Mekim Gut Ol Gobek
1 Yu save mekim ol gobek, o yu pilim i hatwok long mekim, long wanem, yu no save bai yu tok wanem? Yu no ken pret long mekim. I gat 3-pela samting inap helpim yu long mekim gut gobek: (1) redi gut; (2) save gut long toktok long wanpela o sampela tok bilong Baibel; (3) redi long putim gut yau taim man bilong haus i kamapim tingting bilong em.
2 Taim yu redi long mekim gobek tingim wanem tok i gutpela long toktok wantaim man bilong haus long en. Olsem wanem? Em i wanpela sumatin? Planti sumatin i amamas long toktok wantaim yu, long wanem, ol i save amamas long kisim save long ol narapela narapela samting. Na ating sampela bai amamas long harim tok bilong Kingdom. Olsem wanem? Yu bin kamapim wanpela askim taim yu bin stap wantaim em long namba wan taim? O man bilong haus yet i laik save long sampela tok? Lukim gen ol tok yu bin raitim long notbuk samting, na mekim wok long buk Reasoning, tok Inglis, o liklik buk Sampela Tok Bilong Baibel Bilong Toktok Wantaim Man Long En, na painim ol tok i gutpela long kamapim long taim yu mekim gobek. Taim yu go lukim man yu mas givim bel, na pes bilong yu i mas lait gut. Kolim nem bilong man bilong haus.
3 Sapos yu bin tilim Wastaua na Kirap! long man bilong haus, yu ken stori long wanpela o tupela tok bilong dispela magasin taim yu mekim gobek. Na sapos yu bin tilim wanpela liklik nius, yu ken stori long sampela tok bilong dispela liklik nius o yu ken soim em sampela tok long wanpela magasin o buklet.
4 Sapos yu tilim liklik nius “Gutpela Sindaun Long Nupela Taim,” yu ken tok olsem:
◼ “Namba wan taim mi kam, yumi bin stori long promis bilong God bilong kamapim gutpela sindaun long nupela taim long rot bilong Kingdom bilong em. Yu ting yumi yet i mas mekim wanem samting na yumi tu i ken stap long dispela gutpela taim?” Givim taim long man bilong haus long kamapim tingting bilong em, na bihain kamapim tok bilong Song 37:9, 11, 29 long em.
5 Sapos yu tilim liklik nius “I Gat Gutpela Samting Bai Painim Ol Man i Dai Pinis?” yu ken tok olsem:
◼ “Laspela taim mi bin kam lukim yu mi bin lusim wanpela liklik nius wantaim yu, nem bilong en I Gat Gutpela Samting Bai Painim Ol Man i Dai Pinis? Long namba 3 paragraf i gat sampela gutpela askim: ‘Bilong wanem ol man i save dai? Ol man i dai pinis ol i stap we? Na olsem wanem yumi ken save tru, ol inap i stap laip gen?’ Liklik het-tok hia i bekim ol dispela askim. Em i tok ‘Dai, na Ol Samting i Painim Yumi Taim Yumi Dai Pinis.’ Mi gat wanpela bilong dispela liklik nius i stap hia. Lukim, paragraf 4 i tok wanem?” Taim yu kaunim paragraf 4 larim man bilong haus tu i lukim liklik nius; kaunim tupela skripsa na askim em long tingting bilong em. Putim gut yau long tok bilong em, na mekim sampela tok i stret wantaim tok em i bin mekim.
6 Taim yu toktok wantaim man bilong haus ating em bai kamapim sampela tingting kranki. Yu no ken toktok long ol dispela tok. Yu mas toktok yet long ol tok yu laik autim long em. Sapos em i gat sampela tingting kranki yu ken toktok long dispela samting long narapela taim.
7 Em i bikpela samting yu mas stretim rot bilong mekim gutpela gobek sapos man i laik harim tok bilong Baibel.
[Ol Askim]
1. Wanem 3-pela samting bai helpim yu long mekim gut ol gobek?
2. Yu mas tingim wanem samting taim yu redi long mekim gobek?
3. (a) Taim yu bin tilim sampela magasin yu ken bihainim wanem gutpela rot bilong redi long mekim gobek? (b) Taim man bilong haus i kisim wanpela liklik nius, bai yu tok wanem sapos yu mekim gobek?
6.Bai yu mekim wanem samting sapos man bilong haus i kamapim sampela tingting kranki?