Ol Laspela Tok Bilong Mekim Wantaim Ol Man i Laik Kisim Baptais

Ol man i save kisim baptais long ol kibung bilong ol Witnes Bilong Jehova. Long pinis bilong tok bilong baptais, brata i mekim tok bai tokim ol man i laik kisim baptais long sanap na bekim dispela tupela askim long strongpela nek:

1. Yu hevi long ol sin yu bin mekim na yu tanim bel na dediket pinis long Jehova na bilip long samting em i mekim bilong kisim bek ol manmeri long rot bilong Jisas Krais?

2. Yu kliagut olsem taim yu baptais pinis, dispela samting i makim olsem nau yu wanpela Witnes Bilong Jehova na yu insait long oganaisesen bilong Jehova?

Taim ol man i laik kisim baptais i tok yes long ol dispela askim, i olsem ol i “tokaut . . . long ai bilong ol manmeri” olsem ol i bilip long pe bilong baim bek ol man na ol i bin dediket tru long Jehova. (Rom 10:9, 10) I gutpela ol man i laik kisim baptais i beten na tingting gut pastaim long ol dispela askim na bai strongpela bilip bilong ol i as bilong tok ol i kamapim.

Yu bin dediket pinis long Jehova long rot bilong beten na tok promis long lotuim em wanpela tasol na mekim laik bilong em i stap namba 1 samting long laip bilong yu?

Yu bilip tru olsem i stret yu mas kisim baptais nau?

Wanem kain klos i stret long werim na kisim baptais? (1 Tim. 2:9, 10; Jon 15:19; Fili. 1:10)

Yumi mas bilas long “pasin i soim rispek na gutpela tingting” na bai yumi kamapim klia olsem yumi “lotuim God.” Olsem na ol lain i laik kisim baptais i no inap werim ol samting i no haitim gut skin na ol klos i gat sampela rait o edvetaismen o piksa long en. Ol i mas werim ol klos i gutpela, klin, na i stret long werim na kisim baptais.

Man i mas bihainim wanem kain pasin taim em i kisim baptais? (Luk 3:21, 22)

Baptais bilong Jisas i stap olsem piksa bilong baptais Kristen long nau. Jisas i save olsem baptais em i bikpela samting, na tingting na pasin bilong em i kamapim klia dispela samting. Olsem na ples bilong kisim baptais i no ples bilong tok pani, o swim, o mekim narapela samting i daunim dispela bung i bikpela samting. Na nupela Kristen i no ken mekim pasin i olsem em i bin win long wanpela bikpela resis samting. Baptais em i taim bilong amamas, tasol yumi mas kamapim amamas long gutpela pasin rispek.

Olsem wanem pasin bilong go oltaim long ol miting na bung wantaim kongrigesen inap helpim yu long truim dediket bilong yu?

Taim yu baptais pinis, bilong wanem em i bikpela samting long yu mas bihainim yet gutpela sediul bilong mekim stadi bilong yu yet na autim tok oltaim?

TOK I GO LONG OL ELDA BILONG KONGRIGESEN

Taim wanpela pablisa i no baptais i toksave long ol elda olsem em i laik kisim baptais, ol i mas tokim em long skelim gut hap “Ol Askim Bilong Givim Long Ol Man i Laik Kisim Baptais,” i stap long pes 185-207. Ol i mas tokim em long lukim hap “Tok i Go Long Pablisa i No Baptais,” kirap long pes 182, em dispela hap i stori long olsem wanem em i ken redi long toktok wantaim ol elda. Olsem dispela hap i tok, man i laik kisim baptais em i ken lukluk long pepa em yet i bin raitim sampela tok long en na dispela buk i ken op i stap taim em i toktok wantaim ol elda. Tasol i no gat wok long wanpela i skelim ol dispela askim wantaim em paslain long em i bung wantaim ol elda.

Wanpela i laik kisim baptais i mas toksave long kodineta bilong lain elda. Bihain long man i laik kisim baptais i redi gut bilong bekim ol askim i stap long “Ol Askim Bilong Givim Long Ol Man i Laik Kisim Baptais,” kodineta bilong lain elda bai askim man i laik kisim baptais olsem em i bin dediket pinis long Jehova bilong mekim laik bilong em o nogat. Sapos man i laik baptais i bin dediket pinis, orait kodineta bilong lain elda bai stretim rot long 2-pela elda i ken skelim “Ol Askim Bilong Givim Long Ol Man i Laik Kisim Baptais” wantaim dispela man. Sapos wanpela elda i lukautim hap 1, orait narapela elda i mas lukautim hap 2. Bilong skelim ol dispela askim, i no gat wok long wet i go inap long taim ol i toksave long kibung bai kamap.

Ol elda i ken bung 2-pela taim wantaim man i laik kisim baptais bilong skelim dispela 2-pela hap, longpela bilong wan wan bung em inap olsem wanpela aua. Tasol i no gat rong long lusim sampela haptaim moa, sapos yupela i mas mekim olsem. Em i gutpela long kirapim na pinisim ol dispela bung long rot bilong beten. Man i laik kisim baptais na ol elda tu i no ken hariap hariap long skelim ol askim. Ol elda ol i makim i mas kirap hariap long wokim sediul bilong bung wantaim man i laik kisim baptais.

I gutpela long skelim ol askim wantaim ol man wan wan i laik kisim baptais, na no ken bungim ol olsem grup. Taim ol elda i mekim olgeta askim long wan wan man i laik kisim baptais, ol bai luksave long em i kliagut long ol tok o nogat, na em i redi long kisim baptais o nogat. Na tu, taim i no gat ol narapela i stap, ating man i laik kisim baptais inap kamapim gut moa tingting bilong em. Tupela marit i ken stap wantaim taim ol elda i kamapim ol askim.

Taim wanpela sista i laik kisim baptais, elda i mas stretim rot long bung wantaim em long hap we ol man inap lukim ol na em i ken kamapim ol askim, tasol ol arapela i no ken harim ol toktok i kamap. Sapos i gat wok long kisim narapela i go wantaim em long givim ol askim, i gutpela em i wanpela elda o kongrigesen sevan. Ol i ken mekim olsem sapos i stret long hap bilong ol askim ol bai skelim, olsem neks paragraf bai stori.

Sapos kongrigesen i no gat planti elda, orait ol kongrigesen sevan i gat pasin bilong skelim gut ol samting i ken skelim ol askim i stap long “Hap 1−Ol Bilip Kristen” wantaim man i laik kisim baptais. Ol elda tasol i mas mekim “Hap 2−Bihainim Pasin Kristen.” Sapos kongrigesen i no gat inap elda, orait ol i ken toksave long wasman sekit bilong skelim sapos ol elda long narapela kongrigesen inap helpim ol.

Sapos liklik pikinini i laik kisim baptais, orait papa o mama (papamama) bilong pikinini i mas stap wantaim pikinini taim ol elda i laik stori wantaim pikinini long ol askim bilong baptais. Sapos papa o mama (papamama) i no inap stap long taim ol elda bai stori wantaim pikinini long ol askim bilong baptais, orait 2-pela elda (o wanpela elda na wanpela kongrigesen sevan, sapos ol bai stori long hap 1) i ken stori wantaim pikinini.

Ol elda i laik save, man i laik kisim baptais i kliagut long ol bikpela tok bilong Baibel o nogat. Na tu, ol i laik painimaut olsem dispela man o meri i pilim tru tok i tru na i soim olsem em i rispek long oganaisesen bilong Jehova. Sapos man i no kliagut long ol bikpela tok bilong Baibel, ol elda bai stretim rot long wanpela i helpim em na bai em i ken winim mak bilong kisim baptais long bihain. Ating sampela i mas kisim sampela haptaim moa bilong soim olsem ol i tingim tru wok autim tok o soim olsem ol i daun long ol samting oganaisesen i putim. Em samting bilong ol elda yet long makim olsem wanem ol bai lusim klostu 1-pela aua bilong skelim ol wan wan askim, tasol bikpela samting ol i laik save tru olsem man i laik kisim baptais i redi long mekim dispela bikpela samting o nogat. Ating ol elda i mas toktok longpela taim liklik long sampela askim na liklik taim tasol long sampela, tasol ol i mas kamapim olgeta askim.

Ol elda ol i makim bilong helpim man i laik kisim baptais, ol bai bung bihain long namba 2 taim ol i bin toktok wantaim em na ol bai skelim sapos i stret em i kisim baptais o nogat. Ol elda bai tingim ol samting bilong man i laik kisim baptais, olsem hap em i go bikpela long en, strong na save bilong em, na sindaun bilong em. Bikpela samting em bilong skelim olsem ol man i laik kisim baptais ol i givim bel long Jehova na ol i kliagut long ol bikpela tok i tru bilong Baibel o nogat. Taim yupela i mekim gutpela pasin na helpim ol man i laik kisim baptais, ol bai redi long insait long dispela bikpela wok bilong autim gutnius em Kristen i mas mekim.

Bihain, wanpela o tupela elda wantaim bai bung wantaim man i laik kisim baptais na toksave long em i winim dispela mak o nogat. Sapos em i winim mak, ol dispela elda i mas skelim wantaim em dispela hap “Ol Laspela Tok Bilong Mekim Wantaim Ol Man i Laik Kisim Baptais,” i stap long pes 206-207. Sapos man husat bai kisim baptais i no pinisim yet stadi bilong em long buk Stap Amamas Oltaim!, orait ol elda bai kirapim em long pinisim stadi long dispela buk bihain long em i kisim baptais. Toksave long man bilong kisim baptais olsem ol bai raitim det bilong em i kisim baptais long Pablisa Rekod Bilong Kongrigesen. Tokim em olsem ol elda i kisim ol dispela infomesen long em na bai oganaisesen i ken stretim ol wok lotu bilong ol Witnes Bilong Jehova long olgeta hap na bai em i ken insait long ol wok lotu na kisim helpim na dareksen long ol elda. Na tu, ol elda i ken tokim nupela pablisa olsem ol bai bihainim lo bilong Global Data Protection Policy of Jehovah’s Witnesses i stap long jw.org long ol infomesen bilong em. Ol bai lusim 10-pela minit samting bilong toktok wantaim em long dispela.

Bihain long wanpela yia long pablisa i kisim baptais, 2-pela elda i mas bung wantaim dispela pablisa bilong givim sampela tok bilong strongim na helpim em. Wanpela bilong ol dispela elda em wasman bilong grup em pablisa i stap long en. Sapos nupela pablisa em wanpela pikinini, orait papamama Kristen o wanpela bilong tupela i mas stap long dispela bung. Mekim dispela bung long gutpela pasin na long pasin i strongim pablisa. Ol elda bai stori long sampela samting em pablisa i mekim long kamap strong long bilip. Na ol bai givim em sampela tingting long olsem wanem em i ken wok yet long mekim stadi bilong em yet na long ritim Baibel long olgeta de, mekim famili lotu, go long olgeta miting na insait long ol, na long autim tok long olgeta wik. (Efe. 5:15, 16) Sapos pablisa i no pinisim yet stadi bilong em long buk Stap Amamas Oltaim!, orait ol elda i mas stretim rot bilong wanpela long stadi wantaim dispela pablisa. Ol i mas givim gutpela tok amamas long pablisa. Taim ol elda i givim sampela tok bilong helpim pablisa, i gutpela ol i kamapim wanpela o tupela poin tasol.