Mekim Ol Gobek Bilong Helpim Man Long Save, Olsem Wanem Em Inap i Stap Oltaim
1 Kirap long taim ol i bin wokim buk Stap Oltaim, ol i bin wokim inap olsem 65,000,000 long 115 tok ples. Planti manmeri, em nau ol i wokboi bilong Jehova, ol i bin lain long ol as tok i tru bilong Baibel long rot bilong dispela gutpela buk. Long dispela mun bai yumi tilim gen dispela buk, em buk bilong stadi wantaim ol man long en, o ating long teritori bai yumi bungim sampela man ol i kisim pinis.
2 Mekim Gobek Long Ol Man i Kisim Buk Pinis: Sampela pablisa i save opim buk long pes i gat lista bilong ol tok i stap insait na ol i askim man i gat laik long harim tok, wanem tok em i gat laik long save long en. Taim man bilong haus i makim pinis, orait tokim em, gutpela sapos em i kaunim ol tok bilong dispela sapta paslain long taim yu go bek lukim em bihain.
3 Sapos yu inap, gutpela sapos yu makim taim stret bilong mekim gobek. Taim yu no mekim yet gobek, redi long toktok wantaim man bilong haus long sampela paragraf bilong dispela sapta em i bin makim. Sapos em i no bin makim wanpela sapta, orait kirap long toktok long ol tok bilong sapta wan. Taim yu stori pinis long sampela paragraf, kamapim wanpela askim em ol paragraf bihain i stori long en. Dispela bai opim rot bilong yu ken go bek lukim dispela man na mekim yet stadi long buk Stap Oltaim.
4 Tasol sapos man bilong haus i gat sampela askim, gutpela sapos yu tingim ol dispela askim pastaim. Ating buk hia i stori long ol dispela askim. Sapos yumi save gut long ol tok i stap long buk, ating bai yumi inap opim buk na mekim wok long ol paragraf i bekim stret ol askim man hia i bin kamapim.
5 Mekim Gobek Long Ol Man i Kisim Liklik Nius: Sapos yumi tilim liklik nius Gutpela Sindaun Long Nupela Taim long man bilong haus, orait, taim yumi go bek lukim em yumi ken toktok wantaim em long ol paragraf i kam paslain.
Sapos man bilong haus i laik tru long harim tok, orait, taim yumi kamapim pinis ol tok bilong paragraf wan long pes 3, em ol tok bilong Song 37:29 i stap long en, yumi ken mekim tok olsem:
◼ “Dispela buk Yu Inap i Stap Oltaim Long Paradais Long Graun i stori moa long ol dispela tok yumi mekim pinis. Long sapta wan hia, lukim dispela tok long paragraf 3 i stap aninit long dispela het-tok ‘As Bilong Dispela Bilip.’ ” Nau kaunim paragraf 3 na kamapim askim bilong en i stap daunbilo, na mekim olsem long paragraf 4 na 5. Orait nau yumi ken kamapim askim olsem: “Bilong wanem i stap bilong yumi ol man long nau i no wankain olsem God i laikim? Ol paragraf bihain i stori long dispela samting, na mi laik kam bek long wik antap long wankain taim olsem nau na bai mi ken helpim yu long save long bekim bilong dispela askim.” Nau yu ken tilim buk.
6 Bilong tilim buk “Stap Oltaim,” yu ken mekim tok olsem:
◼ “Mi save bai yu amamas sapos yu gat wanpela buk bilong yu yet, long wanem, bai yu inap kaunim ol tok yumitupela bai stori long en bihain, na long dispela rot bai yu inap kisim gut moa ol tok yumi mekim.” Sapos man bilong haus i laik kisim buk, yumi ken tok: “Bilong baim pepa na ing samting, mipela i save tilim dispela buk long kontribusen olsem K3.00.”
7 Yumi mekim ol gobek bilong helpim ol man long save olsem wanem ol inap i stap oltaim, na dispela wok em i bikpela samting tru. Jisas i tokim ol disaipel bilong em long ol i mas lainim ol narapela long ol tok ol yet i bin lain long en. Yumi save beten askim Jehova long salim sampela wokman moa i go, olsem na yumi gat wok long painim ol man i laik harim tok na lainim ol, na bai ol tu i ken wok wantaim yumi long bungim kaikai bilong gaden.—Mt 9:37; 28:19, 20.
[Ol Askim]
1. Ol i bin tilim hamas buk Stap Oltaim, na long hamas tok ples?
2. Taim yu mekim gobek long man i kisim buk pinis, kolim wanpela gutpela samting yu ken mekim.
3. Taim yu no go bek yet long man i bin kisim buk Stap Oltaim, yu ken redi olsem wanem?
4. Sapos man bilong haus i gat sampela askim, yumi ken mekim wanem?
7. I gat wanem as na yumi mekim ol gobek na toktok wantaim ol man i laik harim tok?