Ol Magasin i Save Tokaut Long Kingdom

¹ Yumi ol Witnes Bilong Jehova, olsem na planti man i save yumi lain bilong givim bel long autim gutnius bilong Kingdom bilong God. Nius Wastaua na Kirap! yumi save tilim, ol i save mekim bikpela wok tru long helpim planti milion manmeri long kisim save long ol samting God i laik mekim. Ol tok i stap long tupela magasin i gutpela tok tru, long wanem, ol dispela tok i tokaut long Kingdom bilong God long heven em tasol i rot bilong pinisim ol hevi bilong ol manmeri.

² Tupela nius i save stori long ol samting tru i wok long kamap long i stap bilong yumi​—⁠ol samting bilong tingting na bel, sindaun bilong ol man, na ol samting bilong spirit. Long olgeta hap, pasin bilong ol man na ol famili i wok long bagarap, olsem na Wastaua na Kirap! i helpim ol man long kisim gutpela sindaun taim ol i helpim ol long bihainim ol tok bilong Baibel. Bai yumi amamas tru long tilim sabskripsen bilong tupela magasin long mun Epril na Me.

 ³ Ol i Laikim Tupela Nius: Em hia sampela as na ol man i laikim nius Wastaua na Kirap!:

◼ Dispela tupela nius i save kamapim tok i tru; ol i save kamapim klia wanem samting i gutpela na wanem samting i nogut.

◼ Ol i helpim ol man long wetim Paradais i gat stretpela pasin long en, em God i tok promis long kamapim taim Kingdom bilong em i bosim dispela graun.

◼ Tupela nius i kamapim kain kain stori i stret long taim bilong yumi. Dispela i mekim na ol man bilong kain kain sindaun na pasin ol i laikim.

◼ Ol stori bilong ol i sotpela, gutpela bilong skulim man, i stret, na ol i no daunim wanpela lain na litimapim narapela lain na i no lusim lo bilong Baibel liklik.

◼ Ol naispela piksa i save pulim hariap tingting bilong ol man na ol i laikim, na i no hatwok long kaunim tok bilong ol.

 ⁴ Yu Gat Sabskripsen Bilong Yu Yet?: Olsem wanem? Yu gat Baibel na buk singsing bilong yu yet? Sapos olsem, orait olsem wanem long sabskripsen? Taim yu save tru olsem ol tok bilong ol magasin bilong yumi ol i gutpela bilong helpim yumi, bai yu gat bikpela laik long kirapim ol narapela long save ol i bikpela samting.

 ⁵ No Ken Pret Long Tilim Sabskripsen: No ken skelim man hariap olsem em bai kisim sabskripsen o nogat, long gutpela pasin yu mas kamapim ol tok bilong tilim sabskripsen na larim em yet i kamapim tingting bilong em. Planti taim i no olsem ol manmeri i no laik kisim sabskripsen, nogat; em tingting bilong yumi, ating yumi mas senisim tingting bilong yumi yet long pasin bilong tilim sabskripsen. Yumi mas larim God i strongim bel bilong yumi na yumi no ken pret long tilim sabskripsen.​—⁠Ap 9:27; 1 Te 2:⁠2.

 ⁶ Mekim Ol Tok i Stret Long Man: Redim wanpela tok i no gat hatwok long en na yu inap senisim taim yu bungim wanpela man, o meri, o lapun, o wanpela yangpela, ating em wanpela man yu save long em o yu no save long em. I gutpela long lukim gen ol tok bilong Wok Kingdom bilong Oktoba 1996, na bihainim ol tok bilong en.

 ⁷ Ol Rot Bilong Tilim Sabskripsen: Yu inap tilim ol sabskripsen long ol dispela rot: long taim bilong autim tok long ol haus, long ol gobek, taim yu autim tok long rot, long ol ples bisnis, long ol man i stap klostu long yu, long ol wanwok o wanskul, ol tisa, long ol man i bin kam long Memorial, long ol man yu save tilim magasin oltaim long ol, na givim olsem presen long ol wanblut.

 ⁸ Sampela Rot Yu Ken Bihainim: Yu ken bihainim sampela bilong ol dispela rot.

◼ Karim ol narapela narapela nius i go wantaim yu, em ol i stori long kain kain samting.

◼ Kisim i go wantaim yu karamap bilong sabskripsen bilong yu yet i gat nem bilong yu i stap long en, na man bai save olsem wanem ol sabskripsen bai kam long posofis.

◼ Bringim wanpela volyum o strongpela karamap bilong ol magasin i go wantaim yu taim yu go lukim wanpela Baibel-stadi o gobek, na tokim ol sapos ol i tromoi K10.00 tasol long wanpela yia ol bai kisim ol dispela save.

 ⁹ Daunim Ol Tingting Kranki: Planti manmeri i save pret long dispela tok “sabskripsen.” Ol i tingim dispela tok i makim olsem ol i “insait” long wanpela lain. Ating ol tok i stap daunbilo inap helpim yu:

◼ “Ol lain bilong wokim dispela nius bai salim ol narapela 24 magasin i kam stret long posofis bilong yu.”

◼ “Bai yu kisim ol magasin inap wanpela yia olgeta. Bihain long wanpela yia ol i no inap salim moa ol magasin, inap long yu yet i wokim gen pepa bilong kisim nupela.”

◼ “Sampela stori i gat ol askim i stap long ol, olsem na insait long wanpela yia yu bai kisim wanpela kos long Baibel.”

 ¹⁰ Pe Bilong Sabskripsen i Stret: Pe bilong olgeta wan wan magasin long sabskripsen bilong wanpela yia em i no bikpela olsem pe bilong wanpela niuspepa. Yu no ken skelim ol man na ting ol i no gat mani bilong kisim sabskripsen. Planti man i save tromoi mani long baim ol samting i no inap helpim ol​—⁠ol i save bagarapim skin bilong ol, olsem smok na buai. Wanpela pablisa i autim tok long wanpela lapun man, na em i pilim olsem lapun i no inap kisim sabskripsen, long wanem, em i pasim rabis klos na haus bilong em tu i nogut. Pablisa i kirap nogut, long wanem, dispela man i kisim sabskripsen! Taim ol man i tok ol i no gat mani bilong kisim sabskripsen taim yu autim tok long ol, tasol ol i laikim, orait raitim pepa bilong sabskripsen na go bek bihain bilong kisim mani.

 ¹¹ Mekim Tru Wok Long Epril na Me: Planti milion manmeri i amamas long kaunim nius Wastaua na Kirap! Ol i mekim gutpela wok tru bilong tokaut long Kingdom, olsem na yumi mas karim sampela wantaim yumi taim yumi raun, na tilim long olgeta taim rot i op. Long mun Epril na Me, yumi laik mekim gutpela wok bilong tilim sabskripsen na tilim planti magasin moa!