Redim Gutpela Kirap Bilong Tok
1. Bilong wanem em i bikpela samting long mekim gutpela kirap bilong tok?
1 Olsem switpela kaikai man i kisim i kirapim laik bilong em long kaikai moa, pasin bilong mekim gutpela kirap bilong tok i kirapim laik bilong man long harim gutpela tok bilong Baibel. Wankain long ol switpela kaikai, bilong mekim gutpela kirap bilong tok, pastaim yumi mas tingim tingim na redi gut. (Snd. 15:28) Olsem wanem yumi inap mekim gutpela kirap bilong tok?
2. Olsem wanem yumi inap redim gutpela kirap bilong tok?
2 Toktok Long Samting Man Bai Amamas Long En: Ol kirap bilong tok yumi mekim inap kirapim laik bilong man long harim tok, o em bai les long harim. Olsem na taim yu redim ol samting bilong autim tok, tingim samting ol man bai amamas long toktok long en. Olsem wanem? Ol man long teritori i laikim gutpela gavman, famili i stap amamas, o ol i laik bai pasin bilong pait i pinis? Planti taim ol man i laik kamapim tingting bilong ol, olsem na redim ol gutpela askim bilong kirapim ol long kamapim tingting bilong ol. Olsem wanem? Yu inap yusim wanpela kirap bilong tok i stap long Wok Kingdom na senisim liklik na bai i stret long teritori? Yupela inap mekim traim sampela kirap bilong tok long taim bilong Famili Lotu?
3. Hau bai yumi senisim kirap bilong tok na i stret long ol man bilong narapela ples i sindaun long teritori bilong yumi?
3 Tingim Pasin Bilong Ples Bilong Ol: Long sampela ples, man bilong haus i laik bai yumi toksave kwik long as na yumi go lukim ol. Na long sampela hap, ol i ting i no gutpela pasin sapos yumi kirapim tok kwiktaim na yumi no tok gude long ol o tokim ol long yumi husat na bilong wanem yumi go lukim ol. Long ol narapela hap, ol man i gat lotu ol i amamas taim yumi tokim ol olsem yumi laik stori long Baibel. (Apo. 2:14-17) Tasol long ol man i no bilong lotu Kristen o ol man i no gat lotu, no ken stori long Baibel taim yumi bungim ol namba 1 taim, i gutpela long stori long Baibel long taim yumi mekim gobek.—Apo. 17:22-31.
4. Bilong wanem yumi mas tingim gut ol tok yumi mekim bilong kirapim tok?
4 Ol Tok Yu Mekim Bilong Kirapim Tok: Redim gut ol tok bilong kirapim tok. I gutpela long mekim ol tok i sotpela na i klia. Na tu, pasin bilong yumi long kirapim tok i bikpela samting. Soim olsem yu amamas long toktok wantaim ol. Taim yumi smail na toktok gut wantaim man, em bai save olsem yumi tingim em. Taim yumi bihainim ol dispela gutpela pasin, dispela bai helpim yumi long mekim tok i kirapim laik bilong man long teritori long kisim kaikai long “tebol bilong Jehova.”—1 Kor. 10:21.