(1) Askim, (2) Skripsa, na (3) Sapta
Wanpela rot i no hatwok long bihainim bilong tilim buk Tru Tru Baibel i Tok Wanem? i olsem: (1) givim askim bilong kirapim man long kamapim tingting bilong em, (2) ritim wanpela skripsa i stret long samting yu stori long en, na (3) mekim wok long wanpela sapta i stret long toktok yu kamapim na ritim ol askim i stap long kirap bilong sapta. Sapos man bilong haus i laikim tok yu bin kamapim, orait ating yu inap kamapim ol tok bilong ol paragraf long kirap bilong sapta bilong soim em pasin bilong stadi long Baibel. Yu ken mekim olsem long namba wan taim yu bungim man o taim yu mekim gobek.
◼ “Yu ting yumi ol man nating inap save gut long Man Bilong Wokim yumi, olsem dispela skripsa hia long Baibel i tok?” Ritim Aposel 17:26, 27 na larim man i bekim tok. Orait nau mekim wok long sapta 1.
◼ “Long nau yumi bungim planti hevi, olsem na yu ting yumi gat rot long strongim bel na wetim God i kisim bek yumi olsem dispela skripsa i stori long en?” Ritim Rom 15:4, na larim man i bekim tok. Orait nau mekim wok long sapta 2.
◼ “Mi save olsem yu no gat strong long mekim, tasol sapos yu gat strong long kamapim ol samting dispela skripsa hia i stori long en bai yu mekim, a?” Ritim Kamapim Tok Hait 21:4, na larim man i bekim tok. Orait nau mekim wok long sapta 3.
◼ “Olsem wanem? Yu ting ol samting dispela song i kamapim bai painim ol pikinini bilong yumi?” Ritim Song 37:10, 11, na larim man i bekim tok. Orait nau mekim wok long sapta 3.
◼ “Yu ting i gat wanpela taim bihain bai kamap na ol dispela tok hia bai kamap tru?” Ritim Aisaia 33:24, na larim man i bekim tok. Orait nau mekim wok long sapta 3.
◼ “Olsem wanem? Yu ting ol man i dai pinis ol i save long ol samting ol man i stap laip ol i mekim?” Larim man i bekim tok. Orait nau ritim Saveman 9:4, 5, na mekim wok long sapta 6.
◼ “Yu ting wanpela taim bai kamap na yumi inap lukim gen ol famili bilong yumi i dai pinis, olsem Jisas i tok long ol dispela ves?” Ritim Jon 5:28, 29, na larim man i bekim tok. Orait nau mekim wok long sapta 7.
◼ “Wanem samting i mas kamap na ol man bai bihainim laik bilong God long graun olsem ol ensel i save bihainim long heven olsem dispela beten i stori long en?” Ritim Matyu 6:9, 10, na larim man i bekim tok. Orait nau mekim wok long sapta 8.
◼ “Yu ting yumi stap long dispela taim em dispela tok profet i stori long en?” Ritim 2 Timoti 3:1-4, na larim man i bekim tok. Orait nau mekim wok long sapta 9.
◼ “Planti manmeri i laik save wai na ol hevi i wok long i go bikpela tru. Yu ting tok bilong dispela skripsa i kamapim as bilong dispela samting?” Ritim Kamapim Tok Hait 12:9, na larim man i bekim tok. Orait nau mekim wok long sapta 10.
◼ “Yu gat laik long save long bekim bilong kain askim olsem?” Ritim Jop 21:7, na larim man i bekim tok. Orait nau mekim wok long sapta 11.
◼ “Yu ting sapos ol man i bihainim dispela gutpela tok bilong Baibel, dispela bai helpim famili bilong ol long i stap amamas?” Ritim Efesus 5:33, na larim man i bekim tok. Orait nau mekim wok long sapta 14.
Taim yu soim man pinis long pasin bilong mekim stadi, orait taim yu mekim stadi wantaim em tupela taim moa, na i luk olsem em bai mekim yet, orait nau yu ken kaunim long ripot bilong autim tok olsem wanpela Baibel stadi.