Soim Olsem Yu Tingim Ol Man Long Rot Bilong Senisim Tok
1 Aposel Pol i stap gutpela piksa long pasin bilong senisim tok na bai i stret wantaim tingting na sindaun bilong ol man em i autim tok long ol. (1 Ko. 9:19-23) Yumi tu i mas wok strong long mekim olsem. Sapos yumi redi gut pastaim, yumi inap senisim liklik ol tok ol i redim pinis i stap long Wok Kingdom na bai i stret long ol man long teritori bilong yumi. Taim yumi kamap long wanpela haus, ating bai yumi lukim ol samting i kamapim tingting na laik bilong man, na yumi ken kamapim dispela long tok bilong yumi. Tasol i gat narapela samting tu yumi ken mekim bilong senisim tok.
2 Tok Man Bilong Haus i Kamapim: Taim yumi autim tok, planti taim yumi save givim askim long ol man bilong haus na kirapim ol long kamapim tingting bilong ol. Yu save ting olsem wanem long tok em i mekim? Yu save tok tenkyu tasol na kamapim tok yu redim pinis? O tok yu mekim i soim olsem yu tingim tok man bilong haus i kamapim? Sapos yu soim olsem yu tingim tok ol narapela i mekim, yu inap mekim wok long sampela askim moa na bai yu kisim save long wanem samting stret i stap long tingting bilong ol. (Snd. 20:5) Long dispela rot yu inap kamapim wanpela samting long tok bilong Kingdom i stret long samting em man bilong haus i tingting planti long en.
3 Dispela i makim olsem yumi mas redi long toktok long ol narapela samting na i no long ol tok yumi redim pinis bilong mekim. Sapos yumi kolim wanpela hevi em nius i stori long en na man bilong haus i stori long wanpela samting i kamap long hap bilong em o wanpela samting em i tingting planti long en, orait pasin bilong tingim man bai kirapim yumi long stori long samting i stret long em.—Fl. 2:4.
4 Toktok Long Narapela Taim: Sapos man bilong haus i kamapim wanpela askim, i gutpela yumi toktok long dispela samting long narapela taim bihain long yumi painim pinis sampela tok moa long dispela samting. Na tu, yumi ken givim em ol buk samting i stori moa long dispela samting. Taim yumi mekim olsem, dispela i kamapim klia olsem yumi tingim ol man na yumi laik helpim ol long kisim save long Jehova.—2 Ko. 2:17.