Mekim Wok Long Ol Magasin Taim Yu Autim Tok
1 “Ol i gutpela magasin, ol tok bilong ol i stret long nau, ol i strongim bel bilong mi.” “Ol dispela magasin i strongim mi tru, winim ol narapela magasin mi bin ritim.” Ol dispela tok i kamapim klia tingting bilong ol man long olgeta hap taim ol i ritim Wastaua na Kirap! Tru tumas, ol magasin bilong yumi ol i gutpela tul tru bilong helpim “olgeta manmeri” long save long gutnius.—1 Ti. 2:4.
2 Wanpela bisnisman i kisim wanpela Kirap! i stori long samting em i laikim. Bihain em i ritim Wastaua em i bin kisim tu, na insait long dispela magasin i gat wanpela stori i kirapim em long skelim strongpela bilip bilong em long God Triwan. Dispela i kirapim laik bilong em. Sikspela mun bihain em i kisim baptais. Narapela man i save kisim ol magasin tasol em i no save ritim. Meri bilong em i save abrusim ol Witnes tasol em i save ritim ol dispela magasin em man bilong em i save kisim. Em i pilim tru tok promis bilong Baibel long graun bai kamap paradais na ol stretpela man bai stap long en. Bihain dispela meri na pikinini man bilong em na susa bilong em i kamap wokman bilong Jehova.
3 Tilim Tupela Wantaim: Olsem ol ekspiriens i stap antap i kamapim, yumi no inap save husat bai ritim ol magasin bilong yumi o wanem tok i stap insait long ol magasin bai kirapim laik bilong ol long harim tok. (Sav. 11:6) Olsem na i gutpela long tilim Wastaua na Kirap! wantaim maski yumi stori long wanpela tasol. Sampela taim, i gutpela long tilim ol narapela narapela magasin taim yumi autim tok.
4 Em i gutpela long makim wanpela de long olgeta wan wan wik long insait long wok bilong tilim ol magasin. Long 2005 Calendar of Jehovah’s Witnesses, ol i makim olgeta Sarere olsem “De Magasin.” Tasol sindaun bilong yumi olgeta i no wankain, olsem na ating sampela bai makim narapela de bilong tilim ol magasin. Olsem wanem? Yu save makim taim bilong insait long wok bilong tilim ol magasin?
5 Tingim Hamas Yu Laik Tilim Long Olgeta Mun: Taim yumi makim hamas magasin yumi laik tilim insait long wanpela mun, dispela bai helpim yumi long tingting strong long tilim ol magasin. Olsem wanem? Yu gat wanpela magasin-raun? Yu save tilim ol magasin long ol man yu bungim long taim yu autim tok? Yu inap tilim ol magasin long rot, long bisnis teritori, na long ol pablik ples? Yu save kisim ol magasin i go wantaim yu taim yu raun, o taim yu raun long stua, o wet long lukim dokta samting? Mekim gutpela wok long olgeta rot i op bilong yu long helpim ol narapela long kisim helpim long Wastaua na Kirap!
6 Ating yumi ken putim mak tu long tilim ol olpela magasin yumi holim i stap yet. Maski yumi no tilim ol magasin long det stret bilong ol dispela magasin, ol tok i stap insait ol i bikpela samting. Wok long tilim ol long ol man i gat laik long harim tok. Planti milion manmeri i pilim tru olsem, Wastaua na Kirap! ol i “autim klia tru . . . gutpela tingting.” (Snd. 25:11) Yumi mas mekim wok long ol bilong helpim planti milion manmeri long kisim save long Jehova na lotuim em.
[Askim Bilong Stadi]
1, 2. Wastaua na Kirap! i bin mekim wanem long ol man?
3. Wanem gutpela samting i save kamap taim yumi tilim Wastaua na Kirap! wantaim?
4. Olsem wanem yumi ken makim taim bilong insait long wok bilong tilim ol magasin?
5. Wanem ol rot bilong tilim ol magasin em yumi mas tingim? Wanem samting inap helpim yumi long mekim olsem?
6. Olsem wanem yumi ken mekim gutpela wok long ol olpela magasin?