Tingim Gut Man—Long Rot Bilong Redi Gut
1 Pasin bilong redi gut long autim tok bai helpim yumi long tingim ol narapela. Bilong wanem i olsem? Taim yumi redi gut, yumi no tingting tumas long tok yumi laik mekim na long dispela rot yumi inap tingim moa man bilong haus. Na tu, dispela bai helpim yumi long givim bel long autim tok na daunim pasin bilong pret. Tasol olsem wanem yumi ken redim wanpela gutpela tok bilong autim long ol man?
2 Mekim Wok Long Wanpela Tok i Stret Long Man: Makim wanpela bilong ol tok i stap long pes 5-8 bilong dispela namel pepa i stret long teritori bilong yupela, na skelim olsem wanem yu ken kamapim dispela tok long toktok bilong yu yet. Senisim tok na bai i stret long teritori bilong yu. Olsem: Sapos planti taim yu save bungim ol manmeri bilong wanpela lotu o narapela skin o tok ples, tingim ol samting ol bai i gat laik long save long en. Taim yu senisim tok yu mekim na bai i stret long man, dispela i soim olsem yu tingim man bilong haus.—1 Ko. 9:22.
3 Taim yu mekim wok long dispela pasin bilong autim tok, wok yet long stretim stretim tok yu mekim. Kirap bilong tok i bikpela samting, olsem na skelim pasin bilong ol man taim yu toktok. Olsem wanem? Ol i amamas long harim tok yu mekim? Ol i bekim ol askim yu givim ol? Sapos nogat, orait wok yet long senisim tok bilong yu inap yu lukim olsem man bilong haus i amamas long harim tok yu mekim.
4 Ol Samting i Ken Helpim Yu: Planti bratasista i hatwok long tingim wanpela tok bilong mekim taim ol i kamap long haus bilong man. Sapos dispela samting i save kamap long yu, orait mekim traim pasin bilong autim tok wantaim wanpela. Dispela bai helpim yu long putim gut ol tok long tingting bilong yu na bai yu mekim tok i klia. Na tu, bai yu redi long senisim tok taim man bilong haus i kamapim tingting bilong em.
5 Narapela samting inap helpim yu, em long raitim sotpela tok long wanpela liklik pepa na yu ken lukluk long en paslain long yu kamap long haus bilong man. Sampela i pilim olsem dispela pasin i bin helpim ol na ol i no pret na ol i toktok gut wantaim man. Taim yumi mekim olsem, ol tok yumi redim gut bai soim olsem yumi tingim ol narapela na pasin bilong yumi long autim tok bai kamap gutpela moa.