Wok Strong Long Painim Ol Baibel-Stadi
1 Ol samting i kamap klia moa yet olsem pasin bilong dispela graun i no gat bikpela hap taim bilong i stap. (2 Ti 3:1-5) Olsem na planti manmeri inap lus. Tasol yumi inap helpim ol na bai sampela i abrusim bagarap na i stap laip. (Snd 3:27) Olsem na yumi mas wok strong long kirapim na mekim ol Baibel-stadi.
2 Ol buk samting bilong Baibel yumi bin tilim i bin helpim planti man. Tasol bilong helpim tru ol man, yumi yet mas stadi wantaim ol long Baibel long olgeta wik. Olsem wanem yumi ken helpim ol long save ol i mas stadi long Baibel?
3 Yumi ken kamapim sampela askim em planti man i tingting planti long en. Yumi ken kamapim ol askim olsem: Bilong wanem pasin bilong ol man i wok long go nogut tru? Bilong wanem ol famili i no sindaun gut wantaim? Olsem wanem pasin raskol na bagarapim man inap nogutim yumi ol man? Bilong wanem God bilong pasin sori i larim ol hevi na pasin nogut bilong nau i stap? Tingim wanem ol samting i bikpela samting long ol man long teritori bilong yu. Helpim ol long save, Baibel i kamapim klia bekim bilong ol dispela askim, na ol buk samting yumi tilim, ol tu inap helpim ol long save, Baibel i tok wanem long ol dispela samting na long ol narapela samting em i bikpela samting long yumi olgeta.
4 Em bikpela samting long yumi traim pulim man i kam insait long toktok. Traim pilim ol samting i bikpela samting long em. Toktok long ol samting em i gat bikpela laik long save long en o long ol samting em i save tingting planti long en. Opim wanpela buk, o buklet, o magasin, o liklik nius, long hap i stori long rot em Baibel i kamapim bilong stretim ol hevi bilong yumi ol man. Taim yu no lusim yet haus bilong em, kamapim wanpela o tupela askim yu ting em inap kirapim tingting bilong em na bai em i amamas long toktok moa wantaim yu bihain. Taim yu go bek yu mas kamapim gen ol dispela askim, na nau mekim wok long ol buk o buklet samting bilong helpim em long save, Baibel i tok wanem long ol dispela samting.
5 Wok bilong yumi long kirapim ol stadi na mekim long olgeta wik inap senisim i stap bilong ol man. Yumi mas kamapim klia olsem yumi tingim tru ol man yumi bungim long haus o long kain kain taim na ples. Yumi mas redi gut na bai yumi inap kirapim tingting bilong ol na bai ol i amamas long harim sampela tok moa. Yumi no ken les kwik—yumi mas go bek lukim ol inap long taim ol i kirap long kisim kaikai bilong spirit long olgeta wik. Bilong mekim olsem, yumi mas sori tru long ol na tingim gut ol. Yumi mas laik tru long helpim ol na bai ol inap abrusim bagarap, em liklik taim bai kamap. Wok bilong yumi long mekim ol Baibel-stadi, em samting oltaim yumi mas beten strong long en.—1 Te 5:17.
6 Insait long 3-pela yia i go pinis, yu bin lukim klostu wan milion manmeri i kamap disaipel bilong Jisas na kisim baptais, na dispela samting i strongim yumi. (Mt 28:19, 20) Nau long olgeta wan wan mun, yumi save mekim inap olsem foa na hap milion Baibel-stadi, na dispela i kamapim klia olsem yumi tingim laip bilong ol narapela—nogut ol i lus. Olsem wanem long yu? Yu bin wok strong na bai yu insait long wok bilong mekim ol Baibel-stadi? Tingim: Yumi mas stap gut long dispela wok na bai laip bilong yumi na ol narapela i no ken lus.—Ese 3:17-19.
[Ol Askim]
1. Pasin bilong dispela graun i no gat bikpela hap taim bilong i stap, na olsem wanem long ol manmeri?
2. Long dispela taim nau, wanem samting inap helpim tru ol man?
3. Taim yumi autim tok yumi ken kamapim wanem kain ol askim bilong toktok long en?
4. Olsem wanem yu ken traim pulim man i kam insait long toktok?
5. Yumi mas mekim wanem na bai yumi inap stadi wantaim man long Baibel long olgeta wik?
6. Wanem sampela samting bilong wok autim tok i strongim yumi?