Helpim Ol Baibel-Stadi Long Redim Stadi
1 Sapos ol Baibel-stadi i redim stadi bilong ol long olgeta wik, dispela bai makim olsem ol i laikim tru stadi na ating ol bai kamap strong hariap long ol samting bilong spirit, winim ol man i no redim stadi. Sampela taim sumatin i no redim stadi, long wanem, em i no save long pasin bilong mekim olsem. Ating yumi mas lainim em. Yumi ken mekim olsem wanem?
2 Kirap long namba wan stadi, lusim liklik hap taim bilong helpim sumatin long save, bilong redim gut stadi, em yet i mas stadi. Planti man i save long rit, tasol narapela i no bin skulim ol long pasin bilong stadi. Buk Bilong Skul, pes 9-12, i kamapim planti gutpela tok yu ken kamapim long Baibel-stadi bilong yu.
3 Helpim Sumatin Long Save Olsem Wanem Pasin Bilong Stadi Inap Helpim Em: Soim buk bilong yu yet long sumatin na sampela hap tok yu bin katim. Helpim em long save, taim em i lukim ol hap olsem yu katim pinis, dispela inap kirapim em long tingim gen sampela tok em i ken kamapim long toktok bilong em yet. Sapos em i mekim olsem, orait taim em i bekim tok, bai em i no kaunim planti tok stret long ol paragraf. Sapos pastaim yu skulim em gut, dispela bai helpim em long bekim gut tok long ol miting bilong kongrigesen long bihain. Ol tok em i bekim bai kamapim klia olsem, em i pilim tru ol tok na em i kisim gut o nogat.
4 Lainim Em Long Mekim Wok Long Baibel: Sumatin i mas lain long pasin bilong painim ol skripsa long Baibel em paragraf i kolim. Taim em inap mekim gut dispela samting, bai em i pilim moa yet olsem em i wanpela sumatin tru bilong Baibel. Ating pastaim em i mas lukim lista bilong ol 66 buk bilong Baibel, tasol kirapim sumatin long save gut wanem ol buk i kamap pastaim na wanem ol buk i kamap bihain olsem ol i raitim long Baibel. Taim em i opim Baibel na kaunim skripsa, helpim em long save wanem hap bilong dispela skripsa i stret long ol tok bilong paragraf em yutupela i stori long en—nogut ol narapela hap bilong skripsa i no stret long ol tok bilong stadi i pulim tingting bilong em.
5 Taim sumatin i wok long kamap strong, kirapim em long kaunim Baibel, kirap long namba wan buk i go inap long laspela buk. Stori gut, God i bin kamapim olgeta tok bilong Baibel, na ol Kristen tru i mas kaunim bambai ol inap kisim strong long ol samting bilong spirit.—Mt 4:4; 2 Ti 3:16, 17.
6 Kamapim Sampela Narapela Buk i Gat Tok Bilong God Long En: Taim sumatin i kamap strong liklik, em i ken mekim wok long sampela narapela buk, olsem buk Toktok Gut. Sapos yu ting i gutpela long mekim, kirapim em long lukim sampela buk moa bilong Sosaiti na bai em i ken kisim sampela save moa, em ol buk em bai mekim wok long en taim em i kam long ol miting.
7 Sapos yumi lainim ol Baibel-stadi long pasin bilong redim gut stadi, orait, maski stadi bilong ol i pinis, bai ol i wok yet long stadi gut na kisim save long tok i tru.
This is a repeat of article in km 10/94 taken from km-E 11/93, “Help Bible Students Prepare for Their Study.”