Mekim Wok Long Buk Stap Oltaim Long Taim Yu Mekim Ol Gobek
1 Aposel Pol i save, bikpela samting em i mas wok strong long lukautim gut ol man i laik harim tok i tru. Em i tok ol i olsem kaikai long gaden i no strong tumas, na man i mas givim wara long en na lukautim gut long olgeta taim. (1 Ko 3:6-9) Na i wankain tu long nau, yumi mas go bek lukim ol man i laik harim tok na yumi lukautim gut ol na bai ol inap kamap strong long ol samting bilong spirit.
2 Planti man, taim yumi go bek lukim ol, yumi mas kirapim tingting bilong ol long ol samting yumi bin stori wantaim ol long en bipo. Olsem na olgeta taim yumi go bek lukim ol, gutpela sapos yumi stori gen liklik long ol samting yumi bin stori long en bipo, olsem ol tok ol i bin pilim tru. Traim pulim man i kam insait long toktok, na pilim kwik ol samting em i gat tingting long en.
3 Taim yu mekim gobek, maski man i kisim buk “Stap Oltaim” o nogat, yu ken mekim wok long dispela pasin bilong kirapim stadi:
◼ “Mipela i toktok wantaim planti man ol i gat askim long Baibel, na ol i bin kisim bekim bilong ol dispela askim long rot bilong dispela buk.” Orait nau opim buk Stap Oltaim long pes i gat lista bilong ol tok i stap insait, na yu ken kamapim askim olsem: “Wanem tok hia yu gat bikpela laik long save long en?” Opim buk long sapta em i kolim pinis na soim man bilong haus olsem wanem ol paragraf i gat namba i stret wantaim ol askim daunbilo na bai em inap kisim gut ol bikpela tok bilong ol wan wan paragraf. Kamapim tupela o 3-pela tok tasol na stretim gut rot bilong i go bek lukim em.
4 Narapela pasin bilong kirapim stadi i olsem:
◼ “Mi amamas long toktok wantaim yu long wik i go pinis. Planti manmeri i laik save, bilong wanem mipela i kam planti taim long haus bilong ol? Mi ting dispela tok long pes 29 bilong dispela buk Yu Inap i Stap Oltaim Long Paradais Long Graun bai kirapim tingting bilong yu. [Kaunim paragraf 11.] Olsem dispela paragraf i kolim pinis, yu ting yumi mas mekim wanem na bai God i orait long lotu bilong yumi? [Larim man i bekim tok, na nau yu ken tok, ‘Em gutpela.’] Long taim bilong Jisas, sampela man i ting God i orait long lotu bilong ol. Lukim ol tok bilong paragraf 2 i stori long ol.” Kaunim na stori liklik.
5 Taim yu go bek lukim man bipo em i kisim buk “Stap Oltaim,” yu ken mekim tok olsem:
◼ “Taim mi lukim yu bipo, yumi bin stori long ol samting i kamap long graun na man i mas stretim. Olsem wanem? Yu laik save, bilong wanem God i larim pasin nogut i stap?” Larim man i bekim tok na opim buk long pes 99, paragraf 2, na lukim ol askim bilong stadi. Kaunim paragraf na stori long en, na lukim ol skripsa long Baibel. Sapos yu laik skruim sampela tok moa, yu ken opim buk na lukim sampela piksa, olsem i stap long pes 78, 84, 85, 119, 147, 149-153, 156-158.
6 Taim Yu Tilim Liklik Nius: Taim yu autim tok long man long namba wan taim na yu tilim wanpela liklik nius long em, orait taim yu go bek lukim em yu ken stori long wanpela o tupela paragraf bilong dispela liklik nius na yu ken stori long ol skripsa tu. Orait nau yu ken tokim em olsem wanem buk Stap Oltaim i stori moa long wanpela bilong ol dispela skripsa. Sapos man i kamapim bel bilong em olsem em i laik harim sampela tok moa, orait yu ken tilim buk Stap Oltaim na stretim rot bilong toktok moa wantaim em long taim yu lukim em bihain.
7 Sapos yumi stap gut long wok bilong givim wara long ol man i no strong tumas long ol samting bilong spirit, orait, God bai mekim ol i kamap strong na dispela bai litimapim nem bilong em.—1 Ko 3:7.
This article is repeated in km 7/95, 12/95.