Mekim Wok Bilong God Long San na Long Nait
1 Yumi bin kisim wanpela gutpela wok tru. Yumi stap Witnes Bilong Jehova. Yumi insait long dispela lain em Jehova i givim bikpela wok long ol bilong autim tok bilong Kingdom, winim olgeta narapela taim bipo! (Mk 13:10) Yumi save taim i sot pinis na yumi mas mekim hariap dispela wok. Olsem wanem? Yumi mekim dispela wok inap tru long skel bilong yumi?
2 Yumi no save hamas manmeri bihain bai kam insait long tok i tru. Jehova i tok, dispela lain bai i olsem “planti manmeri tru,” na olgeta bai ‘mekim wok bilong God long san na long nait.’ (KTH 7:9, 15) Winim 5 milion manmeri i mekim dispela wok, tasol ol i no man bilong harim nating ol tok o go long ol miting na em tasol. Ol i man bilong wok—ol i save autim gutnius bilong Kingdom long olgeta hap!
3 Long olgeta de i gat rot bilong litimapim nem bilong Jehova—taim yumi autim tok long ol haus o long kain kain taim na ples. Sapos yumi olgeta wan wan i autim tok i tru long wanpela man long olgeta wan wan de, ating bai yumi autim tok long planti man tru. Yumi laikim tru Jehova na dispela i mas kirapim yumi long givim bel long tokim ol narapela long em.—Sng 92:1, 2.
4 Helpim Ol Narapela Long Mekim Wok Bilong God: Jehova i mekim na planti man moa i wok long kam insait long lain bilong yumi. (Hag 2:7) Long Papua Niugini yumi bin mekim 4,574 Baibel-stadi long olgeta wan wan mun long yia bilong wok bilong 1995. Yumi stadi wantaim ol, long wanem, yumi laik helpim ol long kamap disaipel bilong Jisas. (Mt 28:19, 20) Planti ol i kamap strong—ol i kam oltaim long ol miting na ol i tokim ol wantok bilong ol long “ol strongpela wok bilong God” ol i bin kisim save long en. (Ap 2:11) Olsem wanem? Yumi ken singautim ol long ol i ken insait long wok bilong autim tok?
5 Long Epril, yumi mas givim bel long singautim ol nupela i winim mak, long i go wantaim yumi long autim tok. Olsem wanem? Baibel-stadi bilong yu i bin tokim yu em i laik mekim olsem? Em inapim ol mak em Baibel i kolim? (Lukim buk Lo, pes 97-99.) Sapos em i tok em i laik kamap pablisa, tokim wasman siaman long dispela samting na em i ken stretim rot bilong tupela elda i ken skelim dispela samting. Sapos em i winim mak bilong kamap pablisa i no baptais yet, singautim em long i go wantaim yu long autim tok. Wasman bilong wok autim tok na brata i lukautim Buk-Stadi, ol i mas helpim ol man ol i ting ol inap winim mak, na bai ol i ken kirap mekim wok pablisa long mun Epril.
6 Ol papamama i mas tingting gut, ol pikinini bilong ol inapim mak bilong kamap pablisa i no baptais yet o nogat? (Sng 148:12, 13) Sapos pikinini i tok em i laik autim tok na em i bihainim pasin i stret, yu ken toksave long wanpela elda long komiti bilong lukautim wok bilong kongrigesen. Tupela elda i ken bung wantaim yu na pikinini, na bai ol i ken save, pikinini inap kamap pablisa o nogat. Taim ol yangpela pikinini i helpim yumi long litimapim nem bilong God, yumi amamas tru!
7 I stret yumi mas lotu long Jehova tasol na mekim wok bilong em. (Lu 4:8) Tru tumas, yumi olgeta i gat gutpela wok bilong litimapim nem bilong em.—Sng 109:30; 113:3.