Helpim Ol Nupela Long Kamap Strong
1 Long April 17, 1992 klostu 11.5 milion manmeri i bung long olgeta hap bilong graun bilong mekim Memorial bilong indai bilong Krais. Dispela namba i winim tupela taim namba bilong olgeta pablisa i bung wantaim ol kongrigesen bilong ol Witnes Bilong Jehova. Taim yumi lukim ol bikpela lain man i bung long “maunten bilong Bikpela” yumi amamas tru! (Mai 4:2) Nau i gat 7 milion manmeri i bung wantaim trupela lotu, tasol ol i no kirap yet long litimapim nem bilong Jehova long ai bilong ol man. Yes, dispela tok bilong Jisas, “planti kaikai tumas i mau pinis,” i gat bikpela truim long nau!—Mt 9:37, 38.
2 Nau yumi mas givim bel long helpim ol nupela i winim pinis ol mak na bai ol i ken insait long wok autim tok. Brata i lukautim Buk-Stadi wantaim sampela pablisa na painia i gat gutpela save na i stap long grup bilong em ol i ken mekim dispela wok. Yumi laik winim tripela mak olsem: (1) yumi laik stretim rot na bai yumi ken mekim Baibel-stadi wantaim ol nupela man i bin kam long bikpela pablik-tok na Memorial long dispela yia; (2) yumi laik kirapim ol stadi long winim ol mak bilong kamap pablisa i no baptais yet; na (3) yumi yet i laik lusim sampela aua moa long autim tok.
3 Yumi olgeta i mas givim bel long sekan na kisim save long ol nupela man taim ol i kam long wanpela miting bilong yumi. Yumi ken mekim wanem bilong kirapim ol nupela long mekim Baibel-stadi long olgeta taim?
4 Long Amerika ol i bin mekim 585,441 Baibel-stadi long olgeta wan wan mun long yia bilong wok bilong 1992. Ol pablisa i ken askim brata i lukautim Buk-Stadi long go wantaim ol long Baibel-stadi bilong ol bambai em i ken save long dispela man o meri. (km-MP 4/81 pes 12) Ating sampela bilong ol dispela Baibel-stadi i save kam long ol miting i winim ol mak na bai ol i ken go autim tok long ol haus. Olsem wanem? Ol nupela i save autim tok long kain kain taim na ples? Ol i inapim ol mak bilong ol pablisa i no baptais yet olsem buk Lo, pes 97 inap 99 i tok? Sapos olsem, stori long olsem wanem ol i ken kirap long autim tok long ol haus, sapos ol elda i orait long ol i kamap pablisa i no baptais yet.
5 Yumi no ken lusim tingting long strongim ol narapela insait long lain Kristen. (Hi 10:24, 25) Sapos sampela i slek liklik long wok Kristen ol brata i lukautim Buk-Stadi i mas stretim rot bilong helpim na strongim ol. Long gutpela pasin yumi ken singautim ol long go wantaim yumi long autim tok na sampela taim dispela em inap long kirapim ol.
6 Sapos brata i lukautim Buk-Stadi i givim bel tru long go pas long wok autim tok, dispela i ken helpim tru ol narapela pablisa long grup bilong em long mekim olsem tu. Ating ol i ken makim sampela bung moa bilong i go autim tok. Em i ken stretim rot bilong helpim ol lapun na ol yangpela. Ol papamama i mas stretim ol samting na bai famili olgeta i ken insait long wok autim tok. Sapos nau long dispela taim bilong kisim ol kaikai i mau pinis, yumi olgeta i givim bel tru long Jehova bai em i blesim yumi tru.