Apendiks

Tok i Go Long Ol Papamama Kristen:

Yupela ol papamama i laik helpim ol pikinini bilong yupela long laikim Jehova na dediketim ol yet long em. Yupela i ken mekim wanem bilong helpim ol pikinini bilong yupela long redi long kisim baptais? Wanem taim stret bai ol i redi long mekim dispela bikpela samting?

Jisas i tokim ol disaipel bilong em olsem: “Yupela i mas i go na kamapim ol disaipel long olgeta lain man, na baptaisim ol.” (Mat. 28:19) Olsem dispela ves i tok, bilong kisim baptais, bikpela samting em olsem man i mas kamap wanpela disaipel—em i mas kliagut na bilip long ol tok bilong Krais na em i mas bihainim. Ol pikinini tu inap long mekim dispela samting.

Yu mas stap gutpela piksa long ol pikinini bilong yu, na skulim ol long lo bilong Jehova. (Lo 6:6-9) Yu ken yusim ol tok i stap long buk Stap Amamas Oltaim! long skulim ol long ol bikpela tok i tru bilong Baibel, na long helpim ol long skelim gut ol stiatok bilong Baibel na wokim gut tingting na bihainim ol dispela stiatok. Helpim ol pikinini long tokaut long bilip bilong ol long toktok bilong ol yet. (1 Pita 3:15) Ol gutpela tok bilong strongim ol wantaim save em yu givim long ol, na stadi bilong ol yet, famili lotu, ol miting, na ol gutpela poroman, olgeta dispela samting bai helpim ol long winim mak bilong kisim baptais na mekim ol gutpela wok. Helpim ol long putim sampela mak bilong mekim wok bilong God.

Buk Provep 20:11 i tok: “Long pasin bilong pikinini, ol man inap luksave sapos pasin bilong em i gutpela na i stret o nogat.” Wanem sampela samting inap soim olsem pikinini man o pikinini meri i kamap wanpela disaipel bilong Jisas Krais na em i redi long baptais?

Pikinini i wok long winim mak bilong kisim baptais, em i mas bihainim tok bilong papamama bilong em. (Apo. 5:29; Kol. 3:20) Taim Jisas i gat 12-pela krismas, Baibel i tok: “Em i stap daun yet long [papamama bilong em].” (Luk 2:51) Em tru olsem pikinini bilong yu bai mekim ol popaia. Tasol pikinini i laik kisim baptais bai wok strong long bihainim pasin bilong Jisas na ol narapela bai luksave long pasin bilong em long daun long papamama bilong em.

Pikinini bai kamapim long pasin bilong em olsem em i laik tru long save long ol tok i tru bilong Baibel. (Luk 2:46) Olsem wanem? Em i gat laik long go long ol miting na insait long ol? (Sng. 122:1) Em i save ritim Baibel long olgeta de na mekim stadi bilong em yet?—Mat. 4:4.

Pikinini i wok long winim ol mak bilong kisim baptais i save putim ol samting bilong Kingdom i stap namba 1. (Mat. 6:33) Em i luksave long wok em i mas mekim bilong tokim ol narapela long bilip bilong em. Em i save insait long kain kain rot bilong autim tok na em i no sem long tokim ol tisa na ol wanskul bilong em olsem em i wanpela Witnes Bilong Jehova. Sapos em i gat tok long mekim long Miting Bilong Laip na Wok Autim Tok, em i tingim dispela i bikpela samting.

Na tu, em bai wok strong long stap klin long ai bilong God long rot bilong abrusim ol poroman nogut. (Prov. 13:20; 1 Kor. 15:33) Dispela i kamap klia long wanem kain musik em i harim, ol muvi na ol program long TV em i lukim, na ol vidio gem em i save pilai, na pasin bilong em long mekim wok long Intenet.

Hatwok bilong papamama long helpim ol pikinini i mekim na planti pikinini i pilim tok i tru na ol i winim mak bilong kisim baptais taim ol i yangpela yet. Jehova i ken blesim yupela taim yupela i helpim ol pikinini long kisim baptais na pas gut wantaim em.

Tok i Go Long Pablisa i No Baptais:

Em i wanpela gutpela samting tru long yu ken wok wantaim kongrigesen olsem wanpela pablisa i no baptais. Mipela i laik tok amamas long yu wok long kamap strong long sait bilong bilip. Yu bin kisim save long God long rot bilong stadi long Baibel na yu bin kamapim olsem yu bilip long ol promis bilong em.—Jon 17:3; Hib. 11:6.

Ating taim yu no kirap stadi yet wantaim ol Witnes Bilong Jehova, yu bin bung wantaim narapela lotu o yu no save go long wanpela lotu. O ating yu bin mekim sampela narapela samting i no stret wantaim ol stiatok bilong Baibel. Tasol nau yu bin kamapim bilip bilong yu long rot bilong tanim bel, olsem yu bel hevi tru long ol rong yu bin mekim. Yu bin kamapim tu bilip bilong yu long rot bilong baut, olsem yu sakim ol pasin nogut bipo yu bin mekim na yu tingting strong long mekim ol samting God i orait long en.—Apo. 3:19.

O ating “taim yu stap bebi yet” yu bin save long ol Rait Holi. Olsem na yu no bin insait long pasin i no stret long ol Kristen i mekim na long ol bikpela rong. (2 Tim. 3:15) Yu bin lain long sakim pasin bilong ol wanlain long pulim yu na ol narapela samting i laik pulim yu long mekim ol samting nogut long ai bilong Jehova. Yu bin kamapim bilip bilong yu long rot bilong holimpas strong lotu i tru na autim ol bilip Kristen long ol arapela man. Yu bin kisim skul long mekim wok Kristen em wok autim tok. Nau yu pasim tok long bel long yu laik mekim wok bilong Jehova olsem wanpela pablisa i no baptais.

Maski yu bin kisim save long pasin bilong Jehova kirap long taim yu liklik yet o yu bin kisim save long em taim yu bikpela pinis, ating nau yu tingting long tupela narapela samting yu laik mekim long kamap strong long bilip—em dediket na baptais. Yu dediket long Jehova long rot bilong beten na tokim em long yu laik givim bel olgeta long lotuim em inap oltaim oltaim. (Mat. 16:24) Bilong makim olsem yu dediket pinis, yu mas kisim baptais. (Mat. 28:19, 20) Long rot bilong dediket na baptais, yu kamap wanpela wokman bilong God Jehova. Em i wanpela gutpela samting tru!

Olsem yu bin kisim save long en taim yu stadi long Baibel, sampela hevi bai bungim yu. Tingim, bihain liklik long Jisas i kisim baptais, “holi spirit i bringim Jisas i go long ples nating na Devil i traim em.” (Mat. 4:1) Taim yu kisim baptais pinis olsem disaipel bilong Krais, sampela traim moa bai painim yu. (Jon 15:20) Ol traim bai kain kain. Ating famili bilong yu bai birua long yu. (Mat. 10:36) Ol wanskul, ol wanwok, na ol pren bilong bipo inap tok bilas long yu. Tasol oltaim yu mas tingim tok bilong Jisas i stap long Mak 10:29, 30. Em i tok, “Mi tok tru long yupela: Olgeta man i ting long mi na long gutnius na i lusim haus o ol brata o ol susa o mama o papa o ol pikinini o ol gaden, ol bai kisim 100 taim moa long dispela taim, bai ol i kisim ol haus, ol brata, ol susa, ol mama, ol pikinini, na ol gaden. Na tu, ol man bai mekim nogut long ol. Na ol bai kisim laip oltaim long taim i kamap bihain.” Olsem na wok strong long stap klostu long Jehova na bihainim ol stretpela lo bilong em.

Sapos yu laik kisim baptais, orait toksave long kodineta bilong lain elda. Ol askim bai kamap bihain i as bilong toktok ol elda bai mekim wantaim yu bilong ol i ken save yu winim mak bilong kisim baptais o nogat. Yu inap kirap nau long skelim ol dispela askim olsem wanpela hap bilong stadi bilong yu yet.

Bilong redi long toktok wantaim ol elda long ol dispela askim, makim taim bilong ritim na skelim ol skripsa ol i raitim tok bilong en. Ating yu laik raitim sampela tok bilong yu yet long dispela buk o long wanpela hap pepa. Yu ken lukluk long dispela pepa na buk taim yu toktok wantaim ol elda. Sapos yu hatwok long kliagut long sampela askim, no ken pret long askim brata o sista i stadi wantaim yu long Baibel o ol elda long helpim yu.

Taim yu toktok wantaim ol elda, no ken ting yu mas givim ol longpela bekim o kamapim kain kain tok bilong bekim ol askim. Yu ken mekim sotpela tok i bekim stret askim na mekim long toktok bilong yu yet. Bilong bekim ol askim, i gutpela long kolim wanpela o tupela skripsa bilong soim olsem Baibel i as bilong bekim bilong yu.

Sapos yu no bin kisim inap save long ol bikpela tok bilong Baibel, ol elda bai stretim rot long yu ken kisim helpim na bai yu inap kamapim long tok bilong yu yet olsem yu kliagut long ol tok bilong Baibel, na yu winim mak bilong kisim baptais long bihain.

[Toksave i go long ol elda: Ol tok long pasin bilong mekim ol askim long lain i laik kisim baptais i stap long pes 208-212.]