Tilim Kingdom Nius Long Olgeta Hap
1 Long Sande, Epril 23, wanpela bikpela pablik-tok bai kamap, “Klostu Nau Ol Lotu Giaman Bai Pinis.” Taim miting i pinis, brata bai kamapim wanpela pepa Kingdom Nius i gat 4-pela pes long en. Tok bilong en i stret long taim bilong yumi, na insait long 3-pela wik, kirap long Epril 24 i go Me 14, bai ol Witnes i tilim dispela pepa long olgeta hap bilong graun.
2 Ol man long olgeta hap ol i save tingting planti. Maski ol i stap we, planti hevi i save painim ol. Ol man i save tingting planti long ol samting i kamap long graun, ol bai laikim dispela Kingdom Nius, long wanem, dispela bai helpim ol long save, Baibel em wanpela gutpela buk tru bilong soim rot long ol. (Sng 119:105) Yumi olgeta i wet long kisim dispela Kingdom Nius long Epril 23. Tasol pastaim i gat planti samting yumi mas mekim na bai yumi ken redi long dispela bikpela wok bilong 3-pela wik.
3 Kirapim Olgeta Long Mekim Bikpela Wok: Husat inap insait long dispela wok? Olgeta pablisa bai amamas long mekim olsem! Olsem wanem long ol Baibel-stadi i save go long ol miting? Sampela i bin bung wantaim yumi inap longtaim liklik na ol i wok long kamap strong. Sapos pasin bilong ol i stret wantaim ol lo bilong Jehova, yu ting ol inapim mak bilong kamap pablisa? Pablisa i ken toktok wantaim Baibel-stadi bilong em long dispela samting, na sapos em i laik insait long wok autim tok, tupela elda i ken toktok wantaim em long ol tok i stap long pes 98 na 99 bilong buk Lo. Ol i mas mekim kwiktaim na bai ol Baibel-stadi, em ol inapim mak bilong kamap pablisa i no baptais yet, ol i ken insait tru long dispela wok. Sapos Baibel-stadi i no inapim yet mak, kirapim em long givim dispela Kingdom Nius long ol pren na famili bilong em.—Lukim Wastaua, Me 1, 1989, pes 18, paragraf 8.
4 Dispela wok i no hatwok tumas; olgeta i ken insait long en. Long taim bilong famili-stadi, mekim traim long pasin bilong tilim dispela pepa na bai olgeta long famili i ken redi gut long tilim. No ken mekim planti tok tumas—mekim sotpela kirap bilong tok, na nau tilim Kingdom Nius long man bilong haus, na kirapim em long kaunim. Sapos man i amamas long harim tok, raitim long notbuk na bai yu ken go bek na helpim em long kisim sampela save moa. (1 Ko 3:6, 7) Rot bilong mekim gut dispela wok i olsem: Redim gut pastaim wanpela tok i no hatwok tumas long mekim.
5 Long mun Epril na Me, bai yumi “wok strong.” Bai mipela kamapim sampela tok moa long wanpela pepa insait long Wok Kingdom bilong Epril, nem bilong en, “Wok Strong Long Mekim Wok Bilong Bikpela.”—1 Ko 15:58.