Rot Bilong Redim Tok Bilong Tilim Nius
1 Ating yu save ting olsem, ‘Ol tok bilong tilim nius i stap long olgeta Wok Kingdom, olsem na bilong wanem yumi mas redim tok bilong tilim nius?’ Planti bratasista i save mekim wok long ol tok Wok Kingdom i redim pinis, tasol maski i olsem, ol i gat wok yet long redim gut tok. Ol tok i gutpela long wanpela teritori, ating i no gutpela long narapela teritori. Olsem na yumi no ken ting olsem yumi mas bihainim stret olgeta wan wan tok ol i redim pinis. Sapos yumi laik mekim wok long ol tok ol i redim pinis, orait i gutpela yumi mekim long toktok bilong yumi yet.
2 Makim Wanpela Stori: Taim yu ritim pinis wanpela nius, makim wanpela stori yu yet i bin amamas long ritim na yu ting i stret long teritori bilong yu. Sapos yu givim bel tru na amamas long kamapim stori bilong nius long man bilong haus, dispela bai kirapim laik bilong em tu long ritim dispela nius. Tru, ating yu bai makim wanpela stori em planti man long teritori bai laikim, tasol yu mas save gut long ol arapela stori tu long nius. Long dispela rot bai yu inap senisim tok bilong yu taim yu bungim man i amamas moa long narapela stori.
3 Kamapim Wanpela Askim: Orait nau redim gut ol tok yu laik mekim bilong kirapim tok. Kirap bilong tok i bikpela samting. Ating i gutpela sapos yu givim wanpela askim long man bilong haus bilong kirapim tingting bilong em long stori bilong nius yu laik soim em. Ol askim i kirapim man long kamapim tingting bilong em, ol i gutpela askim. No ken kamapim ol askim i mekim man i sem o i kirapim em long tok pait.
4 Ritim Wanpela Skripsa: Orait nau makim wanpela skripsa bilong ritim long man bilong haus sapos rot i op long mekim olsem. Ating yu ken makim wanpela skripsa i stap long stori yu laik soim em. Taim yu ritim wanpela skripsa, dispela bai helpim man bilong haus long save olsem ol tok bilong yumi i kam long Baibel. (1 Te. 2:13) Na maski sapos em i no kisim nius, dispela skripsa bai autim tok long em. Sampela i bin kirapim tingting bilong man bilong haus long rot bilong ritim wanpela skripsa paslain long ol i kamapim askim. Bilong kamapim skripsa, yu ken tok, “Mi laik kisim tingting bilong yu long dispela Baibel ves.” Orait nau, paslain long tilim nius, kamapim wanpela tok long nius i stret long dispela skripsa na mekim sotpela tok long en bilong kirapim tingting bilong man.
5 I no gat ol strongpela lo bilong bosim pasin bilong tilim nius. Tasol i gutpela sapos yu mekim tok i sotpela na i klia. Bihainim pasin bilong mekim tok i gutpela long yu yet na i kirapim man long putim gut yau. Tokim man long olsem wanem ol nius inap helpim em, na givim bel long mekim. Sapos yu redi gut, dispela bai helpim yu long mekim gut wok bilong yu long tilim Wastaua na Kirap! long ol man em ‘bel bilong ol i gutpela tru bilong kisim laip i stap gut oltaim.’—Ap. 13:48.
[Askim Bilong Stadi]
1. Bilong wanem i gutpela sapos yu yet i redim wanpela tok bilong tilim nius na no ken bihainim tasol ol tok ol i redim pinis long Wok Kingdom?
2. Taim yu makim wanpela stori, wanem sampela samting yu mas tingim?
3. Bilong kirapim man long putim gut yau, yu save bihainim wanem kain pasin bilong kirapim tok?
4. Sapos rot i op long ritim wanpela skripsa, wanem gutpela samting inap kamap long dispela?
5. Wanem sampela samting yu mas tingim taim yu redim tok bilong tilim nius?