Yumi Mas Givim Bel Tru Long Mekim Ol Gutpela Wok!
1 Taim yumi kamap klostu long Memorial bilong 2003, i gat planti as tru na yumi mas “wok strong long bihainim gutpela pasin.” (1 Pi. 3:13) Nambawan as tru em ofa bilong Jisas Krais bilong baim bek man. (Mt. 20:28; Jo. 3:16) Pita i stori olsem long dispela samting: “God . . . i no givim ol samting bilong graun i save bagarap, olsem silva na gol, bilong baim bek yupela. Nogat. Em i baim bek yupela long blut bilong Krais. Dispela blut em i dia tumas. Krais em i olsem wanpela pikinini sipsip i no gat mak o sua samting i bagarapim skin bilong en.” (1 Pi. 1:18, 19) Pasin bilong yumi long tenkyu long dispela gutpela pasin sori tru i save kirapim yumi long wok strong long mekim ol gutpela wok, long wanem, yumi save olsem Jisas “i lusim pinis laip bilong em yet, bilong kisim bek yumi na lusim olgeta sin bilong yumi, bai yumi stap klin tru na yumi stap lain manmeri bilong em yet, na yumi wok strong long mekim olgeta kain gutpela pasin.”—Ta. 2:14; 2 Ko. 5:14, 15.
2 Taim yumi mekim ol samting God i amamas long en, yumi bai pas gut wantaim em na em bai was long yumi. Pita i tok moa olsem: “Sapos man i laik bai laip bilong en i kamap gutpela, na em i laik lukim gutpela taim, orait em . . . i mas givim baksait long pasin nogut, na bihainim gutpela pasin tasol. Em i mas wok long kamap wanbel wantaim ol arapela manmeri, na em i mas strong long bihainim dispela pasin. Long wanem, Bikpela i save lukautim ol stretpela manmeri, na em i save putim yau long ol beten bilong ol.” (1 Pi. 3:10-12) Long dispela taim nogut, em i wanpela gutpela blesing tru long save olsem Jehova i was long yumi, na em i redi long mekim ol samting bilong helpim yumi, em i “lukautim gut [yumi] olsem kiau bilong ai bilong em.”—Lo 32:10, NW; 2 Sto. 16:9.
3 Maski ol Kristen bilong pastaim em Pita i salim pas long ol, ol i karim ol hevi, bel bilong ol i kirapim ol tru na ol i wok strong tru long autim gutnius long planti manmeri. (1 Pi. 1:6; 4:12) Na i wankain tu long ol manmeri bilong God long nau. Tru, yumi stap long taim bilong “planti hevi nogut tru,” tasol pasin bilong tenkyu long ol gutpela pasin bilong Jehova i save kirapim yumi long givim bel tru long mekim laik bilong God. (2 Ti. 3:1; Sng. 145:7) Yumi ken stori long sampela gutpela wok yumi bai mekim long dispela taim bilong Memorial.
4 Singautim Ol Narapela i Kam Long Memorial: Wanpela rot bilong soim olsem yumi tenkyu long dispela gutpela presen—pe bilong baim bek man—em yumi mas i stap long bung bilong tingim indai bilong Jisas, long dispela yia em bai kamap long Trinde, Epril 16, long taim san i go daun pinis. (Lu. 22:19, 20) Long yia 2002, inap 94,600 kongrigesen long olgeta hap i bin putim ripot, na inap 15,597,746 manmeri i bin bung long Memorial! Dispela namba i antap long namba bilong ol man i bin bung long 2001 inap olsem 220,000.
5 Hamas manmeri bai bung long dispela yia? Ating planti bai kam sapos yumi wok strong long kirapim ol narapela long i kam bung wantaim yumi. Pastaim wokim lista bilong olgeta manmeri yu laik singautim ol i kam long Memorial. Namba wan lain yu mas singautim em ol famili bilong yu. Sapos yu gat poroman i no bilip, kamapim bel bilong yu olsem yu laik tru bai em i mas kam wantaim yu long dispela bung. Wanpela man i no bilip i tok em i bin i go long Memorial las yia, long wanem, em i luksave olsem em i bikpela samting tru long meri bilong em sapos em i go long dispela bung. Ol narapela lain yu ken singautim em ol wantok, ol man i sindaun long hap bilong yu, ol wanwok, o ol wanskul. Singautim tu ol Baibel-stadi bilong yu.
6 Taim yu wokim pinis lista, makim taim bilong yu yet i mas i go na singautim ol dispela lain. Mekim wok long ol pepa bilong singautim man i kam long Memorial. Bilong helpim ol man long tingim gut taim na ples bilong mekim Memorial, raitim klia ol dispela samting daunbilo long pepa bilong singautim man. Taim Epril 16 i kam klostu, yu yet i ken i go lukim ol o yu ken mekim wok long telefon bilong kirapim gen tingting bilong ol dispela lain yu bin singautim. I gutpela yumi wok strong long helpim planti man moa long i kam long dispela bung i holi tru.
7 Helpim Ol Man i Kam Long Memorial: Nait bilong mekim Memorial em i taim bilong amamas. Yumi gat rot long tok welkam long ol manmeri em ol i no save kam long ol miting bilong yumi. Stretim rot bilong i go paslain tru long bung i kirap, na stap sampela taim moa bihain long bung i pinis sapos rot i op. Mekim ol samting bilong save gut long ol nupela man i kam bung. Mekim gutpela pasin pren long ol.—Ro. 12:13.
8 Olsem wanem? Yumi inap helpim sampela bilong ol man i kam long Memorial long kamap strong moa long ol samting bilong spirit long rot bilong wanpela Baibel-stadi? Bilong helpim ol, wok strong long kisim nem na atres bilong ol man i kam long bung em nau yet i no gat wanpela i save go lukim ol. Sapos yumi helpim ol gut, ating sampela bilong ol inap long winim mak na kamap pablisa i no baptais yet paslain long Memorial bilong neks yia. Taim yu go lukim ol man i bin kam long Memorial, singautim ol long i kam harim bikpela pablik-tok bai kamap long Epril 27.
9 Yu Inap Mekim Wok Painia Haptaim Long Mas na Epril? Long olgeta yia, pasin bilong yumi long givim bel long Jehova i save kirapim yumi long wok strong tru long autim tok long ol mun bilong mekim bikpela wok. Olsem: Long Mas 2002 inap 348 i bin mekim wok painia haptaim hia long Papua Niugini. Dispela namba i makim pasin bilong olgeta long kongrigesen long wok strong wantaim long givim bel long autim gutnius long taim bilong Memorial.
10 Long narapela kantri, wanpela kongrigesen we i gat 107 pablisa na 9-pela painia oltaim long en i stori olsem mun Epril bilong las yia i bin “wanpela gutpela mun tru,” na inap 53 i bin mekim wok painia haptaim, na olgeta elda na wokman tu i bin mekim wok painia haptaim. Olsem wanem ol elda i bin kirapim laik bilong ol pablisa long mekim wok painia haptaim long dispela mun? Paslain long mun Mas i kamap, ol i bin kirapim planti pablisa long insait long dispela wok. Ol i mekim ol bung bilong autim tok long ol narapela narapela taim long de na bai olgeta long kongrigesen i gat rot bilong autim tok. Ol i bin strongim tu pasin bilong autim tok long rot bilong telefon, na dispela i gutpela moa long ol man i lapun na ol i gat sik.
11 Wanpela lapun sista husat i gat 86 krismas na sik i mekim na em i no inap wokabaut, em tu i putim nem long mekim painia haptaim. Long moningtaim em i sindaun long tebol long haus kuk na autim tok long telefon inap sampela aua, bihain em i malolo inap sampela aua paslain long em i kirap gen long wok. Wanpela meri em lapun sista i autim tok long em, man na tupela pikinini man bilong em ol i bin i dai insait long 2-pela yia paslain, na meri i tingting planti long i gat wanem as na God i larim ol kain pasin nogut olsem i kamap. Lapun sista i autim gut ol tok long em na em i kirapim Baibel-stadi wantaim dispela meri. Wok bilong autim tok long telefon long ol apinun na long ol narapela taim tu, em i gutpela rot bilong toktok wantaim ol man i stap long ol haus o long ol ples i hatwok long i go long en. Dispela i opim rot tu long ol pablisa inap autim tok long ol man em ol i no save stap long haus long san.
12 Bilong pinisim dispela ripot, ol elda i tok: “Mipela i bin amamas tru na mipela i tenkyu tru long gutpela wok mipela i holim na long ol blesing Jehova i givim long mipela wan wan.” Sapos kongrigesen bilong yupela i stretim gut ol samting, yupela tu inap amamas long ol gutpela blesing olsem.
13 Taitim Bun na Bai Olgeta Pablisa i Insait Long Wok Autim Tok: Yumi laikim tru God na ol man i sindaun klostu long yumi, na dispela i save kirapim yumi long makim taim long olgeta mun long autim gutnius long ol narapela man. (Mt. 22:37-39) Ol wasman bilong Buk-Stadi na ol helpim bilong ol i mas wok strong long helpim ol pablisa long grup bilong ol na bai ol i insait long dispela wok long olgeta mun. Wanpela gutpela rot bilong mekim olsem em long stretim tok pastaim long wok wantaim sampela pablisa long grup. Kirap kwik long mekim olsem, na no ken wet i go inap long mun i laik pinis. Dispela bai opim rot long yu inap helpim gut ol pablisa.
14 Olsem wanem? I gat sampela pablisa long grup bilong yu em ol i lapun na ol i gat sik na i hatwok tru long ol i insait long wok autim tok? Sapos sampela i no inap lusim haus, orait yumi save olsem ol i no gat planti rot bilong autim tok. Tasol sapos ol i mekim gutpela wok long wanem wanem rot i op long ol i autim tok, ol inap kirapim ol man i lukim wok bilong ol long laikim tumas tok i tru. (Mt. 5:16) Wasman bilong Buk-Stadi i mas toksave long ol lapun olsem ol i ken putim ripot sapos ol i autim tok inap 15 minit. Taim ol i putim ripot long hamas minit ol i bin lusim long wok autim tok, dispela bai strongim ol dispela gutpela pablisa na givim bikpela amamas long ol. Na tu, em i helpim ol brata long kamapim stretpela ripot long wok bilong ol manmeri bilong God.
15 Ol Yangpela i Wok Strong Long Mekim Ol Gutpela Wok! Yumi amamas tru long lukim ol yangpela Kristen i yusim strong bilong ol long mekim wok bilong Jehova! (Snd. 20:29) Sapos yu wanpela yangpela, olsem wanem bai yu inap kamapim pasin bilong yu long givim bel long Jehova long ol dispela mun bilong mekim bikpela wok?
16 Sapos yu no mekim wok yet olsem wanpela pablisa i no baptais, yu ting yu inap winim mak bilong mekim dispela gutpela wok? Askim yu yet olsem: ‘Mi save long ol bikpela tok bilong Baibel? Mi gat laik long insait long ol wok bilong Kingdom? Mi stap gutpela piksa long narapela i ken bihainim? Mi inap kamapim bilip bilong mi long rot bilong toktok wantaim ol narapela long gutnius bilong Baibel? Bel i kirapim mi long mekim olsem?’ Sapos yu inap tok yes long ol dispela askim, orait toktok wantaim papamama bilong yu long laik bilong yu long kamap pablisa. Papamama bilong yu i ken toktok wantaim wanpela elda bilong Kongrigesen Sevis Komiti.
17 Olsem wanem? Sapos yu kamap pablisa pinis, yu inap mekim wok long hap taim bilong malolo long skul na mekim bikpela wok moa long autim tok? Gutpela sediul wantaim helpim ol i kisim long papamama na ol narapela i bin helpim planti yangpela i baptais pinis long mekim wok painia haptaim. Sapos yu no gat rot bilong mekim olsem, orait tingting strong long mekim bikpela wok moa bilong autim tok. Putim wanpela mak yu laik winim. Putim mak long hamas aua yu laik winim, na long mekim wok autim tok bilong yu i kamap gutpela moa. Ating yu ken wok strong long kamapim wanpela skripsa long olgeta man yu bungim long haus, kamap gutpela moa long mekim ol gobek, kirapim wanpela Baibel-stadi, o insait long ol narapela wok bilong autim tok na toktok wantaim man long telefon o long narapela rot. Olsem wanem long putim mak long kisim neiba bilong yu, o wanskul, o wantok i go wantaim yu long Memorial long dispela yia? Pasin bilong insait tru long ol wok tiokratik bai kamapim amamas na strongim ol narapela long kongrigesen.—1 Te. 5:11.
18 Helpim Ol Nupela Man Long Kamap Strong: Long sevis yia i go pinis, averes namba bilong ol Baibel-stadi long Papua Niugini em 3,189. Bihain, planti bilong ol dispela sumatin bai winim mak bilong dediket na baptais. Tasol paslain long ol i winim dispela mak, yumi mas helpim ol long winim mak bilong kamap pablisa. Dispela i bikpela samting long wok bilong skulim ol nupela man long kamap disaipel bilong Jisas Krais. (Mt. 9:9; Lu. 6:40) Olsem wanem? Yu gat wanpela Baibel-stadi i redi long winim dispela mak?
19 Sapos yu no klia gut olsem sumatin bilong yu i kamap strong o nogat, yu ken askim wasman bilong Buk-Stadi bilong yu o wasman autim tok long helpim yu. Ating yu ken singautim em long kam wantaim yu long mekim stadi. Ol dispela brata i gat ol save long mekim wok na dispela inap helpim ol long skelim sapos sumatin i wok long kamap strong long ol samting bilong spirit o nogat. Ating ol bai kamapim sampela gutpela tok bilong helpim sumatin long wok yet long kamap strong long ol samting bilong spirit.
20 Taim sumatin i kamapim laik bilong em long kamap pablisa i no baptais na yu pilim olsem em inap mekim dispela wok, yu ken toktok wantaim wasman siaman. Em bai stretim rot long tupela elda i ken bung wantaim yu na sumatin long skelim sapos sumatin i winim ol mak o nogat, na ol bai mekim wok long ol tok bilong buk Lo, p. 98-99. (Lukim Wastaua, Me 1, 1989, p. 18) Sapos ol elda i orait long sumatin i kamap pablisa, yu mas kirap kwik long lainim em long ol samting bilong wok autim tok. Taim em i putim ripot bilong wok autim tok, toksave bai kamap long kongrigesen olsem dispela sumatin i wanpela pablisa i no baptais. Yumi laik tru bai planti tausen nupela pablisa, ol lapun na yangpela wantaim, ol i ken winim dispela bikpela mak insait long ol dispela mun bilong mekim ol bikpela wok.
21 Pasin Bilong Stretim na Skelim Gut Ol Samting Bai Kamapim Gutpela Wok: Pasin bilong stretim na skelim gut ol samting pastaim bai helpim ol wok tiokratik yumi mekim long dispela taim bilong Memorial long kamap gutpela. (Snd. 21:5) I gat planti samting em ol elda i mas stretim na skelim gut.
22 Bilong helpim kongrigesen long mekim gutpela wok long wok autim tok, ol elda i mas stretim rot na bai i gat ol bung bilong autim tok namel long wik na long wiken. Wasman autim tok i mas go pas long stretim dispela samting. Olsem wanem? I gat rot bilong mekim sampela moa bung bilong autim tok long moningtaim tru o long apinun tru? Kongrigesen i mas kisim toksave long ol bung samting. I gutpela sapos sediul bilong wok autim tok i stap long notis-bot.
23 Ol elda i mas stretim gut ol samting bilong Memorial paslain tru long Epril 16. Olsem: Stretim tok wantaim ol narapela kongrigesen i bung long wankain Haus Kingdom long husat bai yusim Haus Kingdom pastaim, na tu, ol i mas stretim wok bilong klinim Haus Kingdom, makim ol atendan na ol brata bilong tilim bret na wain, na kisim na redim bret na wain. Toksave long kongrigesen long taim na ples bilong mekim Memorial, na toksave tu sapos ol senis i kamap long taim bilong mekim ol miting long wik bilong Memorial. Pasin bilong givim bel long stretim gut ol dispela samting bai mekim na bung bilong Memorial i “bihainim stret ol gutpela pasin bilong lotu.”—1 Ko. 14:40.
24 Ol het bilong famili i ken yusim hap taim bilong famili-stadi long toktok long olsem wanem famili inap insait long bikpela wok moa i kamap long taim bilong Memorial. Olsem wanem? Famili olgeta inap mekim wok painia haptaim? O famili inap helpim wanpela o sampela moa insait long famili long mekim olsem? Sapos i no gat rot long yupela inap mekim olsem, orait famili olgeta i ken putim mak long ol bai lusim bikpela hap taim moa long wok autim tok. Olsem wanem? Yupela i gat wanpela yangpela long famili, em sapos yupela i strongim em na helpim em, bai em inap winim mak bilong kamap pablisa i no baptais? Famili bilong yu inap singautim hamas man i kam long Memorial long dispela yia? Pasin bilong stretim na skelim gut ol samting bai helpim famili long kisim planti blesing na amamas.
25 Mekim Gutpela Wok Long Hap Taim i Stap Yet: Taim aposel Pita i salim pas i go long ol Kristen long taim bilong em, em i kirapim ol long tingim olsem taim i sot pinis, long wanem, ol pasin na lo ol Juda i stap aninit long en klostu tru bai i pinis. (1 Pi. 4:7) Long nau, ol samting i kamap i makim klia tru olsem pinis bilong ol pasin nogut bilong nau i klostu tru. Long olgeta de, pasin yumi bihainim long i stap bilong yumi i mas kamapim klia yumi bilip tru long dispela samting. Yumi ol wokman bilong Jehova i givim bel tru long em, yumi mas tingting long mekim bikpela wok bilong autim gutnius, em wanpela wok yumi mas wok strong long mekim.—Ta. 2:13, 14.
26 Nau em i taim bilong kamapim pasin bilong givim bel tru na wok strong! Tingim tingim long bel ol samting Jehova i bin mekim bilong helpim yu, famili, na kongrigesen bilong yu. Yumi no inap givim ol samting i olsem pe stret bilong ol gutpela samting Jehova i bin mekim bilong helpim yumi, tasol yumi inap givim bel olgeta long lotuim em. (Sng. 116:12-14) Taim yumi givim bel olgeta long mekim olsem, Jehova bai givim yumi planti blesing. (Snd. 10:22) Yumi olgeta i ken “wok strong long bihainim gutpela pasin” long dispela taim bilong mekim bikpela wok, ‘olsem bai ol man i ken lukim olgeta samting yumi mekim, na long nem bilong Jisas Krais ol i ken litimapim nem bilong God.’—1 Pi. 3:13; 4:11.
[Blok long pes 3]
Namba Bilong Ol Manmeri i Kam Long Memorial Long Olgeta Hap
1999 14,088,751
2000 14,872,086
2001 15,374,986
2002 15,597,746
[Blok long pes 4]
Bai Yu Singautim Husat i Kam Long Memorial?
□ Ol famili na wantok
□ Ol neiba na pren
□ Ol wanwok na wanskul
□ Ol gobek na Baibel-stadi
[Blok long pes 5]
Helpim Ol Man i Kam Long Memorial
□ Tok amamas long ol i kam
□ Go bek lukim ol
□ Tokim ol long yu laik stadi wantaim ol long Baibel
□ Singautim ol long i kam harim bikpela pablik-tok
[Blok long pes 6]
Yu Laik Winim Wanem Ol Mak Long Taim Bilong Memorial?
□ Bringim wanpela em yu bin singautim i kam long Memorial
□ Winim mak bilong kamap pablisa
□ Winim sampela aua long wok autim tok
□ Kamap gutpela moa long wanpela hap wok bilong autim tok
□ Mekim wok painia haptaim