olsem wanem bai yumi tilim ol nius long wok autim tok?
4. Bilong wanem i gutpela long kamapim sampela narapela tok bilong tilim ol nius na yu no bihainim tok i stap long Wok Kingdom?
5. Paslain long yu redim wanpela tok bilong tilim nius, yu mas mekim wanem?
6. Olsem wanem yumi ken redim ol tok yumi laik mekim?
7. Yumi ken mekim wanem bilong mekim ol tok bilong yumi long tilim ol nius i kamap gutpela moa?
8. Olsem wanem nius Wastaua na Kirap! i gutpela tru?
9. Olsem wanem yumi ken redim rot bilong mekim gobek?