Sapta 2

Wanpela Birua Bilong Laip Oltaim

1. Planti man ol i no i stap amamas o bel isi, olsem na wanem ol askim i save kamap?

PLANTI manmeri ol i laik i stap amamas. Tasol ol i no i stap olsem, a? Bilong wanem? Planti manmeri i laik bai gutaim i ken i stap, tasol narapela lain i bel nogut long narapela lain na ol i pait. Olsem wanem? I gat wanpela samting i kirapim ol long mekim ol dispela pasin nogut? I gat wanpela man nogut i stap, em yumi no inap lukim em, tasol em i bosim ol lain man?

2. Wanem ol pasin nogut i bin kamap na planti man i ting i gat wanpela man nogut i stap, em yumi no inap lukim em, na em i bosim ol man?

² Planti manmeri i tingim dispela askim taim ol i lukim pasin nogut ol man i mekim, em ol i tromoi ol bom nogut nogut long taim bilong pait na bagarapim nogut tru skin bilong ol man, na kukim ol long paia na long marasin nogut, na kilim i dai planti manmeri wantaim, na ol i kalabusim ol man long ol banis kalabus nogut. Yu ting ol dispela pasin nogut i kamap nating? Tru, ol man yet inap mekim pasin nogut. Tasol taim yumi tingim ol dispela pasin nogut tru, yumi save ting olsem: ‘Ating wanpela man nogut i stap, em yumi no inap lukim em, na em i kirapim ol man long mekim ol dispela pasin nogut tru.’

3. Baibel i tok wanem long dispela man i bosim graun?

³ Baibel i tok dispela man i stap. Yumi no inap lukim em, tasol inap longtaim pinis em i bin bosim ol man na ol lain man. Jisas i kolim em olsem “hetman bilong dispela graun.” (Jon 12:31; 14:30; 16:11) Em i husat?

4. Seten i soim wanem samting long Jisas? Na em i tok long givim wanem samting long Jisas?

⁴ Sapos yumi tingim ol samting i painim Jisas taim em i laik kirapim wok bilong em long graun, bai yumi inap save long dispela man. Jisas i kisim baptais na bihain em i go long ples nating. Nau wanpela man yumi no inap lukim em, em Seten, em i kam traim Jisas. Baibel i tok: “Seten i soim em olgeta kingdom bilong dispela graun wantaim ol gutpela samting bilong ol. Na em i tokim Jisas, ‘Sapos yu brukim skru . . . na lotu long mi, orait bai mi givim yu dispela olgeta samting.’ ”—Matyu 4:8, 9.

5. (a) I gat wanem samting na yumi inap save, olgeta gavman bilong dispela graun ol i bilong Seten? (b) Husat i “god giaman bilong dispela graun,” olsem Baibel i tok?

⁵ Seten i tok long givim “olgeta kingdom bilong dispela graun” long Jisas. Tasol tru ol dispela kingdom o gavman i bilong Seten? Sapos ol i no bilong Seten bai Jisas i tok olsem, na bai Seten i no inap tok long givim ol long Jisas. Olsem na tru tumas, ol dispela kingdom o gavman ol i bilong Seten. Seten em i bos bilong olgeta lain bilong graun olsem Baibel i tok! (1 Jon 5:19) Na Seten em i “god giaman bilong dispela graun.”—2 Korin 4:4.

6. (a) Yumi save Seten i bos bilong dispela graun na dispela i helpim yumi long save long wanem samting? (b) Seten i laik mekim wanem long yumi? Olsem na yumi mas mekim wanem?

⁶ Nau yumi inap save long as bilong tok bilong Jisas, em i tok: “Kingdom bilong mi em i no bilong dispela graun.” (Jon 18:36) Na yumi inap save bilong wanem narapela lain i bel nogut long narapela lain na ol i pait, maski planti man i laikim gutaim i ken i stap. Tru tumas, “Seten . . . i man bilong giamanim olgeta manmeri bilong graun.” (Revelesen 12:9) Em i laik giamanim yumi tu. Em i laik pasim yumi long kisim dispela gutpela samting God i laik givim long yumi, em laip i stap oltaim. Olsem na yumi mas was gut, nogut em i pulim yumi long mekim pasin nogut. (Efesas 6:12) Yumi mas save long Seten na long pasin bilong em bambai yumi inap sakim ol samting em i mekim bilong giamanim yumi.

SETEN EM I HUSAT?

7. Olsem wanem na yumi no inap lukim Seten?

⁷ Seten em i wanpela ensel. Em i no olsem tingting nogut i stap long bel bilong olgeta man, olsem sampela man i tok. Nogat. Tasol yumi no inap lukim em. Yumi no inap lukim God tu, long wanem God na Seten ol i spirit. Ol spirit i narapela kain na yumi no inap lukim ol.—Jon 4:24.

8. Bilong wanem planti manmeri i bilip olsem God i bin wokim Seten?

⁸ Tasol ating bai yu tok, ‘Sapos God i laikim tru yumi bilong wanem em i wokim dispela ensel nogut?’ (1 Jon 4:8) God i no wokim wanpela ensel nogut. Tasol ating bai yu tok, ‘God i wokim olgeta ensel, olsem na em i mas wokim Seten tu. Sapos nogat, orait, husat i wokim Seten? Seten i kamap olsem wanem?’

9. (a) Ol ensel i wanem kain? (b) Wanem insait bilong dispela tok “seten”?

⁹ Baibel i tok, God i wokim planti planti spirit olsem em yet. Baibel i kolim ol dispela spirit olsem ol ensel o “ol pikinini bilong God.” (Jop 38:7, NW; Sam 104:4; Hibru 1:7, 13, 14) God i wokim olgeta dispela ensel i gutpela olgeta. No gat wanpela em i ensel nogut. God i no wokim wanpela “seten.” Insait bilong dispela tok “seten” i olsem birua.

10. (a) Husat i mekim na dispela man nogut, Seten, em i kamap? (b) Ating gutpela man inap kamap man nogut olsem wanem?

¹⁰ Bihain wanpela bilong ol dispela ensel em i kamap ensel nogut. Em i kamap man bilong giaman na tok nogut long narapela man. Bilong em yet em i kamap Seten o birua bilong God. God i no wokim em olsem. Nogat. Yumi ken tok piksa long dispela samting, olsem: Man i kamap stilman, mama i no karim em olsem. Ating em i gat gutpela papamama ol i no save stil, na ol brata susa bilong em i save wokabaut stret. Tasol ating em yet i laik kisim planti samting na em i kamap stilman. Em, dispela tok piksa i makim Seten. Orait, olsem wanem dispela pikinini spirit bilong God em yet inap kamap Seten?

11. (a) Dispela ensel i bikhet em i save long wanem laik bilong God? (b) Dispela ensel i gat wanem laik? Dispela laik i pulim em long mekim wanem?

¹¹ Taim God i wokim graun na Adam tupela Iv, dispela ensel i stap. (Jop 38:4, 7) Em i harim God i tokim tupela long kamapim ol pikinini. (Jenesis 1:27, 28) Em i save, bihain bai ol stretpela manmeri i pulap long graun na bai ol i lotu long God. Em laik bilong God. Tasol dispela ensel i hambak long gutpela skin na save bilong em yet na em i laik bai ol man i lotu long em na ol i no ken lotu long God. (Esikiel 28:13-15; Matyu 4:10) Em i no rausim dispela tingting nogut; em i tingim tingim. Na dispela tingting i kirapim em long mekim sampela samting bambai em inap kisim dispela biknem em i laik kisim. Em i mekim wanem?—Jems 1:14, 15.

12. (a) Dispela ensel i toktok wantaim Iv long wanem rot? Em i tok wanem? (b) Olsem wanem dispela ensel i kamap Seten? (c) Sampela man i gat wanem tingting kranki long Seten?

¹² Em i toktok wantaim Iv long maus bilong wanpela snek. Iv i ting dispela snek yet i toktok; tasol nogat. Dispela ensel i bikhet em i tromoi tok long maus bilong snek na em i toktok wantaim Iv. Baibel i kolim em “dispela snek bilong bipo yet.” (Revelesen 12:9) Em i tok, God i giamanim Iv na pasim em long kisim sampela save em i mas kisim. (Jenesis 3:1-5) Em i mekim tok giaman na em i kamap ensel nogut. Na em i kamap birua bilong God, olsem Seten. Yumi no ken tingim Seten em i gat kom na em i holim fok na em i save givim pen long ol daiman long ples paia. Nogat. Em i wanpela strongpela ensel. Tasol em i ensel nogut.

AS BILONG OL HEVI BILONG GRAUN

13. (a) Iv i harim tok giaman bilong Seten na em i mekim wanem? (b) Seten i tok em inap mekim wanem?

¹³ Tok giaman Seten i mekim long Iv i kamapim laik bilong Seten. Iv i bilipim dispela tok na em i sakim tok bilong God. Na em i pulim man bilong em tu long brukim lo bilong God. (Jenesis 3:6) Seten i tok olsem: Ol man inap bosim wokabaut bilong ol yet, maski God. Na em i tok: Em inap mekim olgeta pikinini bilong Adam na Iv i lusim God.

14. Bilong wanem God i no pinisim Seten wantu tasol?

¹⁴ Tru, God inap pinisim Seten wantu tasol. Tasol sapos em i mekim olsem, bai em i no stretim ol dispela bikpela tok Seten i bin kamapim. Ol ensel i lukluk i stap na ol inap tingim ol dispela tok. Olsem na God i makim hap taim bilong Seten na em i ken wok long truim ol tok em i bin mekim. Na wanem samting i kamap?

15, 16. (a) Bikpela hap taim i lus pinis na olsem wanem long ol tok bilong Seten? (b) Wanem samting liklik taim bai kamap?

¹⁵ Bikpela hap taim i lus pinis na nau yumi save, ol man i no inap bosim ol yet. God i mas bosim ol. Ol wok ol i bin mekim bilong bosim ol yet i no kamap gutpela liklik. Ol gavman ol i bin kamapim na Seten i bosim, ol dispela gavman i putim hevi long ol man. God i givim hap taim long ol na insait long dispela hap taim sampela manmeri ol i bin i stap gut long God. Olsem na yumi save, Seten i no inap pulim olgeta manmeri na ol i lusim God. Baibel i stori long Seten i laik pundaunim Jop, tasol Jop i stap gut long God.—Jop 1:6-12.

¹⁶ Olsem na Seten i giaman tasol. I stret em i mas bagarap, long wanem em i kirapim pasin nogut bilong bikhet long God. Nau God i laik pinisim wok bilong Seten long bosim graun. Baibel i stori long bikpela pait i kamap long heven, em namba wan samting God i mekim bilong pinisim wok bos bilong Seten. Tasol ol manmeri bilong graun i no inap lukim dispela pait. Kaunim gut stori bilong en long Baibel, olsem:

17. (a) Baibel i stori olsem wanem long pait i kamap long heven? (b) Dispela pait i mekim wanem long ol ensel bilong heven na ol manmeri i stap long graun?

¹⁷ “Bikpela pait i kirap long heven. Maikel [em Krais Jisas] wantaim ol ensel bilong en ol i pait wantaim bikpela snek. Na . . . ol i tromoi dispela snek i go daun. Em i dispela snek bilong bipo yet, na ol i kolim em Seten na ‘Man I Save Kotim olgeta Man.’ Em i man bilong giamanim olgeta manmeri bilong graun. Ol i tromoi em i go daun long graun, na ol i tromoi ol ensel bilong en ol i go daun wantaim em. Olsem na yu heven, na yupela olgeta i stap long heven, yupela i ken amamas! Tasol yu graun, na yu solwara, yupela lukaut! Bikpela hevi i laik kamap long yupela! Seten i go daun pinis long yupela, na em i gat bikpela belhat tru. Em i save, em i gat sotpela taim tasol.”—Revelesen 12:7-9, 12.

18. (a) Dispela pait long heven i kamap long wanem taim? (b) Ol i “tromoi” Seten i go daun na wanem samting i kamap long graun bihain long dispela taim na inap long nau?

¹⁸ Wanem taim dispela pait i kamap long heven? Planti samting i bin kamap na yumi inap save, dispela pait i kamap taim Namba Wan Bikpela Pait bilong graun i kirap long 1914. Olsem Baibel i tok, long dispela taim ol i rausim Seten long heven, na nau yumi stap long “sotpela taim” bilong Seten. Yumi stap long “las taim” bilong dispela pasin Seten i bin kamapim long graun. Pasin nogut i go bikpela, ol man i pret, i gat pait, hangre, sik na ol narapela hevi tu, olsem na yumi save yumi stap long “las taim.”—Matyu 24:3-12; Luk 21:26; 2 Timoti 3:1-5.

19. (a) Seten i wok strong long mekim wanem? (b) Gutpela sapos yumi mekim wanem?

¹⁹ Seten i save “sotpela taim” bilong em i laik pinis nau, olsem na em i wok strong moa long pasim ol man bambai ol i no ken mekim wok bilong God. Em i laik pulim planti man i go bagarap wantaim em. Olsem na Baibel i tok Seten em i olsem wanpela laion i laik kaikaim ol man. (1 Pita 5:8, 9) Sapos yumi no laik bai Seten i holimpas yumi, yumi mas save long ol pasin em i save mekim bilong giamanim ol manmeri na pulim ol i go long rot nogut.—2 Korin 2:11.

ROT BILONG SETEN LONG GIAMANIM OL MAN

20. (a) Seten i giamanim pinis sampela man o nogat? (b) Olsem wanem na yumi ken save, sampela samting Seten i mekim bai yumi ting em i gutpela samting bilong helpim yumi?

²⁰ Sampela taim Seten i wok hait na em i pulim ol man long bihainim em. Em i save tru long giamanim ol man. Inap planti tausen yia pinis em i mekim na nau planti man i ting em i no i stap. Ol i ting pasin nogut em pasin bilong graun tasol na i no ken pinis. Seten i giamanim ol man olsem sampela man nogut long nau i save mekim. Long skin ol i olsem gutpela man, tasol long pasin hait ol i mekim kain kain pasin nogut. Baibel i tok: “Seten yet i save senisim pasin bilong en na long skin tasol em i kamap olsem ensel bilong lait.” (2 Korin 11:14) Olsem na planti pasin giaman Seten i mekim i olsem i gutpela na i bilong helpim man.

21. Kolim wanpela pasin bilong Seten bilong giamanim ol man.

²¹ Bipo Seten i giamanim Iv olsem na Iv i ting Seten i laik helpim em. Tasol Seten i pulim em i go long rot nogut. (Jenesis 3:4-6) Seten i mekim wankain pasin long nau tu. Long rot bilong ol boi bilong em long graun em i giamanim ol manmeri na ol i tingim gavman bilong ol em i bikpela samting na ol i no tingim wok bilong God ol i mas mekim. Dispela samting i kirapim ol long litimapim ples bilong ol yet na biruaim ol narapela ples, na planti pait nogut i bin kamap. Na Seten i bin kirapim ol man long tingim kain kain samting bilong kamapim gutaim long graun, olsem Yunaitet Nesen samting. Tasol gutaim i no kamap, a? Na ol dispela samting i pulim tingting bilong ol man na ol i no tingim kingdom bilong God em rot tru bilong kamapim gutaim.—Aisaia 9:6; Matyu 6:9, 10.

22. Seten i no laik bai yumi kisim wanem kain save?

²² Sapos yumi laik i stap oltaim, yumi mas kisim stretpela save long God na Pikinini bilong em na kingdom bilong em. (Jon 17:3) Tasol Seten i no laik bai yu kisim dispela save. Em i wok strong long pasim yu long kisim. Em i mekim wanem? Ating bai em i kirapim ol man long birua long yu. Ating bai ol i tok bilas long yu. Baibel i tok: “olgeta man i laik pas wantaim Krais Jisas na i bihainim pasin bilong God, bai ol birua i mekim nogut long ol.”—2 Timoti 3:12.

23. (a) Ating Seten bai mekim wok olsem wanem long ol wantok o wanblut bilong yumi bilong pundaunim yumi? (b) Maski ol man i birua long yu, tasol bilong wanem yu mas sanap strong?

²³ Sampela wantok o wanblut bilong yu, ating bai ol i tokim yu, ol i no laik bai yu lainim tok bilong Baibel. Jisas i toksave, olsem: “Ol wanhaus tasol bilong man bai ol i stap birua bilong en. Man i laikim papa o mama bilong en tasol i no laikim mi moa yet, em i no inap i stap pren bilong mi.” (Matyu 10:36, 37) Ating bai sampela wanblut i laik pasim yu long lainim Baibel, long wanem ol i no save long gutpela tok i tru i stap long Baibel. Tasol sapos yu pret na lusim dispela gutpela tok, bai God i ting olsem wanem long yu? Na sapos yu lusim, olsem wanem bai yu inap helpim ol dispela wantok na wanblut bilong yu long kisim stretpela save na kisim laip? Sapos yu holimpas ol gutpela tok bilong Baibel yu lainim pinis, ating bai yu inap helpim ol tu long kisim save long tok i tru.

24. (a) Wanem sampela narapela samting Seten i mekim bilong pasim ol manmeri long kisim dispela save em inap helpim ol long kisim laip? (b) Lainim tok bilong God long Baibel, em bikpela samting olsem wanem?

²⁴ O ating bai Seten i wok long pulim yu long mekim wanpela pasin i no stret, pasin God i no laikim. (1 Korin 6:9-11) O ating bai em i kirapim yu long ting yu gat planti wok tumas na yu no gat taim bilong lainim tok bilong Baibel. Tasol yu tingim: I gat narapela bikpela wok i winim wok bilong kisim dispela kain save? Yu no ken larim wanpela samting i pasim yu long kisim dispela save em inap helpim yu long i stap oltaim long paradais long graun!

25. Sapos yumi wok long sakim Seten, bai em i no inap mekim wanem long yumi?

²⁵ Baibel i tok: “Yupela i mas sakim Seten.” Sapos yu mekim olsem, ‘bai em i lusim yu na ranawe.’ (Jems 4:7) Tasol sapos yu wok long sakim Seten, yu ting bai em i lusim yu olgeta? Nogat. Planti taim bai em i wok long pulim yu long bihainim laik bilong em. Tasol sapos yu wok long sakim em, bai em i no inap kirapim yu long bikhet long God. Olsem na yu mas wok strong long kisim save long ol tok bilong Baibel na bihainim ol dispela tok. Em bikpela samting. Olsem bai Seten i no ken giamanim yu, na bai em i no inap giamanim yu long rot bilong lotu giaman tu.

[Piksa long pes 16, 17]

Sapos ol dispela gavman bilong graun ol i no bilong Seten, bai Seten i no inap tok long givim long Krais, a?

[Piksa long pes 19]

Dispela man i no wanpela stilman taim mama i karim em, na olsem tasol Seten i no wanpela “seten” taim God i wokim em

[Piksa long pes 20, 21]

Pait i kamap long heven na ol i tromoi Seten wantaim ol spirit nogut i kam daun long graun. Olsem na hevi i painim yumi long nau

[Piksa long pes 24]

Taim yu lainim tok bilong Baibel, ating bai sampela i laik pasim yu