Mekim Wok Autim Tok i Kamap Gutpela Moa—Tingim Gut Ol Man

Em i Bikpela Samting: Jisas i save tingim gut ol wan wan man, na em i mekim pasin laikim long ol. Olsem: Wanpela taim ating Jisas i lukim olsem wanpela yaupas man i sem, olsem na taim Jisas i oraitim dispela man, Jisas i kisim em i go longwe long ol narapela na bai ol i no lukluk strong long em. (Mak 7:31-35) Em i soim olsem em i tingim gut ol disaipel bilong em, em i luksave olsem ol i no inap kisim save long planti samting na em i no kamapim planti tok tumas long ol. (Jon 16:12) Na maski em i gat bikpela namba long heven, Jisas i soim olsem em i tingim gut ol man. (2 Tim. 4:17) Yumi ol man i bihainim Krais, yumi laik bihainim pasin bilong em. (1 Pita 2:21; 1 Jon 3:16, 18) Na tu, wok autim tok bilong yumi inap kamap gutpela moa sapos yumi tingim gut ol man bilong haus na ol samting long sindaun bilong ol, ol samting ol i laik save long en, na ol samting ol i save wari na tingting long en. Man bai amamas long harim tok sapos em i save olsem yumi tingim gut em na yumi no tingting tasol long autim tok o tilim tasol buk samting.

Rot Bilong Mekim:

Redi gut. No ken pret, smail, na mekim pasin pren.
Skelim gut ol samting. Yu lukim sampela samting i makim olsem em i gat pikinini?, em i save amamas long wokim gaden o em i gat ol animal?, em i bilong wanpela lotu? Ating i gutpela long senisim tok bilong yu na bai i stret long sindaun bilong em.
Askim em long kamapim tingting bilong em, na no ken katim tok bilong em. Lukluk long pes bilong man na em bai save yu putim gut yau long em. Tok tenkyu long em na tok amamas long em i kamapim tingting bilong em, mekim long gutpela pasin. Abrusim pasin bilong tok pait.
Redi long senisim tok. Sapos i stret long mekim, senisim tok em yu bin redim na toktok long samting em man i laik save long en. Em i no hatwok long mekim olsem, long wanem, yumi gat ol liklik nius, buklet, na ol magasin i stori long ol narapela narapela samting. Sapos yu kamap long haus long taim we i no gutpela tumas, olsem man i bisi long wanpela wok samting, orait yu mas luksave long dispela na sotim tok bilong yu.

Long Dispela Mun, Traim Dispela:

Long taim bilong Famili Lotu, o ating long taim yupela i autim tok, mekim traim dispela, wanpela pablisa i redi long senisim tok bilong em bambai em i ken toktok long samting em man bilong haus i laik toktok long en.
Long sampela grup bilong autim tok, brata i lukautim grup i ken stori na mekim soim long sampela pasin yumi ken bihainim i soim olsem yumi tingim gut man.