Tingim Gut Ol Narapela—Long Rot Bilong Lukluk Gut Long Ol Samting
1 God Jehova na Krais Jisas i stap nambawan piksa long pasin bilong luksave long ol samting ol man i sot long en na givim helpim long ol. ( 2 Sto. 16:9; Mk. 6:34) Taim yumi bungim ol man long wok autim tok, i gutpela sapos yumi inap luksave long ol samting ol i tingting planti long en, na dispela inap helpim yumi long mekim ol tok i stret long ol.
2 Lukluk Gut Long Ol Samting: Jisas i bin lukluk gut long ol samting. (Mk. 12:41-43; Lu. 19:1-6) Olsem tasol, taim yumi kamap long haus bilong ol man na yumi lukim ol bilas bilong lotu, tok bilong ol stika i stap long ol ka, o ol toi i stap ausait long haus, yumi inap yusim ol dispela samting bilong mekim ol tok i stret long man bilong haus.
3 Lukluk bilong man inap helpim yumi long save long tingting bilong em. (Snd. 15:13) Ating wanpela long famili i dai o sampela narapela samting i mekim na em i bel hevi. Em bai amamas sapos yumi kamapim sampela skripsa i stret long samting i painim em. (Snd. 16:24) O ating man bilong haus i hariap long lusim haus o em i holim wanpela liklik bebi i wok long krai. Sapos olsem, i gutpela long stretim tok long yumi ken i go bek long narapela taim. Taim yumi tingim gut ol man na “sori” long ol, dispela inap kirapim man long putim yau taim yumi go bek.—1 Pi. 3:8.
4 Senisim Toktok Bilong Yu: Aposel Pol i bin lukim olsem long taun Atens, i gat wanpela alta i gat tok olsem “Dispela alta em i bilong wanpela god mipela i no save long en.” Dispela i stiaim pasin bilong em long autim gutnius, na em i tok: “Orait dispela God yupela i no save long en na yupela i lotu nating long en, nau mi laik autim tok bilong en long yupela.” Dispela pasin bilong Pol long autim tok i kirapim sampela man long putim yau long tok bilong Kingdom na ol i kamap bilipman.—Ap. 17:23, 34.
5 Olsem tasol, taim yumi lukluk gut long ol samting, dispela bai helpim yumi long luksave long ol samting man i tingting long en na yumi inap autim ol tok i stret long em. Kamapim ol askim inap pulim tingting bilong man. Tingim ol skripsa yumi inap yusim bilong kirapim laik bilong em. (Snd. 20:5) Taim yumi lukluk gut long ol samting na soim olsem yumi tingim tru ol narapela, dispela bai helpim yumi long mekim gut wok bilong yumi long autim gutnius.