Sapos Em i Kamapim Gutpela Samting—Mekim Wok Long En!
1 Long olgeta taim Wok Kingdom i save kamapim ol kain kain rot bilong toktok wantaim ol man long en taim yumi autim tok. Dispela i save givim yumi ol nupela tingting long olsem wanem yumi ken kirapim ol man long harim tok bilong Kingdom. Ating long olgeta wan wan mun yu lainim wanpela o tupela bilong ol dispela pasin bilong toktok wantaim ol man. Tasol taim sampela pablisa i mekim wok long wanpela bilong ol dispela pasin bilong toktok inap sampela taim pinis, narapela Wok Kingdom i kamapim ol nupela pasin bilong toktok. Yumi save, i no olgeta pablisa inap lainim nupela pasin bilong toktok sapos ol i no save gut yet long olpela tok.
2 I gat planti tausen painia na ol narapela pablisa ol i save lusim bikpela hap taim bilong autim tok. Na tu, planti kongrigesen i save pinisim teritori olgeta insait long sampela wik tasol. Long ol kain taim olsem, ol pablisa i save amamas long lainim ol nupela pasin bilong toktok wantaim ol man bilong kamapim tok bilong Kingdom. Dispela i helpim ol long kamap gutpela moa long mekim wok. Dispela i mekim na wok autim tok bilong ol i kamapim gutpela kaikai na ol inap amamas long en, na inap helpim ol long winim ol hevi.
3 Tasol sapos yu bin redim wanpela pasin bilong toktok em i save kirapim ol man long harim tok, i gutpela yu mekim wok yet long en! I no olsem yu mas lusim wanpela gutpela pasin bilong toktok wantaim ol man sapos em i wok long kamapim ol gutpela samting. Yu ken senisim tok liklik bambai i stret long ol nius o buk samting bilong tilim long dispela mun. Taim yu skelim ol tok bilong Wok Kingdom, traim long painim ol gutpela tok yu inap mekim wok long en taim yu toktok wantaim ol man.
4 Olsem na taim yu kisim nupela Wok Kingdom, ol tok i stori long pasin bilong toktok wantaim ol man, em bilong givim sampela tingting long yumi. Sapos yu inap mekim wok long en, em i gutpela! Tasol sapos yu bin painim pinis wanpela gutpela pasin bilong toktok wantaim ol man na em i kamapim ol gutpela samting long teritori, orait mekim wok long en! Bikpela samting em i olsem: Long gutpela pasin “yu mas mekim tru dispela wok,” na helpim ol man i gat gutpela bel na helpim ol long kamap disaipel.—2 Ti 4:5.