Rot Bilong Kirapim Baibel Stadi Wantaim Ol Man i Kisim Ol Nius
1. Yumi laik mekim wanem taim yumi tilim ol nius?
1 Long ol Sarere yumi save tilim nius Wastaua na Kirap! Tasol yumi laik mekim sampela samting moa na bai yumi inap skulim ol man i gat gutpela bel long tok i tru. Daunbilo i gat sampela tok inap helpim yumi long tilim buk Baibel i Tok taim yumi mekim gobek na long kirapim Baibel stadi. Yu ken senisim liklik ol dispela tok na bai tok i stret long teritori bilong yu na yu ken mekim tok long pasin bilong yu yet. Yu ken bihainim narapela pasin bilong autim tok sapos i gutpela moa long yu.
2. Olsem wanem yumi inap mekim wok long pes 4-6 long buk Baibel i Tok bilong kirapim wanpela Baibel stadi?
2 Mekim Wok Long Pes 4-6: Taim yu go bek lukim man, yu ken tok olsem: “Ol nius mi bin lusim wantaim yu i kirapim ol man long tingim tok bilong Baibel. Lukim tok Baibel i mekim long i gat wanem as na pasin bilong ritim Baibel em i bikpela samting.” Ritim Aisaia 48:17, 18; Jon 17:3; o narapela skripsa i stret long dispela. Orait nau soim buk Baibel i Tok long man bilong haus na givim buk long em, na bihain yu ken tok:
◼ “Baibel i helpim yumi long wetim gutpela samting bai kamap bihain.” Soim pes 4-5 long man bilong haus na askim em, “Yu laik lukim truim bilong wanem tok promis ol dispela piksa i kamapim?” Soim sapta i stori long tok promis bilong Baibel em i laikim, na stori liklik long wanpela o tupela paragraf sapos em i orait long dispela.
◼ O yu inap tok, “Baibel i bekim ol bikpela askim bilong laip ol man i save tingting long en.” Opim buk long pes 6, na askim em sapos em i bin tingting long wanpela bilong ol askim i stap daunbilo long pes. Soim sapta i bekim askim, na stori liklik long wanpela o tupela paragraf.
◼ O yu inap soim em sampela het tok bilong ol sapta long kirap bilong buk na askim em long em i gat laik long save long wanem tok. Opim buk long sapta i stori long dispela samting, na soim em long pasin bilong stadi long Baibel.
3. Olsem wanem yumi ken kirapim wanpela Baibel stadi taim yumi tilim nius i stori long (a) ol samting long graun i wok long i go nogut moa? (b) famili? (c) i gat wanem as na yumi inap bilip long Baibel?
3 Kamapim Askim Long Namba Wan Taim Yu Bungim Man: Narapela rot yu ken bihainim, em yu ken redim rot bilong mekim gobek taim yu bungim man long namba wan taim. Taim man bilong haus i kisim pinis ol nius, yu ken kamapim wanpela askim na tokim em olsem yu bai go bek na bekim dispela askim. Makim de na taim stret yu bai go bek lukim em, na yu mas bihainim dispela tok. (Mt. 5:37) Taim yu go bek, kamapim gen dispela askim, na ritim na skelim bekim bilong en long buk Baibel i Tok. Givim wanpela buk long em bambai em i ken lukim ol tok. Em hia sampela rot yu ken bihainim:
◼ Sapos nius yu tilim i stori long ol samting long graun i wok long i go nogut moa, yu inap tok, “Narapela taim yumi ken toktok long bekim Baibel i givim long dispela askim olsem, God bai kamapim wanem ol senis hia long graun?” Stori long pes 4-5 taim yu go bek. O yu inap kamapim dispela askim, “Em i laik bilong God na ol hevi i kamap?” Taim yu go bek lukim man, soim em paragraf 7-8 long sapta 1.
◼ Sapos nius yu tilim i stori long famili, orait paslain long yu lusim man yu ken kamapim dispela askim, “Olgeta wan wan insait long famili inap mekim wanem bilong helpim famili long i stap amamas?” Taim yu go bek, skelim paragraf 4 long sapta 14.
◼ Sapos nius yu tilim i stori long i gat wanem as na yumi inap bilip long Baibel, yu inap kamapim dispela askim bilong stori long en long bihain, “Yu ting tok bilong Baibel i stret wantaim saiens?” Taim yu go bek, skelim paragraf 8 long sapta 2.
4. Yumi mas mekim wanem sapos man bilong haus i no laik kisim buk Baibel i Tok?
4 Taim yu pinisim tok, kamapim narapela askim bilong skelim long taim yu go bek gen. Taim man i kirap stadi long olgeta wik, orait nau yu ken stadi long kirap bilong buk i go long pinis bilong en. Tasol olsem wanem sapos man bilong haus i no laik kisim buk Baibel i Tok? Yu ken wok yet long kisim ol nius i go long em na toktok wantaim em long Baibel. Taim yu wok long kirapim laik bilong em long kisim save, ating bihain em bai i gat laik long stadi long Baibel.
5. Taim yumi autim tok, bilong wanem yumi no ken tingting tasol long tilim ol nius long ol man?
5 Nius Wastaua na Kirap! inap kirapim laik bilong man long kisim save long tok bilong Baibel. Olsem na wok strong long kirapim wanpela Baibel stadi wantaim ol man i kisim ol nius. Long dispela rot yumi bihainim tok bilong Jisas long ‘mekim olgeta lain manmeri i kamap disaipel na lainim ol.’—Mt. 28:19, 20.