Holim
Sampela Tok Yu Ken Mekim Bilong Tilim Ol Buk na Nius
Mekim wok long ol dispela tok i stap daunbilo bilong helpim yu long redim ol tok yu laik mekim bilong tilim ol buk na nius long olgeta wan wan mun.
God i Laik Yumi Mas Mekim Wanem?
“Yu ting God i laik yumi man i mas karim ol hevi kain olsem i save painim yumi long nau? [Larim man i bekim. Orait ritim Matyu 6:10.] Sampela taim yu save tingting, Kingdom Bilong God i wanem samting tru?” Opim buklet long stadi 6, na ritim ol askim i stap long kirap bilong stadi. Yu ken kirap stori long dispela stadi o stretim rot bilong mekim olsem taim yu go bek lukim em.
“Maski ol saveman i wokim kain kain marasin samting, tasol sik na indai i wok long givim bikpela bel hevi na pen long ol man. Yu save long samting Jisas bai mekim long ol sikman, ol lapun, na ol man i dai pinis?” Larim man i bekim tok. Sapos man bilong haus i laik save long bekim bilong askim, orait opim buklet long stadi 5, na ritim ol askim bilong paragraf 5-6. Yu ken stori long dispela tupela paragraf o stretim rot bilong mekim olsem taim yu go bek lukim em.
Go Klostu Long Jehova
“Planti manmeri i bilip long God ol i laik go klostu long em. Yu save olsem God i singautim yumi long i go klostu long em? [Ritim Jems 4:8.] Ol i wokim dispela buk bilong helpim ol manmeri long yusim Baibel bilong ol yet long i go klostu long God.” Ritim paragraf 1 long pes 16.
“Long nau planti pasin i no stret i stap. Olsem dispela skripsa hia i tok. [Ritim Saveman 8:9b.] Planti i laik save olsem God i save tingim yumi o nogat. [Ritim tupela namba wan sentens long paragraf 4 long pes 119.] Dispela sapta i stori long as na God i larim pasin i no stret i stap inap sampela haptaim.”
Kamapim Tok Hait—Bikpela Samting Bilong En i Laik Kamap!
“Ating yu bin harim stori bilong [stori long wanpela samting i kamap long nius]. Taim ol man i dai wantu tasol, planti man i save tingting planti long olsem wanem yumi ken mekim gut bel bilong famili bilong man i dai pinis. Yu gat wanem tingting long dispela?” Larim man i bekim tok. Orait opim buk long pes 299, na soim em piksa bilong kirap bek. Yu ken tok moa: “Planti man i kirap nogut long kisim save olsem ol stretpela man na ol man nogut wantaim bai kirap bek long Paradais long graun. [Ritim Aposel 24:15 olsem i stap long paragraf 9 long pes 297, na kamapim insait bilong dispela tok olsem i stap long paragraf 10.] Dispela buk i stori long planti narapela gutpela samting God bai mekim long bihain.”
Kisim Skul Long Bikpela Tisa
“Yu ting graun bai i gutpela ples sapos ol man i bihainim dispela tok? [Ritim Matyu 7:12a. Larim man i bekim tok.] Dispela buk i kamapim planti stori bilong nambawan bikpela tisa i bin i stap long graun.” Stori long ol piksa na ol liklik tok i stap aninit long ol piksa long sapta 17.
“Planti papamama long nau ol i save traim long skulim ol pikinini bilong ol long ol gutpela pasin. Yu ting dispela samting i bikpela samting? [Larim man i bekim tok. Orait ritim Sindaun 22:6.] Lukim Baibel i kirapim ol papamama long kirap skulim ol pikinini bilong ol taim ol i liklik yet. Ol i wokim dispela buk bilong helpim ol papamama long mekim olsem.” Stori long ol piksa na ol liklik tok i stap aninit long ol piksa long sapta 15 o 18.
“Planti taim ol papamama i save kirap nogut long ol askim ol pikinini i kamapim. Sampela bilong ol dispela askim i hatwok long bekim, a? [Larim man i bekim tok. Orait ritim Efesus 6:4.] Dispela buk i ken helpim ol papamama long bekim ol askim bilong ol pikinini bilong ol long nau.” Stori long sampela piksa na ol liklik tok i stap aninit long ol piksa long sapta 11 na 12 o 34 i go 36.
Lotuim Dispela Wanpela God Tru
“Yu ting yumi inap kisim helpim long husat bilong karim ol hevi long sindaun bilong yumi? [Larim man i bekim tok. Orait ritim Rom 15:4.] Lukim Baibel i kamapim tok bilong skulim, strongim bel bilong yumi na wetim gutpela samting long bihain, em ol dispela samting bai strongim yumi long karim ol hevi. Dispela buk i kamapim ol gutpela tok long olsem wanem pasin bilong ritim Baibel inap helpim yumi.” Stori long 4-pela tok i stap long pes 30.
“Kirap long taim Jisas i stap long graun, planti man i bin beten long Kingdom Bilong God i mas i kam. Sampela taim yu save tingting olsem taim dispela Kingdom i kam em bai mekim wanem long ol man? [Larim man i bekim tok. Orait ritim Daniel 2:44.] Dispela buk i stori long Kingdom Bilong God em i wanem samting na em bai mekim wanem samting, na olsem wanem yumi inap kisim helpim long dispela stretpela gavman.” Stori long piksa i stap long pes 92-3.
Nambawan Man Tru i Winim Olgeta Narapela Man
“Long dispela taim planti manmeri i tingim Jisas. Tasol planti hevi i kamap long olgeta hap bilong graun, olsem na sampela man i laik save, tru Jisas i save tingim yumi o nogat. Yu gat wanem tingting long dispela samting?” Larim man i bekim tok. Opim buk long sapta 24, na stori liklik long as na Jisas i kam daun long graun. Orait ritim Jon 15:13, na kamapim klia olsem Jisas i laikim ol narapela man.
“Taim wanpela i kolim nem bilong Jisas Krais, planti man i save tingim em olsem wanpela bebi o wanpela man i karim pen na i laik dai. Ol i tingim taim mama i karim em na dai bilong em na em tasol. Ol i no save tingim ol gutpela samting em i toktok long en na ol gutpela samting em i bin mekim taim em i stap long graun. Tasol ol samting em i bin mekim i helpim olgeta man bilong nau na bilong bipo tu. Olsem na em i bikpela samting long yumi mas kisim save long ol dispela gutpela samting em i bin mekim bilong helpim yumi.” Ritim Jon 17:3. Opim buk long namba wan pes long hap bilong tok i go pas, na ritim namba 4 paragraf.
Save i Bringim Man Long Laip Oltaim
“Sapos wanpela i singautim yu long i go i stap long kain gutpela ples olsem dispela, bai yu tok orait long go o nogat? [Soim piksa long pes 4-5, na larim man i bekim.] Tingim tok Baibel i mekim long ol samting man i mas mekim bilong kisim kain laip olsem inap oltaim oltaim. [Ritim Jon 17:3.] Dispela buk bai helpim yu long kisim save i bringim yu long laip oltaim.” Stretim rot bilong stori long paragraf 1-5 bilong sapta 1 long taim yu go bek lukim em.
Opim buk i go long pes 188-9, na mekim wok long tok i stap aninit long piksa na askim man bilong haus: “Yu laik i stap long Paradais long taim olgeta man long graun i save tru long God? [Larim man i bekim tok. Orait ritim Aisaia 11:9.] Dispela buk bai helpim yu long lain long tok Baibel i mekim long Paradais na olsem wanem yumi ken insait long en.” Stretim rot bilong stori long paragraf 11-16 bilong sapta 1 taim yu go bek lukim em.
Was i Stap!
“Planti manmeri ol i kirap nogut long ol bikpela hevi na ol samting nogut tru i save kamap long olgeta hap long nau. [Stori long wanpela hevi olsem i bin kamap long hap bilong yu na ol man i save long en.] Yu save ol kain samting olsem em hap bilong wanpela mak i wok long kamap long olgeta hap na i soim olsem klostu nau gavman bilong God bai bosim olgeta samting bilong dispela graun? [Larim man i bekim tok. Orait ritim wanpela skripsa i stret long man bilong haus olsem, Matyu 24:3, 7, 8; Luk 21:7, 10, 11; 2 Timoti 3:1-5.] Dispela buklet i stori long as na em i bikpela samting long yumi mas tingim ol dispela samting i wok long kamap long taim bilong yumi.”
“Planti man i bel hevi long ol samting nogut i kamap long nau o taim wanpela long famili i dai. Sampela i laik save bilong wanem God i no save mekim sampela samting na bai kain samting olsem i no ken kamap. Baibel i tokim yumi olsem klostu nau God bai mekim ol samting bilong pinisim pen na hevi bilong ol man. [Ritim Kamapim Tok Hait 14:6, 7.] Lukim wanem samting kot bilong God bai mekim long ol man. [Ritim 2 Pita 3:10, 13.] Dispela buklet i kamapim planti tok moa long dispela bikpela samting.”