Toktok Gut Wantaim Man Bilong Haus
1. Wanem kain pasin bilong autim tok i gutpela moa?
1 Wanem kain pasin bilong autim tok i gutpela moa—pasin bilong strong long tingting bilong yu yet, o pasin bilong toktok gut wantaim man na helpim em long kisim stretpela tingting? Taim aposel Pol i autim tok long ol Juda long Tesalonaika, em i toktok gut wantaim ol, “olsem na sampela bilong ol i kirap bilip.” (Apo. 17:2-4) Yu ken mekim wanem bilong toktok gut wantaim ol man?
2. Olsem wanem yumi inap bihainim pasin bilong Pol taim yumi autim gutnius?
2 Tingim Sindaun na Tingting Bilong Man: Bilong toktok gut wantaim ol man long teritori, yumi mas tingim ol samting ol i save tingting long en. Taim Pol i autim tok long ol Grik long Areopagus, em i stori long ol samting ol i save gut long en. (Apo. 17:22-31) Olsem na taim yu redim ol tok yu laik kamapim, tingim ol samting ol man long teritori i bilip long en na tingting bilong ol long ol man bilong ol narapela lain. (1 Kor. 9:19-22) Sapos man bilong haus i no wanbel long tok yu mekim, orait kamapim wanpela tok we em i ken wanbel long en, na yu ken toktok wantaim em long dispela samting.
3. Olsem wanem yumi inap toktok gut wantaim ol man long rot bilong mekim gutpela wok long ol askim?
3 Mekim Gutpela Wok Long Ol Askim: Sapos wanpela man i laik go long wanpela hap na em i askim yu long soim rot long en bilong i go long dispela hap, tasol yu no save long hap em i stap long en, orait bai i hatwok long yu stiaim em i go long hap em i laik go long en. Olsem tasol, yumi no inap helpim man bilong haus sapos yumi no save long tingting em i gat. Paslain long Jisas i toktok gut wantaim man, em i save kamapim ol askim bilong kisim save long tingting bilong man. Olsem: Taim wanpela man i askim Jisas, “Mi mas mekim wanem bilong kisim laip oltaim?,” Jisas i givim sampela askim bilong kisim tingting bilong em, na bihain em i bekim askim bilong em. (Luk 10:25-28) Wanpela taim Pita i no bekim stret askim bilong Jisas, olsem na Jisas i mekim gutpela wok long ol askim bilong stretim tingting bilong Pita. (Mat. 17:24-26) Olsem na sapos man bilong haus i kamapim wanpela askim o tingting kranki, mekim wok long ol askim bilong toktok gut wantaim em long dispela samting.
4. Bilong wanem yumi mas toktok gut wantaim man bilong haus?
4 Taim yumi toktok gut wantaim man bilong haus, yumi bihainim pasin bilong Bikpela Tisa, Jisas, na ol man long taim bilong en em ol i save gut long autim tok. Taim yumi mekim olsem yumi soim rispek long man bilong haus. (1 Pita 3:15) Dispela bai mekim na man bai amamas long yumi go bek lukim em.