Ol Samting Ol Nupela Man na Ol Witnes Bilong Longtaim i Mas Mekim
1 Man bilong raitim Song, em Devit, em i kamapim askim olsem: “Bikpela, husat inap i stap long haus bilong yu? Husat inap sindaun long Saion, dispela maunten bilong yu yet?” Devit i mekim sotpela bekim olsem: “Man i bihainim laik bilong God long olgeta samting, na i mekim stretpela pasin oltaim, na i save tok tru oltaim.” (Sng 15:1, 2) Ol dispela samting man i mas mekim i no bin senis. Olgeta man i kam long kongrigesen Kristen long nau ol i mas lusim pasin bilong pamuk na spak. Ol man bilong tok pait o kros nogut tru, o man i gat tupela maus, ol i no inap insait long lain bilong Jehova. Maski yumi nupela man o wanpela Witnes bilong longtaim pinis, yumi olgeta i mas stap gut long bihainim ol lo bilong God i stap long Baibel.—Ga 5:19-21.
2 Planti nupela man i save bung wantaim oganaisesen bilong Jehova. Ol yangpela wantaim ol lapun i bin senisim tingting bilong ol na bai ol inap bihainim ol lo bilong God. Wanpela manki long Saut Amerika, taim em i go bikpela em i no gat papamama bilong stiaim tingting bilong em na soim rot long em, olsem na pasin bilong em i kamap nogut. Taim em i no gat 18 krismas yet em i save kisim ol drak, na em i bin kisim taim long kalabus, long wanem em i bin stil bilong baim ol drak. Wanpela Witnes i stadi wantaim em long Baibel, na em i lusim ol man bipo em i save poroman wantaim ol, na em i kisim ol nupela poroman ol i bilong lain Witnes Bilong Jehova, na bihain em i dediket long God.
3 Olsem tasol, long olgeta wokabaut bilong yumi, yumi tu mas tingting strong long mekim pasin God i laikim, olsem pasin i “stretpela olgeta na i holi tru.” (Ef 4:24) Yumi gat wok long ‘rausim olgeta pasin bilong olpela bel na kamap nupela man. God i givim planti gutpela save long yumi na mekim yumi i kamap nupela.’ Yumi mas mekim ol dispela samting sapos yumi laik stap insait long oganaisesen bilong God, em i olsem wanpela strongpela maunten.—Kl 3:9, 10.
4 Tok Bilong God i Gat Strong: Pasin bilong Jehova em Baibel i stori long en inap senisim tru tingting na pasin bilong yumi na i kamap nupela. (Ro 12:2) Tok bilong God i gat strong bilong kirapim man long senisim tingting bilong em na i skelim bel bilong em tu. (Hi 4:12) Baibel i lainim yumi olsem Jehova i laik bai yumi bihainim stretpela pasin, na mekim bikpela wok autim tok, na no ken les long go long ol miting Kristen.
5 Yumi stap long taim nogut na ol hevi i wok long go bikpela na em inap pulim Kristen long brukim ol lo bilong God. Maski man i strongpela Kristen o nogat, sapos em i les long mekim stadi bilong em yet na famili-stadi, na em i les long go long ol miting na autim tok, isi isi em bai lusim bilip, na ating em bai mekim sampela pasin i no stret. Long dispela as Pol i tokim Timoti olsem: “[Oltaim] yu mas was gut long ol pasin bilong yu yet na long wok yu mekim bilong skulim ol manmeri” na, “[Oltaim] yu mas tingting long dispela tok mi mekim.”—1 Ti 4:16; 2 Ti 2:7.
6 Maski yumi nupela man o yumi bin insait long tok i tru inap planti yia pinis, oltaim yumi mas tingim gut ol lo bilong God, na autim tok inap long skel bilong yumi, na bilip strong long ol samting yumi wetim i kamap. Yumi mas mekim ol dispela samting sapos yumi laik abrusim bagarap na i stap laip. (1 Pi 1:13-16) Bikpela samting em olgeta de yumi mas bihainim ol stretpela lo bilong God.
7 Gutpela sapos yu autim tok long dispela namba wan mun bilong yia bilong wok bilong 1994 na putim olsem wanpela mak bilong winim. Tingting strong long helpim ol narapela long kamap strong long bilip na helpim ol na bai wok autim tok ol i mekim i karim sampela kaikai moa. (Ro 1:12) Sapos oltaim yu mekim stadi bilong yu yet, na mekim famili-stadi, na go long ol miting, dispela bai helpim yu long tingim ol samting i stret. (Fl 4:8) Sapos yu mekim ol samting Jehova i laikim na yu bihainim ol lo bilong em, Jehova bai lukim ol dispela gutpela samting yu mekim.—Kl 3:23, 24.
[Ol Askim]
1. Ol man i kam long kongrigesen Kristen bilong lotu long God, ol i mas mekim wanem?
2. Stori long dispela manki i senisim pasin bilong em na bai em inap bihainim ol lo bilong God.
3. Yumi gat wanem wok?
4. Olsem wanem tok bilong God i gat strong long bosim wokabaut bilong yumi?
5. Olsem wanem yumi ken was gut oltaim long ol pasin bilong yumi yet?
6. Sapos yumi laik abrusim bagarap na i stap laip, yumi mas mekim wanem 3-pela samting?
7. Yumi mas tingting strong long mekim wanem long dispela nupela yia bilong wok?