Askim

◼ Paslain long ol elda i tok orait long pablisa i no baptais yet long kisim baptais, em i mas winim wanem ol mak bilong kam long ol miting bilong kongrigesen na long wok autim tok?

Bilong kisim baptais, dispela em i wanpela bikpela disisen pablisa i mas mekim. Olsem na paslain long ol elda i tok orait long wanpela pablisa i kisim baptais, em i mas kliagut long ol samting God i laik em i mas mekim. Na tu, em i mas kamapim klia pinis olsem em i tingting strong long bihainim ol lo bilong God long i stap bilong em.

Baibel i tok ol Kristen i no ken lusim pasin bilong bung wantaim, so pablisa i no baptais yet i mas kirap pinis long kam long olgeta miting bilong kongrigesen. (Hib. 10:24, 25) Na tu, em i mas insait long bekim ol tok long ol miting. Na ating em i insait long Skul Tiokratik Bilong Autim Tok, tasol dispela i no olsem wanpela lo.

Na tu, Jisas i givim wok long ol Kristen long autim gutnius na kamapim ol disaipel, olsem na pablisa i no baptais yet i mas insait tu long wok autim tok long olgeta taim paslain long em i kisim baptais. (Mat. 24:14; 28:19, 20) Em i mas stap pablisa i no baptais inap hamas mun paslain long em i ken baptais? Tru, i mas i gat sampela haptaim i lus bambai em i ken kamapim klia olsem em i tingting strong pinis long insait long wok autim tok long olgeta wan wan mun na givim bel olgeta long mekim. (Sng. 78:37) Tasol, kirap long taim em i kamap pablisa i no baptais na i go inap long taim em i winim ol mak bilong kisim baptais, dispela haptaim i no ken longpela taim tumas. Hamas aua em i mas winim long autim tok? I no gat strongpela lo long dispela. Ol elda i mas skelim hevi na sindaun bilong olgeta wan wan pablisa, na bihainim stretpela tingting taim ol i skelim ol.—Luk 21:1-4.

Ol elda (o kongrigesen sevan long kongrigesen we i no gat planti elda) husat i sindaun wantaim pablisa i laik kisim baptais, ol i mas tingim olsem olgeta man i no wankain, na ol i mas bihainim savetingting taim ol i skelim em sapos em i winim mak long kisim baptais. Ol i laik lukim olsem pablisa i gat laik tru long kamap wanpela Witnes Bilong Jehova na kamapim klia em i pilim olsem em i gutpela samting tru long bung wantaim oganaisesen bilong Jehova na insait long wok autim tok. Ol elda bai save olsem em i no kamap strong yet o em i no kisim yet ol pasin bilong autim gut tok olsem ol man i baptais pinis. Sapos ol i pilim olsem em i no winim mak bilong kisim baptais, long gutpela pasin ol i mas kamapim ol tok bilong Baibel i as bilong disisen ol i mekim, na helpim em long wok long kamap strong.