Kisim Planti—Bekim Planti
1 Em gutpela samting tru yumi save long tok i tru! Yumi dediket pinis long Jehova, olsem na em i givim “wok bilong autim gutnius” long yumi. (1 Te 2:4) Yumi mas mekim bikpela wok. Jisas i tok: “Ol man i kisim planti samting, ol i mas bekim planti samting.”—Lu 12:48b.
2 Yumi olgeta i save long ol tok bilong Baibel, na yumi insait long wanpela gutpela lain brata, na yumi wetim gutpela samting i kamap bihain. Tru tumas, yumi bin kisim planti samting, olsem na i stret yumi bekim planti samting.
3 Holim Stretpela Tingting Long Ol Samting Yumi Mas Mekim: Sampela i ting yumi mas mekim bikpela wok tumas. Krais Jisas, Het bilong kongrigesen Kristen, em i makim ol samting kongrigesen i mas mekim na bai kongrigesen i ken mekim gut wok. (Ef 4:15, 16) Em i tok: “Samting mi givim yupela bilong karim, em i no hevi.” (Mt 11:28-30) Em i isi long man i no inap mekim planti wok. (Lu 21:1-4) Sapos yumi wok strong, maski yumi mekim planti wok o liklik wok, God bai blesim yumi.—Kl 3:23, 24.
4 Askim yu yet, ‘Ol samting bilong Kingdom i stap nambawan samting long i stap bilong mi? Mi mekim wok long taim na long ol narapela samting bilong mi na bai mi ken litimapim nem bilong God na helpim ol narapela? Mi kisim bikpela amamas long mekim wok bilong Jehova, winim amamas mi inap kisim long ol gutpela samting bilong skin?’ Bekim bilong yumi i kamapim klia wanem samting i kirapim bel bilong yumi long mekim wok.—Lu 6:45.
5 Klia Long Samting Bilong Pulim Yumi Long Mekim Pasin Nogut: Long nau, winim olgeta taim bipo, i gat planti samting i laik pulim yumi long tingim yumi yet tasol, na mangal, na laikim ol samting i gat pasin sem. Long olgeta de i gat sampela samting i laik pulim yumi long mekim pasin i no stret. Bilong winim ol dispela traim, yumi mas askim Jehova long helpim yumi. (Mt 26:41) Long rot bilong spirit bilong em, em inap strongim yumi. (Ais 40:29) Pasin bilong kaunim Tok Bilong God long olgeta de inap helpim gut yumi. (Sng 1:2, 3) Pasin bilong stretim yumi yet na bosim gut skin, dispela tu inap helpim yumi.—1 Ko 9:27.
6 Yumi mas laikim gutpela pasin, tasol yumi mas nolaik tru long pasin nogut. (Sng 97:10) Olsem na nogut yumi kirap laikim ol samting nogut na bel bilong yumi i skrap long ol dispela samting. Sindaun 6:16-19 i kolim 7-pela samting Jehova i nolaik tru long en. Sapos yumi laik bai Jehova i ken laikim yumi, yumi mas nolaik tru long ol dispela samting tu. Yumi mas mekim ol samting i stret wantaim stretpela save yumi kisim pinis, na yumi mas tingim ol gutpela samting tasol.
7 I stret yumi beten na bai oltaim yumi inap “wok strong long mekim wok bilong Bikpela.” (1 Ko 15:58) Planti ol i save, taim ol i mekim planti wok bilong Jehova, dispela i lukautim ol, long wanem, ol i no gat bikpela hap taim long mekim ol samting i no inap helpim tru ol.
8 Olsem na ol samting Jehova i tokim yumi long mekim, em samting yumi inap mekim. (Mai 6:8) I gat as na yumi mas tenkyu long olgeta wan wan wok yumi kisim. (Ef 5:20) Olsem na yumi “save mekim hatwok tru,” na yumi bilip, pe yumi kisim bai winim olgeta samting yumi mas mekim.—1 Ti 4:10.