Mekim Wok Autim Tok i Kamap Gutpela Moa—Redim Ol Kirap Bilong Tok

Em i Bikpela Samting: Sapos kirap bilong tok bilong yumi i no kirapim tingting bilong man, em bai katim tok bilong yumi paslain long yumi autim tok long em. Olsem na planti pablisa i save tingim olsem kirap bilong tok i bikpela samting taim ol i autim tok. Wok Kingdom na buk Toktok Gut i save kamapim ol kirap bilong tok yumi ken mekim bilong autim tok, tasol ol i no kamapim olgeta tok bilong kirapim tok, olsem na yu inap senisim liklik. Tasol maski ol i kamapim olgeta tok bilong kirapim tok, sampela pablisa bai laik long senisim liklik o ol yet i redim wanpela kirap bilong tok. Wok autim bilong yumi bai kamapim gutpela samting sapos yumi redim gut ol kirap bilong tok na yumi no kamapim nating wanpela tok i kam tasol long tingting taim man i opim dua.—Snd. 15:28.

Rot Bilong Mekim:

Makim wanpela atikol yu laik stori long en. Em stori i stap long magasin samting yu laik tilim na ol man long teritori bai laikim.
Redim gut ol tok yu bai mekim bihain long yu tok moning pinis long man bilong haus. Yu ken kirapim tok olsem: “Mipela i kam long wanem . . . ,” “Planti man i tingting planti long . . . ,” “Mi laik kisim tingting bilong yu long . . . ,” o yu ken kamapim narapela tok. Taim yu mekim sotpela tok na i klia, dispela i save kamapim gutpela samting. Sampela pablisa i save putim long tingting ol kirap bilong tok ol bai mekim.
Redim ol gutpela askim we bai pulim tingting bilong man long toktok. (Mat. 17:25) Tingim, ating em i wok long tingting long narapela samting taim yu kam kamap, olsem na no ken kamapim askim we i hatwok long em i bekim o i semim em.

Long Dispela Mun, Traim Dispela:

Makim haptaim bilong famili lotu long redim sampela kirap bilong tok na mekim prektis long en.
Long taim bilong autim tok, stori wantaim ol narapela pablisa long ol kirap bilong tok em yu laik kamapim. (Snd. 27:17) Sapos kirap bilong tok bilong yu i no kamapim gutpela samting, yu ken senisim.