Go Bek Lukim Ol Man i Laik Harim Tok
1 Taim yumi autim tok long ol haus, yumi no gat bikpela hap taim bilong yumi ken stap wantaim man i laik harim tok. Yumi mekim tru wok bilong lainim ol man long taim yumi mekim ol gobek na Baibel-stadi. (Mt 28:19, 20) Bilong lainim gut man, pastaim yumi mas tingim gen ol tok yumi bin mekim taim yumi autim tok long em long namba wan taim, na yumi mas redim ol tok yumi laik mekim taim yumi go bek lukim em.
2 Sapos yu bin toktok long ol hevi bilong famili, yu ken mekim wok long ol tok bilong sapta 29 bilong buk “Stap Oltaim.” Yu ken tok:
◼ “Yumi bin toktok long olsem wanem pasin bilong bihainim ol tok bilong Baibel inap helpim famili long i stap amamas. Yu ting wanem samting i olsem rot bilong helpim ol famili long nau long pas gut wantaim?” Larim em i bekim tok. Lukim paragraf 27 long pes 247, na kaunim Kolosi 3:12-14. Stori moa long olsem wanem pasin sori inap helpim ol famili long pas gut wantaim. Stori olsem, pasin bilong stadi oltaim long buk Stap Oltaim inap helpim em long stretim ol hevi.
3 Taim yu autim tok long man long namba wan taim, sapos yu bin toktok long pasin nogut i go bikpela, yu ken mekim tok olsem:
◼ “Mi save yu bai wanbel wantaim mi taim mi tok, bilong gutaim i ken kamap, i mas i gat ol bikpela senis. Baibel i kamapim klia olsem Satan em i as tru bilong ol hevi bilong yumi. Planti man i laik save bilong wanem God i larim Satan i stap inap longtaim pinis. Wanem tingting bilong yu?” Larim em i bekim tok. Opim buk Stap Oltaim long pes 20, paragraf 14 na 15, na stori bilong wanem God i no bagarapim yet Satan. Orait nau kaunim Rom 16:20 na bai yumi ken save wanem samting bai kamap liklik taim bihain.
4 Sapos yu bin toktok long ol gutpela samting Kingdom bai kamapim long graun, orait taim yu mekim gobek, yu ken tok:
◼ “Kingdom bilong God bai kamapim planti gutpela samting long graun na bilong helpim ol man. Piksa hia long pes 12 na 13 i makim ol dispela gutpela samting. Yu amamas long lukim wanem samting long dispela piksa? [Larim em i bekim tok.] Olsem wanem sapos yu inap stap long kain ples olsem?” Kaunim paragraf 12. Sapos man i putim gut yau, kamapim askim long paragraf 13, na stori long bekim bilong en. Tokim em, dispela sapta i stori moa long ol gutpela samting Kingdom bai kamapim na taim yu kam bek lukim em bai yu amamas long stori wantaim em long ol dispela samting.
5 Ating yu inap kirapim stadi sapos yu mekim tok olsem:
◼ “Planti man i gat askim long Baibel ol i bin kisim bekim bilong ol dispela askim long rot bilong dispela buk.” Opim buk long pes i gat lista bilong ol tok i stap insait, na kamapim askim olsem: “Wanem tok hia yu gat bikpela laik long save long en?” Larim em i bekim tok, na opim buk long sapta em i kolim pinis, na kaunim namba wan paragraf. Soim em olsem wanem ol askim daunbilo i kamapim ol bikpela tok bilong ol wan wan paragraf. Bilong helpim em long save gut, stori long wanpela o tupela paragraf moa, na nau stretim rot bilong i go bek lukim em.
6 Sapos yumi go bek lukim ol man i laikim buk Stap Oltaim, dispela bai kamapim klia olsem yumi laik mekim tru wok bilong autim tok. (2 Ti 4:5) Ating bai yumi inap helpim ol man i harim tok bilong yumi long kisim laip oltaim.—Jo 17:3.
This article is repeated in km 6/95.