Mekim Wok Autim Tok i Kamap Gutpela Moa—Yusim Buk Baibel i Tok Long Soim Pasin Bilong Mekim Baibel Stadi

Em i Bikpela Samting: Ating planti man i no klia taim yumi tok yumi save mekim Baibel stadi wantaim man na no gat pe. Ol i ting olsem ol i mas joinim wanpela stadi grup o ol i mas kisim sampela kain kos we ol i mas raitim ol bekim. Olsem na no ken tokim man tasol olsem yu laik stadi wantaim em, i gutpela long soim em pasin bilong mekim stadi. Insait long sampela minit tasol, o long dua bilong man, yu inap soim man olsem em i isi na em wanpela kain gutpela samting long stadi long Baibel.

Rot Bilong Mekim:

Taim yu kolim pinis nem bilong yu, yu ken askim man bilong haus sapos em i save tingting planti long wanem samting bai kamap long bihain.
Tokim em olsem planti man i gat wankain hevi olsem em, na soim em lista bilong ol het tok long buk Baibel i Tok. Stori gut long em olsem dispela buk i gat ol tok i no hatwok long kisim save long en, na i kamapim ol tok Baibel i mekim long wanem samting bai kamap bihain na ol narapela stori, na askim em long wanem sapta em i gat laik long save long en.
Givim em wanpela buk na stiaim em i go long sapta em i makim. Tokim em olsem ol askim i stap long kirap bilong ol sapta, bekim bilong ol i stap long ol paragraf.
Tokim em long ritim namba 1 paragraf sapos em i amamas long mekim. Bihain ritim askim bilong paragraf, na yutupela wantaim i ken skelim bekim bilong en. Lukim na stori long skripsa i strongim dispela bekim. Soim em long olsem wanem yu makim bekim long buk bilong yu.
Skelim narapela paragraf, tasol nau askim man long em yet i ken traim long bekim askim long toktok bilong em yet.
Tok amamas long em, na stretim rot long go bek na pinisim lesen.
Sapos i stret, stiaim em i go long vidio i stap long jw.org nem bilong en Mipela i Save Mekim Wanem Long Taim Bilong Baibel Stadi?

Traim Mekim Olsem Long Dispela Mun:

Beten long Jehova i blesing ol wok yu mekim long kirapim wanpela nupela Baibel stadi.—Fili. 2:13.
Wok strong long yusim buk Baibel i Tok long kirapim wanpela Baibel stadi, o soim vidio Mipela i Save Mekim Wanem Long Taim Bilong Baibel Stadi?, i gutpela long mekim wanpela taim long taim yu autim tok.