Mi Mas Wok Long Senisim?

Ol Wok Kingdom Bilong Yumi i save kamapim ol narapela narapela tok bilong Baibel em yumi ken mekim wok long en long taim yumi autim tok. Planti pablisa i save wok strong long autim tok ol i laik tru long kisim sampela nupela tingting na mekim wok long ol narapela narapela tok. Orait, Wok Kingdom Bilong Yumi i helpim ol, long wanem, long olgeta mun em i save kamapim ol nupela nupela tok ol i ken mekim wok long en.

Tasol ating yu pilim olsem yu no laik senisim ol tok yu mekim. Long olgeta mun ating yu inap lusim sampela aua tasol long autim tok long ol haus. Inap sampela yia pinis ating yu bin mekim wok long sampela tok tasol em yu amamas long mekim, na ol man i harim dispela tok ol i amamas long kisim. Ating yu mekim wok long sampela skripsa tasol olsem Song 37⁠:​9-11 o 2 Pita 3⁠:13 o Kamapim Tok Hait 21⁠:⁠4. Sapos olsem, no ken ting yu mas wok oltaim long senisim tok. Bikpela samting em i olsem: Yumi mas autim tok bilong Kingdom na helpim man long kisim save long ol samting em i mas mekim na bai Jehova i ken mekim gut long em. Sapos yu painim sampela tok long buk Reasoning na yu laik tru long mekim wok long en na yu pilim olsem i gutpela long man bilong haus, orait, mekim wok long dispela.