Stadi 12

Kirap Bilong Tok

¹ Bilong kirapim tingting. Ol tok yu mekim long kirap bilong tok em i bilong kirapim tingting bilong ol man na bai ol i ken givim bel long ol tok yu laik givim long ol, na ol i ken laikim, na ol i ken putim yau long taim yu kirap inap long taim yu pinisim tok. Yu mas tokim ol man bilong wanem i gutpela ol i save long ol dispela tok yu bai mekim.

² Bilong kirapim tingting bilong ol man, yu mas tokim ol long olsem wanem dispela tok bilong yu bai helpim ol. Yu ken givim sampela askim long ol long dispela tok yu laik mekim, o yu ken tingim as tok bilong dispela tok na kolim wanpela hevi o mekim wanpela tok piksa. Tasol kirap bilong tok i mas stret long ol man bilong harim, na kirapim tingting bilong ol.

³ Ating sampela taim bai ol man i no wanbel wantaim tok bilong yu, olsem na taim yu kirapim tok, yu mas mekim gutpela tok bilong kirapim tingting bilong ol na bai ol i putim yau inap long taim yu kamapim pinis as bilong tok.

⁴ Yu mas redim gut ol tok yu laik mekim bilong kirapim tok. Yu mas tingim gut ol tok yu laik mekim na olsem wanem yu bai mekim. Em bikpela samting.

⁵ Taim yu kirapim tok, mekim ol sotpela sotpela tok. Ating yu ken raitim tupela o tripela sotpela tok long wanpela hap pepa na lainim gut, na taim yu kirapim tok yu no kaunim, yu lukluk tasol long ol man na yu kolim gut dispela tok; olsem bai tok bilong yu i kamap gutpela na ol man bai putim yau long en.

⁶ Gutpela sapos yu redim namel bilong tok pastaim, na bihain yu redim kirap bilong tok. Olsem bai yu inap save gut wanem ol tok i gutpela bilong kamapim long kirap bilong tok.

⁷ Stret long as tok. Ol tok yu mekim bilong kirapim tok i mas stret long as tok bilong tok. Olgeta tok yu bai mekim em bai stori long wanpela samting tasol, olsem wanpela bikpela tok tasol, olsem na kirap bilong tok i mas kamapim gut dispela as tok bilong tok bilong yu. Ating yu ken kamapim sampela tok bilong as tok taim yu kirapim tok.

⁸ Long kirap bilong tok yu no ken stori long wanpela samting na bihain, long namel bilong tok, yu lusim dispela samting na yu stori long narapela samting. Nogat. Ol tok yu mekim bilong kirapim tok i mas stret long ol tok yu laik kamapim long namel bilong tok.

⁹ Longpela bilong kirap bilong tok. Kirap bilong tok i no ken longpela tumas o sotpela tumas. Em i mas stret long minit bilong tok. Taim yu redim ol tok yu laik mekim bilong kirapim tok, yu mas tingim minit bilong tok na bilong wanem yu laik mekim dispela tok; na yu mas tingim ol man bilong harim tu, na yu ken mekim kirap bilong tok i longpela liklik o sotpela liklik.

¹⁰ Kirap bilong tok i bilong stiaim tingting bilong ol man i go insait long namel bilong tok. Sapos man i mekim gutpela tok bilong kirapim tok bai yu no inap save kirap bilong tok i pinis na namel bilong tok i kirap. Kirap bilong tok bai bringim yumi i go insait stret long namel bilong tok. Taim wasman bilong Skul i laik givim sampela tok long sumatin long dispela samting, em i mas tingting: Kirap bilong tok i longpela tumas? Man i kamapim planti tok tumas na ol man i les, long wanem em i no kamapim kwik ol bikpela samting bilong tok?

¹¹ Sapos tok yu mekim bilong kirapim tok i no stret tumas long as tok na yu mas stori stori long dispela tok bilong stiaim tingting bilong ol man i go insait long namel bilong tok, gutpela sapos yu lusim dispela tok na yu tingim narapela tok yu ken mekim.

¹² Sapos kirap bilong tok i bringim ol man i go insait stret long namel bilong tok, longpela bilong dispela kirap bilong tok i stret. Tasol sapos ol man i wok long harim ol tok bilong kirapim tok i go i go na ol i tingting olsem: Wanem taim bai yumi harim ol bikpela samting bilong tok? Em nau, longpela bilong dispela kirap bilong tok i no stret. Yumi mas was gut long dispela samting.

¹³ Sapos yu wanpela tasol i mekim tok, kirap bilong tok i ken longpela liklik. Tasol sapos yu insait long wanpela program samting, olsem long Miting Bilong Wok, no ken mekim longpela kirap bilong tok; narapela brata i mekim pinis. Yu mas i go insait kwik long namel bilong tok na kamapim ol bikpela samting bilong tok.

¹⁴ Kirap bilong tok i bilong kirapim tasol dispela tok yu laik mekim na bilong kirapim tingting bilong ol man bilong harim. No ken mekim longpela tok tumas; kamapim kwik ol bikpela samting bilong tok.