Ol Wokman Bilong Autim Gutnius

JEHOVA i salim Pikinini bilong em, Jisas Krais i kam bilong yumi ken bihainim pasin bilong em. (1 Pita 2:21) Taim man i kamap disaipel bilong Jisas, dispela man i autim gutnius olsem wanpela wokman bilong God. Jisas i tok dispela wok bai givim man nupela strong long sait bilong bilip, em i tok: “Yupela ol man i save hatwok nating na karim ol bikpela hevi, yupela kam long mi na bai mi givim nupela strong long yupela. Karim hap plang bilong mi na kisim skul long mi, long wanem, mi man bilong pasin isi na pasin daun, na yupela bai kisim nupela strong.” (Mat. 11:28, 29) Tok promis bilong em i bin kamap tru long ol man i bihainim dispela tok!

² Jisas i Nambawan Wokman Bilong God, na em i bin singautim sampela man long bihainim em. (Mat. 9:9; Jon 1:43) Em i lainim ol long wok autim tok na em i salim ol i go mekim wankain wok em yet i save mekim. (Mat. 10: 1–11:1; 20:28; Luk 4:43) Bihain em i salim 70 man moa long autim gutnius bilong Kingdom Bilong God. (Luk 10:1, 8-11) Taim Jisas i salim ol disaipel bilong em i go, em i tokim ol: “Man i harim tok bilong yupela, em i harim tok bilong mi tu. Na man i givim baksait long yupela, em i givim baksait long mi tu. Na tu, man i givim baksait long mi, em i givim baksait tu long Man i bin salim mi i kam.” (Luk 10:16) Long dispela rot Jisas i kamapim klia olsem ol disaipel i kisim wanpela bikpela wok. Ol i olsem mausman bilong Jisas na God Antap Tru! Na i wankain tu long ol man long taim bilong yumi husat i bihainim singaut bilong Jisas, olsem: “Kam bihainim mi.” (Luk 18:22; 2 Kor. 2:17) Olgeta man i bihainim dispela tok, ol i kisim wok long God long autim gutnius bilong Kingdom na kamapim ol disaipel.—Mat. 24:14; 28:19, 20.

³ Yumi bihainim singaut bilong Jisas na kam long em, olsem na yumi bin “kisim save” long God Jehova na Jisas Krais. (Jon 17:3) Yumi bin kisim save long ol pasin bilong Jehova. Jehova i helpim yumi long kisim nupela tingting, kisim nupela pasin, na bihainim pasin i stret wantaim ol stretpela lo bilong em. (Rom 12:1, 2; Efe. 4:22-24; Kol. 3:9, 10) Bel bilong yumi i kirapim yumi long dediket long Jehova na kisim baptais bilong makim olsem yumi dediket pinis. Taim yumi baptais yumi kamap wokman bilong God.

⁴ Oltaim tingim olsem yumi mas mekim wok bilong God wantaim stretpela pasin na klinpela bel. (Sng. 24:3, 4; Ais. 52:11; 2 Kor. 6:14–7:1) Yumi bilip long Jisas Krais, olsem na maus bilong bel bilong yumi i no gat tok. (Hib. 10:19-23, 35, 36; Rev. 7:9, 10, 14) Aposel Pol i tokim ol Kristen long ol i mas mekim olgeta samting bilong givim glori long God na bai ol i no ken pundaunim ol arapela. Aposel Pita i kamapim klia olsem gutpela pasin inap kirapim man i no bilip long kisim save long tok i tru. (1 Kor. 10:31, 33; 1 Pita 3:1) Olsem wanem yu inap helpim wanpela long winim mak long kamap wokman na bung wantaim yumi long autim gutnius?

OL NUPELA PABLISA

⁵ Stat long taim yu kirap stadi wantaim wanpela long Baibel, strongim em long tokim ol arapela long ol samting em i kisim save long en. Em i ken toktok wantaim ol wanblut, pren, wanwok, na ol arapela man em i save bungim. Dispela em i bikpela samting long skulim ol nupela long bihainim pasin bilong Jisas Krais olsem ol wokman bilong autim gutnius. (Mat. 9:9; Luk 6:40) Taim nupela man i wok long kamap strong long tok i tru na lain long autim tok long kain kain taim na ples, em bai tokaut olsem em i gat laik long mekim wok autim tok.

WINIM OL MAK

⁶ Paslain long yu singautim wanpela long go autim tok long namba 1 taim, yu mas skelim olsem em i winim sampela mak pinis o nogat. Taim wanpela i autim tok wantaim yumi, em i kamapim ples klia olsem em i save bung wantaim ol Witnes Bilong Jehova. I klia olsem em i stretim pinis pasin na wokabaut bilong em na i stret wantaim ol stretpela lo bilong Jehova na em inap kamap wanpela pablisa i no baptais.

⁷ Taim yu stadi wantaim wanpela na toktok wantaim em long ol stiatok bilong Baibel, yu bai save long sindaun bilong em. Ating yu luksave olsem em i bihainim ol tok em i kisim save long en long i stap bilong em. Tasol i gat sampela samting long i stap bilong sumatin em ol elda i laik toktok wantaim yu na sumatin long en.

⁸ Kodineta bilong lain elda bai tokim tupela elda (wanpela em bilong sevis komiti) long toktok wantaim yu na Baibel sumatin long dispela samting. Long ol kongrigesen i no gat planti elda, wanpela elda i ken mekim dispela wok wantaim wanpela kongrigesen sevan. Ol brata ol i makim long toktok wantaim pablisa na Baibel sumatin ol i mas mekim olsem. Sapos ol elda i kisim save long dispela laik bilong sumatin long taim bilong miting bilong kongrigesen, i gutpela long ol i toktok wantaim yu na sumatin bilong yu bihain long miting. Ol elda i ken toktok wantaim em long gutpela pasin. Paslain long ol elda i tok orait long em long kamap wanpela pablisa i no baptais, em i mas kamapim klia ol dispela samting:

1. (1) Em i bilip olsem Baibel em i Tok Bilong God.—2 Tim. 3:16.

2. (2) Em i save gut na bilip long ol as tok bilong Baibel na taim ol man i givim askim long em, em bai bekim tok i stret wantaim Baibel na i no kamapim ol tok bilong lotu giaman o tingting bilong em yet.—Mat. 7:21-23; 2 Tim. 2:15.

3. (3) Em i save bihainim tok bilong Baibel long bung wantaim lain bilong Jehova long ol miting bilong kongrigesen sapos i no gat wanpela samting i pasim em.—Sng. 122:1; Hib. 10:24, 25.

4. (4) Em i save long tok Baibel i mekim long pasin pamuk, pasin adaltri, maritim tupela o planti meri, man i slip wantaim man o meri i slip wantaim meri, na em yet i no insait long ol dispela pasin. Sapos man na meri i sindaun nating wantaim, na tupela i no marit tru, orait tupela i mas stretim marit bilong ol.—Mat. 19:9; 1 Kor. 6:9, 10; 1 Tim. 3:2, 12; Hib. 13:4.

5. (5) Em i bihainim tok bilong Baibel long no ken spak, na em i no kisim ol drak i save kalabusim man, olsem smok, buai, mariwana, o sampela arapela drak ol man i wokim.—2 Kor. 7:1; Efe. 5:18; 1 Pita 4:3, 4.

6. (6) Em i luksave olsem em i bikpela samting long sakim ol poroman nogut.—1 Kor. 15:33.

7. (7) Em i mekim ol samting na bai em i no stap moa olsem memba bilong ol lotu giaman em bipo em bin insait long en. Na em i lusim pinis pasin bilong go long bung bilong ol na sapotim o insait long ol wok bilong ol.—2 Kor. 6:14-18; Rev. 18:4.

8. (8) Em i lusim tru olgeta kain wok politik bilong dispela graun.—Jon 6:15; 15:19; Jems 1:27.

9. (9) Em i bilip na bihainim tok bilong Aisaia 2:4 long sakim ol wok bilong ol lain man bilong graun.

10. (10) Em i laik tru long kamap wanpela Witnes Bilong Jehova.—Sng. 110:3.

⁹ Sapos ol elda i no save gut long sumatin i ting olsem wanem long sampela bilong ol dispela tok, ol i mas askim em long lukim ol dispela skripsa i stap hia na toktok wantaim em. Em i bikpela samting long em i kliagut olsem ol man i autim tok wantaim ol Witnes Bilong Jehova, pasin na wokabaut bilong ol i mas stret wantaim ol dispela lo bilong Baibel. Ol tok sumatin i mekim bai helpim ol elda long luksave olsem sumatin i kliagut long ol samting em i mas mekim o nogat, na em i winim mak bilong kirap mekim wok autim tok o nogat.

¹⁰ Kwiktaim ol elda i mas toksave long sumatin sapos em i winim mak o nogat. Planti taim, ol inap mekim olsem bihain long ol i toktok wantaim em. Sapos em i winim mak, orait ol elda i ken tok amamas long em olsem em i kamap pablisa. (Rom 15:7) Ol elda i mas strongim em long kirap mekim wok autim tok kwiktaim na givim ripot bilong wok autim tok long pinis bilong mun. Ol elda i ken tokim sumatin olsem taim wanpela sumatin bilong Baibel i winim mak bilong kamap pablisa i no baptais, na em i putim ripot bilong wok autim tok long namba 1 taim, ol bai wokim Pablisa Ripot Kat Bilong Kongrigesen i gat nem bilong pablisa na putim long fail bilong kongrigesen. Ol elda i kisim ol dispela samting long pablisa na bai dispela i helpim wok bilong oganaisesen long stretim ol wok lotu bilong ol Witnes Bilong Jehova long olgeta hap bilong graun, na bai pablisa i ken insait long ol wok lotu na kisim helpim long sait bilong bilip. Na tu, ol elda i ken tokim ol nupela pablisa olsem ol brata bai bihainim lo bilong Global Data Protection Policy bilong ol Witnes Bilong Jehova i stap long jw.org.

¹¹ Taim yumi wok long save gut long nupela pablisa na soim olsem yumi tingim ol samting em i save mekim, dispela inap strongim bel bilong em. Dispela inap kirapim em long wok strong yet long mekim wok bilong Jehova na long givim ripot bilong wok autim tok long olgeta taim.—Fili. 2:4; Hib. 13:2.

¹² Taim ol elda i tokaut olsem Baibel sumatin i winim mak bilong autim tok, em inap kisim buk Oganaisesen Bilong Mekim Laik Bilong Jehova. Taim em i putim ripot bilong wok autim tok long namba 1 taim, ol bai mekim sotpela toksave long kongrigesen olsem em i wanpela nupela pablisa i no baptais.

HELPIM OL PIKININI

¹³ Ol pikinini tu inap winim mak bilong kamap pablisa bilong autim gutnius. Jisas i orait long ol pikinini na em i blesim ol. (Mat. 19:13-15; 21:15, 16) Tru, em wok bilong ol papamama long lukautim ol pikinini bilong ol, tasol ating ol arapela long kongrigesen i laik helpim ol pikinini em bel i kirapim ol long insait long wok bilong autim tok bilong Kingdom. Sapos yu wanpela papa o mama, gutpela eksampel bilong yu long wok autim tok bai helpim ol pikinini bilong yu long givim bel tru long mekim wok bilong God. Taim pikinini i bihainim gutpela pasin na bel bilong em i kirapim em long kamapim bilip bilong em long ol narapela man, yumi ken mekim wanem samting moa bilong helpim em?

¹⁴ Em i gutpela long papa o mama i go toktok wantaim wanpela elda bilong Kongrigesen Sevis Komiti bilong save pikinini inap long kamap pablisa o nogat. Kodineta bilong lain elda bai tokim tupela elda (wanpela em bilong sevis komiti) long bung wantaim pikinini na papa o mama bilong em o wanpela husat i lukautim em. Sapos pikinini i save long ol bikpela tok i tru bilong Baibel, na i kamapim klia olsem em i laik tru long insait long wok autim tok, orait dispela i makim olsem em i wok long kamap strong. Taim tupela elda i skelim pinis ol dispela samting na ol arapela samting i wankain olsem ol mak ol man i bikpela pinis i mas winim, tupela elda i ken skelim olsem dispela pikinini inap kamap wanpela pablisa i no baptais o nogat. (Luk 6:45; Rom 10:10) Taim ol i bung wantaim wanpela liklik pikinini, i no gat wok long toktok wantaim em long sampela samting we ol i save toktok wantaim ol bikpela man long en.

¹⁵ Taim ol elda i bung wantaim pikinini, ol i mas tok amamas long em i wok long kamap strong na kirapim em long putim mak bilong kisim baptais. Ol papamama i wok strong long putim tok i tru long bel bilong pikinini, olsem na i stret ol elda i ken tok amamas long ol tu long dispela samting. Bilong helpim papamama long helpim moa yet pikinini bilong ol, ol elda i ken tokim ol long lukim tok i stap long hap “Tok i Go Long Ol Papamama Kristen,” long pes 179-181.

DEDIKET NA BAPTAIS

¹⁶ Sapos yu bin kisim save na laikim tru Jehova long rot bilong bihainim stret ol lo bilong em na autim tok, orait yu mas strongim pasin bilong yu long pas gut wantaim em. Bai yu mekim olsem wanem? Yu mas dediketim laip bilong yu long em na kisim baptais long wara bilong makim olsem yu dediket pinis.—Mat. 28:19, 20.

¹⁷ Dediket i olsem man i givim em yet bilong mekim wanpela wok holi. Bilong dediket long God, man i mas beten long God na tok promis long yusim laip bilong em bilong mekim wok bilong God na bihainim ol pasin bilong em. Dispela i makim olsem em bai lotu long God wanpela tasol inap oltaim oltaim. (Lo 5:9) Em samting bilong yu yet long skelim na mekim. Narapela man i no inap mekim bilong yu.

¹⁸ Yu tokim Jehova olsem yu laik givim yu yet long em, tasol yu mas mekim sampela samting moa. Yu mas soim long ol arapela olsem yu dediket pinis long God. Yu mekim olsem long rot bilong kisim baptais long wara, olsem Jisas i bin mekim. (1 Pita 2:21; 3:21) Sapos yu wokim tingting pinis long yu laik mekim wok bilong Jehova na yu laik kisim baptais, orait yu mas mekim wanem? Yu mas toksave long kodineta bilong lain elda. Em bai stretim rot long sampela elda long toktok wantaim yu bilong save yu winim ol mak God i putim bilong kisim baptais o nogat. Bilong kisim sampela save moa, plis lukim “Tok i Go Long Pablisa i No Baptais,” long pes 182-184 long dispela buk, na “Ol Askim Bilong Givim Long Ol Man i Laik Kisim Baptais,” long pes 185-207.

PUTIM RIPOT BILONG AUTIM TOK

¹⁹ Inap planti yia pinis, ol ripot bilong lotu i tru i go bikpela long olgeta hap i bin strongim bel bilong lain bilong Jehova. Kirap long taim Jisas Krais i bin tokim ol disaipel bilong em long ol i mas autim gutnius long olgeta hap, ol Kristen tru i laik save bai ol i mekim dispela wok olsem wanem.—Mat. 28:19, 20; Mak 13:10; Apo. 1:8.

²⁰ Ol disaipel bilong Jisas long bipo i amamas long harim ripot long ol gutpela wok bilong autim tok. (Mak 6:30) Buk Aposel long Baibel i stori long 120 manmeri i bin bung taim holi spirit i kam daun long ol disaipel long Pentikos 33 C.E. I no longtaim na namba bilong ol disaipel i go bikpela inap 3,000 na bihain i go antap long 5,000. Ol i harim ripot olsem, “long olgeta de Jehova i wok long bringim sampela man moa i kam joinim lain bilong ol, em ol manmeri God i kisim bek ol” na “bikpela lain pris tu ol i bilip.” (Apo. 1:15; 2:5-11, 41, 47; 4:4; 6:7) Taim ol disaipel i harim ol dispela ripot long lain bilong Jehova i go bikpela, dispela i mas strongim tru bel bilong ol! Ol dispela ripot i mas kirapim ol long givim bel tru long mekim wok God i bin givim long ol, maski ol bikman bilong lotu Juda i kirapim ol man long birua long ol!

²¹ Long 60-61 C.E. samting, Pol i raitim pas i go long ol Kolosi na em i tok dispela gutnius “i wok long karim kaikai na kamap bikpela long olgeta hap bilong graun” na ol i bin “autim dispela gutnius long olgeta hap bilong graun aninit long skai.” (Kol. 1:5, 6, 23) Ol Kristen bilong pastaim i bin bihainim tok bilong God, na holi spirit i strongim ol na ol i bin mekim bikpela wok bilong autim tok paslain long 70 C.E, taim pasin na lo ol Juda i stap aninit long en i pinis. Taim ol dispela gutpela wokman Kristen i harim ol ripot long ol wok ol i bin mekim, dispela i strongim tru bel bilong ol!

²² Long nau tu, oganaisesen bilong Jehova i wok strong long bungim gut ol ripot i kolim stret ol wok yumi mekim bilong truim tok bilong Matyu 24:14, em i tok: “Ol bai autim dispela gutnius bilong Kingdom long olgeta hap bilong graun na bai olgeta lain man i ken harim, na bihain long dispela, pinis bai kamap.” Yumi ol wokman bilong God i dediket pinis, yumi gat bikpela wok em yumi mas mekim hariap. Yumi mas i gat laik long mekim gut wok autim tok paslain long pinis i kamap. Jehova bai helpim yumi na yumi inap pinisim dispela wok, na sapos yumi insait long dispela wok, Jehova bai orait long yumi.—Ese. 3:18-21.

RIPOT BILONG YU LONG AUTIM TOK

²³ Yumi mas raitim wanem samting long ripot? Oganaisesen i wokim pepa, Ripot Bilong Wok Autim Tok, na dispela pepa i makim ol samting yumi mas putim long ripot. Tasol, nau yumi bai stori long sampela samting bai helpim yumi.

²⁴ Long hap “Ol Nius (Ol i Prinim na Elektronik Fail),” yu ken raitim hamas buk na buklet na magasin em yu tilim, dispela i makim tu elektronik fail yu givim long ol man i no dediket na baptais olsem wanpela Witnes. Long hap “Ol Soim Bilong Ol Vidio,” raitim hamas taim yu bin soim wanpela bilong ol vidio bilong yumi.

²⁵ Taim yu raitim long ripot hamas “Ol Gobek” yu bin mekim, kaunim namba bilong olgeta man i no dediket na baptais olsem wanpela Witnes, em ol i bin harim tok na yu go lukim gen ol bilong kirapim laik bilong ol long kisim sampela save moa. Yu mekim gobek taim yu go bungim man, o raitim pas long man, toktok wantaim man long telefon, salim teks mesis, o e-mail, na bringim sampela buk samting long man. Olgeta wan wan taim yu stadi long Baibel wantaim man, kaunim dispela olsem wanpela gobek. Papa o mama i ken raitim long ripot wanpela gobek long olgeta wik taim em i mekim Famili Lotu wantaim ol pikinini bilong em husat i no baptais yet.

²⁶ Maski yu stadi long Baibel wantaim man long olgeta wik, yu mas putim long ripot olsem wanpela stadi tasol long olgeta mun. Pablisa i mas raitim long ripot hamas narapela narapela Baibel stadi em i mekim long dispela mun. Yu ken raitim long ripot tu ol manmeri yu stadi wantaim ol, em ol man i no dediket na baptais olsem wanpela Witnes. Yu ken raitim tu Baibel stadi yu mekim wantaim brata o sista husat i bin lusim wok autim tok sapos wanpela elda bilong sevis komiti i tokim yu long mekim olsem, o wanpela brata o sista em nau tasol i kisim baptais na em i no pinisim yet buk Stap Amamas Oltaim!

²⁷ Em i bikpela samting long raitim stret “Ol Aua,” em ol aua yu lusim bilong autim tok long ol haus, mekim ol gobek, ol Baibel stadi, autim tok long kain kain taim na ples o long pablik ples, na long ol man i no dediket na baptais olsem wanpela Witnes. Sapos tupela pablisa i wok wantaim, ol i ken kaunim ol aua. Tasol wanpela tasol bai kaunim ol gobek na ol Baibel stadi ol i mekim. Sapos papamama i mekim Famili Lotu wantaim ol pikinini, ol i ken kaunim olsem wanpela aua long olgeta wik. Ol brata i ken kaunim tu haptaim ol i mekim pablik tok. Na brata o sista i tanim pablik tok i go long narapela tokples em i ken kaunim tu dispela haptaim long ripot bilong em. I gat ol samting yumi mas mekim, tasol yumi no ken kaunim aua bilong ol dispela samting, olsem haptaim yumi lusim bilong redi long autim tok, stap long bung bilong autim tok, o go long maket o baim kaikai samting long stua, na ol narapela samting.

²⁸ Olgeta wan wan pablisa i mas larim maus bilong bel bilong ol em Baibel i skulim i stiaim ol taim ol i laik skelim hamas aua ol i autim tok. Sampela pablisa i save autim tok long ol hap we i gat planti manmeri i stap long en, na sampela i save autim tok long ol hap we i no gat planti man na ol i mas raun planti bilong bungim ol man. Ol teritori i narapela narapela; tingting bilong ol pablisa long wok autim tok i narapela narapela. Gavening Bodi i no save subim olgeta kongrigesen long olgeta hap long bihainim tingting bilong ol long hamas aua bilong autim tok ol i mas raitim long ripot, na tu, i no gat wanpela man ol i makim bilong skelim dispela samting.—Mat. 6:1; 7:1; 1 Tim. 1:5.

²⁹ Haptaim yu lusim bilong autim tok yu mas raitim ol aua tasol, no ken raitim ol minit. Tasol sapos pablisa i lapun tru, i no inap lusim haus, o i gat bikpela sik samting, em inap kaunim ol minit em i autim tok. Kain pablisa olsem inap raitim long ripot ol 15 minit, 30 minit, o 45 minit. Maski em i autim tok inap 15 minit tasol long wanpela mun, em i mas raitim dispela long ripot na bai em i insait long namba bilong ol pablisa bilong Kingdom i save autim tok long olgeta mun. Ol pablisa i gat bikpela sik o bagarap long skin na inap sotpela taim ol i hatwok tru long autim tok, ol tu i ken bihainim dispela pasin long kaunim taim bilong autim tok. Ol pablisa i gat kain ol hevi olsem, ol tasol inap bihainim dispela pasin bilong raitim ripot. Sevis komiti bai skelim husat ol pablisa inap bihainim dispela pasin.

PABLISA RIPOT KAT BILONG KONGRIGESEN

³⁰ Ol ripot bilong autim tok yu putim long ol wan wan mun, ol i save raitim long Pablisa Ripot Kat Bilong Kongrigesen bilong yu. Ol dispela rekod em bilong kongrigesen. Sapos yu bai go i stap long narapela kongrigesen, yu mas toksave long ol elda bilong yu. Sekreteri bilong kongrigesen bai salim rekod bilong yu i go long nupela kongrigesen yu go long en. Olsem bai ol elda i ken helpim yu long ol samting bilong lotu. Sapos yu go long narapela hap inap sotpela taim tasol, na i no winim 3-pela mun, plis salim yet ol ripot bilong yu long wok autim tok i go long kongrigesen bilong yu.

AS NA YUMI PUTIM RIPOT BILONG WOK AUTIM TOK

³¹ Olsem wanem? Sampela taim yu save lusim tingting long putim ripot bilong yu? Em tru, sampela taim narapela i mas kirapim yumi long putim ripot. Tasol sapos yumi holim stretpela tingting long pasin bilong putim ripot na yumi kliagut long as na em i bikpela samting, ating em bai i no hatwok long yumi tingim long putim ripot long olgeta mun.

³² Sampela i bin askim olsem: “Jehova i save long wok mi mekim, olsem na bilong wanem mi mas givim ripot?” Tru, Jehova i save long ol wok yumi mekim, na em inap save yumi givim bel long mekim wok o yumi wok liklik tasol na yumi no wok inap long skel tru bilong yumi. Tasol tingim, long Baibel Jehova i kolim hamas de Noa i bin stap insait long sip, na hamas yia ol Israel i bin wokabaut long ples drai nating. God i kolim hamas man i bin bihainim tok na hamas i bikhet. Long Baibel em i putim stori bilong lain Israel i wok long winim ol Kenan na kisim graun bilong ol, na ol samting ol gutpela hetman bilong lain Israel i bin mekim. Yes, God i bin putim planti stori long Baibel olsem ripot bilong ol wok samting ol wokman bilong em i bin mekim. God i kirapim sampela man long raitim ol dispela stori o ripot long ol samting i bin kamap bipo, olsem na yumi ken save em i ting pasin bilong raitim ol ripot i bikpela samting.

³³ Ol samting i bin kamap bipo em Baibel i kolim i kamapim klia olsem ol ripot na stori em lain bilong Jehova i bin raitim, ol dispela ripot i stret tru. Long planti stori, bikpela tok bilong stori bai i no stap ples klia sapos ol i no kolim stret ol namba. Skelim ol dispela stori: Stat 46:27; Kisim Bek 12:37; Hetman 7:7; 2 King 19:35; 2 Stori 14:9-13; Jon 6:10; 21:11; Aposel 2:41; 19:19.

³⁴ Tru, ol dispela ripot i no kamapim olgeta samting yumi save mekim long wok bilong Jehova, tasol ol i helpim wok bilong oganaisesen bilong Jehova. Long taim bilong ol aposel, taim ol i kam bek long autim tok, ol i tokim Jisas long “olgeta samting ol i skulim ol man long en.” (Mak 6:30) Sampela taim ol ripot i kamapim klia olsem yumi mas stretim sampela hap wok bilong yumi long autim tok. Ol namba long ripot inap soim olsem sampela hap wok i go bikpela, tasol namba bilong ol pablisa i wok long go daun. Ating i gat wok bilong strongim bel bilong sampela o i gat sampela hevi bilong stretim. Ol wasman bai lukim ol ripot na wok strong long stretim ol hevi em inap long pasim pablisa o kongrigesen olgeta long kamap strong.

³⁵ Na tu, ol ripot i helpim oganaisesen long save long wanem hap i sot long ol man bilong autim tok. Wok i kamap gutpela long wanem ol hap? Na long wanem ol hap wok i no kamap gutpela tumas? Wanem ol buk na nius bai i gutpela long helpim ol man long save long tok i tru? Ol ripot i save helpim oganaisesen long save hamas ol buk samting ol i mas wokim bilong helpim ol lain long ol narapela narapela hap bilong graun na bai ol i no sot long ol dispela samting.

³⁶ Ol ripot i save strongim bel bilong yumi. Yumi save amamas taim yumi harim ripot long wok ol brata i mekim bilong autim gutnius long olgeta hap, a? Taim yumi harim ripot olsem lain pablisa i go bikpela, dispela i helpim yumi long save long oganaisesen bilong Jehova i go bikpela olsem wanem. Ol ekspiriens yumi harim i strongim bel bilong yumi na i kirapim yumi long givim bel moa yet long wok autim tok. (Apo. 15:3) Olsem na pasin bilong putim ripot em i bikpela samting na em i soim olsem yumi tingim ol brata bilong yumi long olgeta hap. Long dispela rot, yumi kamapim klia olsem yumi daun long dispela pasin oganaisesen bilong Jehova i putim.—Luk 16:10; Hib. 13:17.

PUTIM OL MAK BILONG WINIM

³⁷ I no gat as na yumi skelim wok autim tok bilong yumi wantaim wok bilong ol narapela bratasista. (Gal. 5:26; 6:4) Sindaun bilong yumi olgeta i no wankain. Tasol sapos yumi putim ol mak yumi yet inap winim, dispela inap helpim yumi long save sapos wok autim tok bilong yumi i wok long kamap gutpela moa o nogat. Taim yumi winim ol dispela mak, bai yumi kisim amamas long yumi bin mekim sampela gutpela wok.

³⁸ Tru tumas, long nau Jehova i wok long hariapim wok bilong bungim ol manmeri em bai lukautim long taim bilong “traipela hevi tru.” Yumi stap long taim tok profet bilong Aisaia i kamap tru, em i tok: “Lain i liklik tru bai kamap planti tausen, na liklik lain i no gat nem bai kamap wanpela strongpela kantri. Mi Jehova, mi yet bai hariapim dispela samting i kamap long taim stret bilong en.” (Rev. 7: 9, 14; Ais. 60:22) Man! Em i wanpela gutpela samting tru long i stap ol wokman bilong autim gutnius long dispela taim bilong las de!—Mat. 24:14.