Helpim Ol Man Long Lotuim God

“Tasol, . . . sapos wanpela man i no bilip, o i no save gut, em i kam insait, . . . Olgeta tok i hait i stap long bel bilong em, dispela bai i kamap ples klia. Na bai em i lindaun long pes bilong en na i litimapim nem bilong God.”−1 KORIN 14:​24, 25.

1-3. Wanem samting i helpim planti Korin long kamap gutpela long ai bilong God na em i orait long ol?

TAIM aposel Pol i mekim namba tu raun bilong em long wok misineri, em i stap long taun Korin inap wan yia na 6 mun. Em i “telimautim tok long olgeta de. Em i autim tok strong.” Na wanem samting i kamap? “Planti Korin ol i harim tok bilong Pol, na ol i bilip na kisim baptais.” (Aposel 18:​5-11) God i mekim ol i kamap “holi, na i makim [ol] bilong em yet.”−1 Korin 1:2.

₂ Bihain Apolos i go long Korin. Pastaim Prisila na Akwila i bin helpim em na “soim Rot bilong God stret moa long em.” Ol i helpim em long kisim stretpela save long baptais tu. Olsem na em i kamap Kristen na God i belgut long em o orait long em. (Aposel 18:​24–19:7) Na Apolos i helpim ol Korin, em bipo ol i bihainim “ol god giaman i no gat toktok.” (1 Korin 12:2) Ating em i save go long haus bilong ol dispela manmeri na lainim ol long ol tok bilong Baibel; na taim ol i go long ol miting bilong ol Kristen ol inap lain na kisim save.−Aposel 20:20; 1 Korin 14:​22-24.

₃ Long dispela rot ol dispela manmeri, bipo ol “i no bilip, o i no save gut,” ol i kisim save na dispela i pulim ol long lotuim trupela God. Taim ol Kristen i lukim ol dispela man na meri i wok long kamap strong na ol i kisim baptais bai God i ken orait long ol, ol Kristen i amamas tru! Long nau tu yumi save amamas taim nupela man o meri i kamap strong na kisim baptais.

Helpim Ol Man “i No Bilip, o i No Save Gut”

4. Wanem ol samting long nau i helpim planti manmeri olsem i bin helpim ol Korin long bipo?

₄ Ol Witnes Bilong Jehova long nau tu ol i bihainim tok bilong Jisas na ol i “go mekim olgeta lain manmeri i kamap disaipel na baptaisim ol. (Matyu 28:​19, 20) Ol i planim ‘pikinini bilong kaikai,’ em tok i tru, long bel bilong ol man i laik harim tok, na bihain ol i go bek na ‘putim wara.’ (1 Korin 3:​5-9; Matyu 13:​19, 23) Ol Witnes i save tokim ol man long stadi, na sapos man i laik, orait long olgeta wik ol i save go lukim em na lainim em long ol tok i tru bilong Baibel na bekim ol askim bilong em, na ol i no singaut long pe. Na ol i save singautim ol dispela kain man i kam long ol miting bilong ol, olsem ol man “i no bilip” i bin i go long ol miting long Korin long bipo. Tasol ol Witnes Bilong Jehova i mas ting olsem wanem long ol dispela manmeri i save stadi na kam long ol miting?

5. I gat wanem tok long Baibel na yumi ken save, yumi mas was gut long sampela man?

₅ Yumi amamas long lukim ol dispela manmeri i kam long God. Tasol yumi mas save, ol i no kamap bilipman yet; ol i no kisim baptais yet; Yumi mas tingim tupela samting yumi bin lain long en long tok i kamap paslain long dispela, olsem: (1) Ol Isrel i save was gut long ol man bilong narapela lain ol i kam sindaun long hap bilong ol na i save bihainim sampela lo bilong ol, tasol ol i no kisim lotu bilong ol Isrel na katim skin na kamap brata bilong ol; (2) Ol Kristen long Korin i gat wok long helpim ol man “i no bilip, o i no save gut,” ol dispela Kristen i save was gut, long wanem ol i tingim tok bilong Pol, em i tok: “Yupela i no ken wokabaut wantaim ol [man i no bilip] na helpim ol long pasin bilong ol. Nogat. Olsem wanem stretpela pasin na pasin bilong sakim lo tupela i ken pren wantaim?”−2 Korin 6:14.

6. Long ol miting, wanem samting inap “kotim” ol man “i no bilip”? Em kot tru o olsem wanem?

₆ Olsem na ol man “i no bilip, o i no save gut” em yumi save amamas long ol i kam long ol miting, tasol yumi save, pasin bilong ol i no stret yet wantaim ol lo bilong God. Ating ol tok ol i kisim save long en bai “sutim bel” bilong ol na “kotim” ol, olsem 1 Korin 14:​24, 25 i tok. Ol i no kot tru; i no olsem ol i mas kot long wanpela komiti bilong kongrigesen. Nogat. Long wanem ol i no baptais yet na ol i no insait tru long kongrigesen. Tasol ol tok ol i kisim save long en, dispela i sutim bel bilong ol na ol i save God i tambuim olgeta pasin bilong tingim skin bilong yumi yet tasol na pasin pamuk samting.

7. Planti Baibel-stadi bai mekim wanem samting moa? Wanem samting i kirapim ol na ol i laik mekim?

₇ Ol dispela man i no baptais na ol i go long ol miting bilong kisim save, ating bihain planti ol i no laik mekim dispela samting tasol; ol i laik i go moa. Jisas i mekim sampela tok i kamapim as bilong dispela laik bilong ol, em i tok: “Skulboi em i no winim tisa bilong en. Em i skul pinis pastaim, orait em i wankain olsem tisa bilong en.” (Luk 6:40) Man i stadi em i lukim tisa bilong em i tingim wok bilong autim tok i bikpela samting na em i amamas long autim tok. (Matyu 24:14) Olsem na dispela man i bin stadi na lainim ol tok i tru bilong Baibel na go long ol miting, bilip bilong em i wok long kamap strong na ating em i tingim gut dispela tok, olsem: “Man i wokabaut long ol maunten na bringim gutpela tok, lek bilong em i gutpela tru, em dispela man i autim tok bilong pasin sekan, na em i bringim gutpela tok bilong samting i gutpela moa, na em i autim tok bilong rot bilong kisim bek ol man.” (Aisaia 52:​7, NW; Rom 10:​13-15) Man i stadi na i no baptais yet, ating em i laik kamap wanpela pablisa, olsem wanpela man bilong autim gutpela tok bilong Kingdom, na em i laik insait long lain Witnes Bilong Jehova.

8, 9. (a) Taim wanpela Baibel-stadi i laik kirap long autim tok, tisa bilong em i mas mekim wanem? (b) Taim tupela elda i bung wantaim man i laik autim tok na tisa bilong em, tupela bai mekim wanem? (c) Nau nupela pablisa i gat wanem wok?

₈ Taim Witnes i save Baibel-stadi bilong em i laik autim tok, em i ken toktok wantaim wasman siaman, na wasman siaman bai makim tupela elda bilong bung wantaim dispela Witnes na Baibel-stadi bilong em. Ol elda i amamas taim nupela man i laik kirap mekim wok bilong God. Ol i save, em i no gat bikpela save yet olsem bilong ol man i baptais pinis, em ol i stap longtaim liklik long tok i tru na ol i gat bikpela wok moa long bihainim ol lo bilong God. Tasol ol elda i laik save pastaim, dispela nupela man i gat sampela save long ol tok i tru bilong Baibel na em i bin stretim pasin bilong em bambai em i ken bihainim ol lo bilong God, o nogat. Olsem na i gat tupela gutpela as na ol elda i mas bung wantaim dispela man i laik insait long wok bilong autim tok na Witnes i save stadi wantaim em.a

₉ Dispela tupela elda i ken tokim dispela Baibel-stadi, taim em inapim mak na em i kirap long autim tok, em i ken raitim ripot bilong wok autim tok em i mekim, na bai ol i raitim nem bilong em long wanpela Kat Ripot Bilong Pablisa. Dispela bai makim olsem em i laik wok wantaim lain o oganaisesen bilong ol Witnes Bilong Jehova, em lo bilong God i bosim ol, na em i laik bihainim tok bilong dispela oganaisesen. (Dispela i stret tu long olgeta narapela man na meri i putim ripot.) Tupela elda hia i ken toktok wantaim dispela man long ol tok bilong Baibel, olsem buk Lo Bilong Yumi Bilong Mekim Wok Autim Tokb i kamapim long pes 98 na 99. Olsem na em taim stret bilong dispela Baibel-stadi i ken kisim wanpela buk Lo Bilong Yumi bilong em yet.

10. (a) Pablisa i no baptais em i mas mekim wanem na bai em i wok yet long kamap strong? Em i mas wok long kamap wanem samting? (b) Bipo, taim man i no baptais yet na em i kirap long autim tok, yumi save kolim em olsem man em kongrigesen i orait long em, tasol nau yumi senisim dispela tok na kolim olsem wanem? (Lukim namba 3 tok antap hia i gat liklik rait bilong en.)

₁₀ Sapos man i no baptais yet, tasol em inapim mak na em i kirap long autim tok, dispela man i wok long kamap wanpela man ‘God i belgut long em.’c (Luk 2:14) Em i no dediket na baptais yet, tasol nau em i ken putim ripot bilong wok autim tok em i mekim, na bai ol i bungim wantaim ripot bilong ol narapela milion manmeri long olgeta hap bilong graun, em ol i “telimautim tok bilong God.” (Aposel 13:5; 17:3; 26:​22, 23) Ol i ken tokaut long kongrigesen olsem em i wanpela nupela pablisa i no baptais yet. Em i mas wok yet long lainim ol tok bilong Baibel, na bekim tok samting long ol miting, na bihainim ol tok em i kisim save long en na autim long ol narapela man. Ating i no longtaim na bai em i laik kisim baptais, na long dispela rot bai God i orait long em na em i kisim ‘mak’ bilong abrusim bagarap.−Esikiel 9:​4-6.

Helpim Man i Mekim Rong

11. Kongrigesen i save mekim wanem long Kristen i baptais pinis na em i mekim rong?

₁₁ Long tok paslain long dispela, yumi bin stori long ol samting kongrigesen i ken mekim bilong helpim Kristen i baptais pinis na em i mekim bikpela rong. (Hibru 12:​9-13) Na yumi bin lukim ol tok bilong Baibel i makim olsem sapos Kristen i baptais pinis em i mekim bikpela rong na em i no tanim bel, orait ating kongrigesen i mas rausim em na bihain ol i no ken pren wantaim em o poromanim em. (1 Korin 5:​11-13; 2 Jon 9-11; 2 Tesalonaika 2:​11, 12) Tasol kongrigesen i mas mekim wanem sapos pablisa i no baptais em i popaia tru o mekim bikpela rong?

12. (a) Bilong wanem yumi mas mekim pasin marimari na helpim tu ol pablisa i no baptais yet na ol i mekim rong? (b) Taim yumi skelim asua bilong man i mekim rong, olsem wanem tok bilong Luk 12:48 inap givim tingting long yumi?

₁₂ Jut i stori long ol Kristen, em spirit holi i bin makim ol, na em i tok, sapos sampela i lusim bilip liklik o ol i bihainim sampela laik nogut bilong skin, tasol ol i tanim bel, orait yumi mas marimari long ol. (Jut 22, 23; lukim tu 2 Korin 7:10.) Sapos yumi mas marimari long ol dispela Kristen, orait i stret yumi mas marimari tu long man i no baptais yet na em i mekim rong, tasol em i tanim bel, a? (Aposel 3:19) Tru tumas, long wanem em i no strong long spirit olsem ol dispela narapela Kristen, na em i no gat save yet long olgeta pasin Kristen em i mas bihainim. Ating em i no kisim save yet long tingting bilong God long sampela samting. Na ol elda i no bin bung wantaim em na toktok long ol tok bilong Baibel olsem ol i save mekim long ol man i laik kisim baptais, na em i no bin kisim baptais long wara. Na tu Jisas i tok:“Ol man i kisim planti samting, ol i mas bekim planti samting gen.” (Luk 12:48) Ol man i baptais pinis ol i ‘mas bekim planti samting moa,’ long wanem ol i gat bikpela save moa na ol i bin kisim planti blesing moa, na sapos ol i mekim rong ol i gat bikpela asua moa long ai bilong God.−Jems 4:17; Luk 15:​1-7; 1 Korin 13:11.

13. Sapos wanpela pablisa i no baptais em i mekim rong, bai ol elda i mekim wanem bilong helpim em?

₁₃ Sapos wanpela pablisa i no baptais na em i mekim wanpela rong, ol elda i laik helpim em, olsem Pol i tok. (Lukim Galesia 6:1.) Ating lain elda i ken makim tupela elda (ating tupela i bin bung wantaim em long pastaim) na tupela i ken wok long stretim bek em sapos em i laik bai ol i helpim em. Ol i no laik mekim kot long em o krosim em. Nogat. Tupela i laik helpim em, olsem na ol i wok long stretim em long pasin marimari na pasin isi. (Sam 130:3) Planti taim, sapos ol i kamapim ol tok bilong Baibel na givim sampela gutpela tok long em, dispela inap long kirapim em long tanim bel na bihainim gen stretpela rot.

14, 15. (a) Ol i ken mekim wanem sapos dispela pablisa i mekim rong em i tanim bel tru? (b) Ating ol i ken mekim wanem liklik toksave long sampela taim?

₁₄ Dispela tupela elda bai tokim pablisa hia long ol samting em i mas mekim, na tupela i mas kolim ol samting em i no ken mekim na dispela i mas stret long rong em i bin mekim. Olsem: Ating bai ol i tok, inap liklik taim em i no ken mekim tok long Skul Bilong Wok Autim Tok, o em i no ken bekim tok long ol miting. O ating bai ol i tokim em, em i no ken autim tok wantaim kongrigesen inap long taim em i kamap strong long spirit. Taim em i kamap strong olsem, ol i ken tokim em, nau em i ken autim tok gen. Sapos i no gat planti man i save long dispela rong na i no inap bagarapim pasin bilong kongrigesen, orait ol elda i no ken mekim toksave long kongrigesen.

₁₅ Tasol olsem wanem sapos dispela tupela elda i kisim save olsem pablisa hia i tanim bel tru, tasol planti man i save long rong em i bin mekim? O olsem wanem sapos bihain planti man i kisim save long dispela rong? Sapos olsem, orait tupela i mas tokim Komiti Bilong Lukautim Wok Bilong Kongrigesen, na Komiti i ken makim taim bilong mekim liklik toksave long kongrigesen olsem: “Mipela stretim pinis hevi bilong . . . Em i no baptais, tasol em i stap pablisa yet long kongrigesen.” Long olgeta kain samting olsem, lain elda i mas skelim, i gutpela sapos bihain ol i mekim wanpela tok long kongrigesen na kamapim ol tok bilong Baibel i stret long dispela kain rong i bin kamap, o nogat.

16, 17. (a) I gat wanem tupela samting inap kamap na ating ol elda i mas mekim narapela kain toksave? (b) Ol i ken mekim wanem kain toksave?

₁₆ Sampela taim ol elda i wok long mekim pasin sori bilong helpim pablisa i no baptais na em i bin mekim rong, tasol pablisa i no tanim bel na stretim pasin bilong em. O ating pablisa i no baptais em yet i kirap tokim ol elda,em i no laik kamap strong na kisim baptais na em i no laik i stap pablisa moa. Orait, ol elda i mas mekim wanem? Ol i no ken rausim kain pablisa olsem, long wanem em i no bin mekim ol samting bambai God i ken orait long em. Kongrigesen i save rausim tasol ol man ol i save “kolim brata,” em ol i baptais pinis na ol i bin mekim rong na ol i no tanim bel. (1 Korin 5:11) Sapos man i no baptais yet na i mekim rong na i no tanim bel, yu ting ol elda i larim ol tasol? Nogat.

₁₇ Ol elda i gat wok long ‘Lukautim ol sipsip bilong God i stap long han bilong ol.’ (1 Pita 5:2) Sapos tupela elda i wok long helpim pablisa i no baptais na em i bin mekim rong na tupela i pilim olsem em i no tanim bel na em i no inap i stap pablisa moa, orait ol i mas tokim em.d O sapos wanpela pablisa i no baptais yet em i tokim ol elda em i no laik i stap pablisa moa, orait em laik bilong em. Sapos namba wan samting o namba tu samting hia i kamap, orait i stret Komiti Bilong Lukautim Wok Bilong Kongrigesen ol i ken mekim liklik toksave long kongrigesen long wanpela taim i stret, na ol i ken tok: “. . . em i no i stap pablisa moa.”

18. (a) Taim i gat kain toksave olsem, bihain ol Kristen i mas tingim wanem samting na bai ol inap save long pasin ol i mas mekim? (b) Ol manmeri i no baptais na ol i bin mekim rong, yumi mas klia long ol long olgeta taim bihain o olsem wanem?

₁₈ Na bihain ol Witnes i mas ting olsem wanem long kain man olsem? Pastaim em i ‘man i no bilip’ i kam long ol miting. Na bihain em i laik autim tok na em inapim mak na em i kamap pablisa. Tasol nau em i no i stap pablisa moa, olsem na em i kamap gen olsem man bilong ausait. Baibel i no tambuim ol Witnes long toktok wantaim kain man olsem, long wanem em i no rauspela man.e Tasol ol Kristen i mas was gut long kain man olsem em i no lotuim Jehova. Ol i mas mekim pasin wankain olsem ol Isrel bilong bipo i bin mekim long man bilong narapela lain em i kam sindaun long hap bilong ol, tasol em i no kisim lotu bilong ol na katim skin. Dispela bai lukautim kongrigesen bambai “liklik yis” i no ken bagarapim kongrigesen. (1 Korin 5:6) Sapos bihain dispela man i laik tru bai ol brata i stadi wantaim em, na ol elda i pilim olsem i orait ol i mekim olsem, ating dispela bai helpim em long pilim gen gutpela blesing bilong man i lotuim God Jehova na em i kam insait long lain bilong Jehova.−Sam 100.

19. Taim kain samting olsem i kamap, sampela taim ol elda i mas mekim wanem samting moa bilong helpim wan wan long kongrigesen?

₁₉ Sapos ol elda i lukim kain man olsem em i mekim sampela samting inap bagarapim sampela sipsip long kongrigesen, orait ol i mas i go toktok wantaim ol dispela sipsip wanwan. Olsem: Dispela man o meri i no baptais na bipo em i stap pablisa, sapos em i wanpela yangpela man o meri i save dring longlong o mekim pasin pamuk samting na ol i tokaut pinis olsem em i no stap pablisa moa, tasol ating em i wok long poroman yet wantaim sampela yangpela long kongrigesen, orait ol elda i mas toktok wantaim papamama bilong ol dispela yangpela, na ating ol i mas toktok wantaim ol dispela yangpela tu. (Hibru 12:​15, 16; Aposel 20:​28-30) Wan wan taim ating kain man olsem bai i laik bagarapim miting samting o em i laik mekim pait na bagarapim man. Sapos olsem, orait ol elda i ken tokim em, em i no ken i kam moa long ol miting, na sapos em i laik kam insait em i brukim lo na bai ol i putim em long han bilong polis.

Helpim Ol Pikinini long Lotuim God

20. Ol papamama Kristen i save mekim wanem bilong helpim pikinini bilong ol? Na wanem samting i save kamap?

₂₀ Baibel i tok em wok bilong papamama long lainim pikinini bilong ol long ol tok i tru bilong God. (Diuteronomi 6:​4-9; 31:​12, 13) Olsem na longtaim pinis ol Witnes Bilong Jehova i bin kirapim ol papamama Kristen long mekim famili-stadi long olgeta wik na lainim ol pikinini bilong ol long ol tok bilong Baibel. Ol papamama Kristen i mas helpim pikinini bilong ol long kamap strong bambai ol i dediket long God na kisim baptais, na long dispela rot bai God i orait long ol dispela pikinini. (Provep 4:​1-7) Na wanem gutpela samting i bin kamap? Yumi lukim planti handet tausen yangpela insait long ol kongrigesen, em ol i laikim tumas Jehova na ol i laik mekim wok bilong em inap long olgeta taim bihain.

21-23. (a) Em wok tru bilong husat long stretim pikinini i mekim rong? (b) Ol elda long kongrigesen i gat wanem wok taim pikinini i mekim rong?

₂₁ Na em wok bilong papamama Kristen long skulim na stretim ol pikinini bilong ol. Ol yet i mas skelim wanem tambu o strafe ol bai givim long pikinini long pasin sori. I no wok bilong narapela man; em wok tru bilong papamama. (Efesas 6:4; Hibru 12:​8, 9; Provep 3:​11, 12; 22:15) Tasol sapos pikinini i save autim tok wantaim kongrigesen, olsem em i pablisa i no baptais, na em i mekim bikpela rong, ol elda tu i gat wok long stretim dispela samting, long wanem ‘ol i save was long ol sipsip oltaim.’−Hibru 13:17.

₂₂ Taim kain hevi olsem i kamap, ol i mas mekim ol samting olsem yumi kolim pinis. Ol i ken makim tupela elda bilong skelim dispela hevi. Ating pastaim tupela i ken toktok wantaim papamama (o toktok wantaim papa tasol o mama tasol) long ol samting i bin kamap, na pikinini i gat wanem kain tingting, olsem em i hevi long rong em i bin mekim o nogat, na papamama i bin mekim wanem bilong stretim dispela hevi. (Lukim Diuteronomi 21:​18-21.) Sapos papamama Kristen i mekim gut wok bilong ol long stretim dispela hevi, orait wan wan taim tasol ol elda i gat wok long toktok wantaim ol long dispela hevi bilong givim sampela gutpela tok long ol, na bilong helpim ol na strongim ol.

₂₃ Tasol sampela taim, tupela elda i toktok wantaim papamama na nau ol i save i gutpela sapos ol bung wantaim dispela pikinini na papamama tu wantaim na toktok wantaim ol. Ol i save ol yangpela i no gat bikpela save, na ol laik nogut i save kamap long bel bilong ol, olsem na tupela i mekim pasin isi na ol i wok long skulim dispela yangpela pablisa i no baptais yet. (2 Timoti 2:​22-26) Tasol sampela taim bai pasin bilong em i kamapim long ples klia olsem em i no inap i stap pablisa moa, na ol i ken mekim liklik toksave olsem long kongrigesen.

24. (a) Maski pikinini i bin mekim bikpela rong, tasol i stret papamama i mas mekim wanem? Ating ol i ken mekim olsem wanem? (b) Tasol ol i mas mekim wanem sapos pikinini i baptais pinis na kongrigesen i rausim em?

₂₄ Bihain papamama i ken mekim wanem bilong helpim dispela pikinini bilong ol em i bin mekim rong? Maski em i no baptais na nau em no inap i stap pablisa, o em i baptais pinis na em i mekim rong na nau kongrigesen i rausim em, tasol papamama i gat wok yet long helpim em. Ol i mas wok yet long givim kaikai na klos na haus long em, na olsem tasol ol i mas wok yet long givim ol gutpela tok bilong Baibel long em bilong skulim na stretim em. (Provep 6:​20-22; 29:17) Papamama i laikim tumas pikinini na ating bai ol i stretim rot bilong stadi wantaim em, maski kongrigesen i bin rausim em.f Ating ol i mas stadi wantaim em wanpela na dispela bai helpim ol long stretim em gut. O ating bai ol i orait long em i insait yet long famili-stadi. Em i bin lusim rot, tasol ol i laik lukim em i kam bek long Jehova, olsem pikinini i kam bek long papa long tok piksa bilong Jisas.−Luk 15:​11-24.

25. Bilong wanem yumi save tingim ol man “i no bilip” na yumi wok long helpim ol long nau?

₂₅ As bilong wok bilong yumi long autim tok na lainim ol man, em olsem: Yumi laik helpim ol bambai ol i kamap man bilong lotuim trupela God na ol i amamas long mekim. Long Korin long bipo, ‘ol man i no bilip, o i no save gut’ ol i pilim tru ol tok na ol i ‘pundaun long pes bilong ol na litimapim nem bilong God,’ na ol i tok: “Tru tumas, God i stap namel long yupela.” (1 Korin 14:25) Long nau tu yumi amamas long lukim planti planti man moa ol i kam bilong lotuim God! Dispela i gutpela truim bilong tokaut ol ensel i bin mekim, olsem: “Litimapim nem bilong God long antap tru! Na long graun ol manmeri God i belgut long ol, ol i ken bel isi.”−Luk 2:​14, NW.

[Ol Futnot]

Yu Tingim?

◻ Ol Kristen i ting olsem wanem long ‘ol man i no bilip’ em ol i kam long ol miting?

◻ Taim wanpela Baibel-stadi i laik kirap long autim tok, ol elda i save mekim wanem? Nau em i gat wanem wok?

◻ Sapos pablisa i no baptais na em i mekim bikpela rong, ol i mas mekim wanem?

◻ Papamama na ol elda i ken mekim wanem bilong helpim pikinini i stap yet long haus bilong papamama na em i mekim bikpela rong?

[Piksa long pes 17]

Maski yu no baptais yet, tasol taim yu kirap long autim tok, olsem kamap pablisa, em bikpela samting bilong helpim yu bai God i ken orait long yu