Yu Save Mekim Gut Wok Bilong Autim Tok?
1 Buk Aposel i tok, ol disaipel bilong Jisas i “strong” long mekim gut wok bilong autim tok long ol man. (Ap. 2:40; 8:25; 28:23) Aposel Pol i laik mekim olsem. (Ap. 20:24) Ating yu tu i laik mekim gut dispela wok olsem wanpela wokman bilong autim gutnius, a? Olsem wanem yu inap mekim?
2 Redim Gut Tok Yu Laik Autim: Bilong yu ken mekim gut wok autim tok, em i bikpela samting long redi gut pastaim. Em i bikpela samting tru long mekim olsem taim yu laik tilim ol nius, long wanem, ol stori bilong ol nius i save senis senis long olgeta taim. Bilong helpim yumi long mekim gut wok, dispela Wok Kingdom i kamapim wanpela nupela hap—em hap i stap long han kais na i kamapim ol tok yumi ken mekim bilong tilim nupela nius Wastaua na Kirap! Mipela bai kamapim sampela tok bilong ol nupela nius em planti man i gat laik long save long en. Yu ken mekim wanem bilong skruim sampela tok moa long ol dispela sotpela tok mipela i kamapim?
3 Makim wanpela tok em yu ting i gutpela long teritori bilong yupela. Ritim gut dispela stori long nius, na tingim ol bikpela tok em ol inap kirapim laik bilong ol man long harim tok. Makim wanpela skripsa em nius i kamapim na i stret wantaim tok yu laik mekim bambai yu ken ritim dispela skripsa long man bilong haus. Bilong pinisim tok mekim sotpela tok i kirapim man long ritim nius, na sapos i stret long mekim, stori liklik long em i ken givim kontribiusen bilong helpim wok bilong ol Witnes Bilong Jehova long olgeta hap. Orait nau mekim traim long dispela tok yu bai mekim.
4 Tingting Long Yusim Baibel: Sapos yu redi gut, planti taim yu inap kamapim wanpela skripsa taim yu toktok wantaim man. Olsem: Long planti hap ol pablisa i gat save long mekim wok autim tok, wok bilong ol i karim gutpela kaikai taim ol i holim Baibel long han na wokabaut i go long haus, givim gude long man bilong haus, na tok:
◼ “Mipela i wok long askim ol man sapos ol i bilip long dispela tok . . . ” Ritim Stat 1:1, na bihain mekim dispela askim: “Yu wanbel wantaim dispela tok?” Sapos man bilong haus i tok yes, orait nau yu ken tok: “Mi tu. Tasol yu ting Man bilong wokim olgeta samting, em i bin kamapim pasin nogut tu?” Taim man i bekim pinis, ritim Saveman 7:29. Nau opim buk Save long pes 71, na ritim paragraf 2. Kirapim man bilong haus long ritim dispela buk. Sapos em i no wanbel wantaim tok i stap long Stat 1:1, orait kirapim em long skelim liklik nius I Gat Wanem As na Yu Inap Bilip Tru Long Baibel?
5 Go Bek Lukim Olgeta Man i Laik Harim: Yu no inap mekim gut wok autim tok sapos yu no go bek lukim ol man i gat laik long harim. Taim yu toktok gut wantaim wanpela man, maski yu tilim ol nius o buk samting o nogat, raitim nem na atres bilong dispela man long notbuk samting. Wok strong long kirapim laik bilong man long kisim sampela save moa na hariap go lukim em gen. Na kirapim em long stadi long Baibel.
6 Long taim bilong ol aposel, ol disaipel i save Jisas i bin tokim ol long ‘autim tok na tokaut klia’ long ol samting. (Ap. 10:42) Yumi tu i mas bihainim dispela wankain tok, long wanem, long dispela rot tasol yumi inap kamapim ol disaipel. (Mt. 28:19, 20) Olsem na gutpela sapos yumi wok strong long mekim gut wok bilong autim tok.—2 Ti. 4:5.