Kirap Bilong Tok i Kirapim Tingting

KIRAP bilong tok em i bikpela samting. Sapos yu kirapim tru tingting bilong odiens, bai ol i gat bikpela laik long harim gut ol tok yu mekim bihain. Sapos long taim bilong autim tok kirap bilong tok i no kirapim tingting bilong man, ating yu no inap stori moa wantaim em. Taim yu mekim wanpela tok long Haus Kingdom, ol man i no inap les long harim tok bilong yu na ol i lusim Haus Kingdom, nogat, tasol tingting bilong ol inap wokabaut sapos yu no bin kirapim gut tingting bilong ol.

Taim yu redim kirap bilong tok, tingim ol dispela samting yu laik bai tok bilong yu i mekim: (1) kirapim odiens long putim yau long tok yu mekim, (2) kamapim klia samting yu bai stori long en, na (3) soim odiens bilong wanem dispela tok em i bikpela samting long ol. Sampela taim ating yu inap mekim dispela 3-pela samting long wankain taim. Tasol sampela taim bai yu mekim namba wan pastaim na bihain namba tu na bihain moa namba tri, na sampela taim bai yu mekim ol wan wan, tasol yu no bihainim lista.

Bilong Kirapim Odiens Long Putim Yau Long Tok Yu Mekim. Maski ol man i bung bilong harim wanpela pablik-tok, dispela i no makim olsem ol i redi long putim gut yau na tingting long dispela tok. Nogat. Bilong wanem i olsem? Long wanem, long sindaun bilong ol i gat planti samting i pulim nabaut tingting bilong ol. Ating ol i gat hevi long sindaun bilong ol o long narapela samting. Bikpela hatwok bilong yu em bilong mekim tok man i gat laik tru long harim. I gat kain kain rot bilong mekim olsem.

Tok Jisas i bin mekim antap long maunten em i wanpela tok planti man i save long en. Em i kirapim dispela tok olsem wanem? Stori Luk i raitim i tok Jisas i bin tok olsem: “Yupela ol rabisman, yupela i ken amamas. . . . Yupela ol lain i stap hangre nau, yupela i ken amamas. . . . Yupela ol lain nau i krai i stap, yupela i ken amamas. . . . Ol bai i bel nogut tru long yupela. . . . Taim dispela olgeta samting i kamap, yupela i ken amamas.” (Lu. 6:​20-22) Bilong wanem dispela tok i bin kirapim tingting bilong ol man? Insait long sampela sotpela tok tasol, Jisas i kamapim sampela bikpela hevi ol man i harim tok bilong em ol i mas karim. Em i no stori planti long ol dispela hevi, nogat, em i soim olsem ol man i gat kain hevi olsem ol inap i stap amamas, na em i mekim long wanpela rot i kirapim ol man long i gat laik long harim sampela tok moa.

Ol askim inap kirapim tingting bilong ol man, tasol yu mas kamapim ol askim i stret long kamapim. Sapos ol askim yu kamapim i makim olsem yu bai stori long ol samting odiens i bin harim bipo, ating kwiktaim ol bai les long harim. No ken kamapim ol askim i save semim o daunim odiens. Wok long kamapim ol askim i save kirapim tingting bilong ol man. Malolo liklik taim yu kamapim pinis askim bambai ol man i ken bekim askim long tingting bilong ol. Taim ol i mekim olsem bai ol i pilim olsem ol i toktok wantaim yu, na dispela i makim olsem ol i putim gut yau.

Narapela rot bilong kirapim ol man long putim gut yau em long kamapim wanpela ekspiriens i bin kamap tru tru. Tasol sapos ekspiriens yu kamapim i semim wanpela man i stap long odiens, orait stori bilong yu i no mekim gutpela wok. Sapos ol man i tingim stori yu kamapim tasol ol i no tingim as na yu bin kamapim dispela stori, orait stori bilong yu i no mekim gutpela wok. Taim yu kamapim wanpela ekspiriens long kirap bilong tok, em i mas redim rot bilong sampela bikpela tok yu bai kamapim long namel bilong tok. Ating yu mas pulim tok liklik bilong kamapim gut dispela ekspiriens, tasol no ken pulim longpela stori tumas.

Sampela i save kamapim samting nau tasol ol i harim long redio o TV, o kolim tok bilong wanpela niuspepa, o tok wanpela saveman o oganaisesen i bin mekim. Ol dispela samting i gutpela sapos i stret wantaim tok yu mekim na i stret long odiens.

Sapos tok bilong yu em i hap bilong wanpela tok i gat 3-pela hap long en o em i hap bilong Miting Bilong Wok, mobeta yu mekim wanpela sotpela kirap bilong tok i kamapim kwik samting yu laik stori long en. Sapos yu mekim wanpela pablik-tok, orait bihainim stret taim ol i makim bilong kirapim tok. Namel bilong tok yet bai kamapim ol tok bilong helpim gut odiens.

Wan wan taim bai yu mekim tok long wanpela lain ol i no bilip tumas long tok bilong yu o ating ol i birua long yu. Yu ken mekim wanem bilong kirapim ol long harim tok bilong yu? Stiven em wanpela Kristen bilong bipo em spirit holi i pulap long em na em i gat gutpela tingting na save. Ol man i holimpasim em na ol i bringim em long nambawan kaunsil bilong ol Juda. Em i mekim gutpela tok bilong sapotim lotu Kristen. Em i kirapim tok bilong em olsem wanem? Em i mekim tok i soim olsem em rispek long ol, na em i stori long samting olgeta i bilipim. Em i tok: “Ol brata na ol papa, yupela harim. Taim tumbuna bilong yumi Abraham i stap long graun bilong Mesopotemia . . . , God i gat bikpela strong, em i kamap long Abraham.” (Ap. 6:3; 7:2) Long maunten Areopagus long Atens, aposel Pol i givim tok long narapela kain odiens, olsem na em i kirapim tok long pasin i stret long dispela lain. Em i tok: “Yupela man bilong Atens, mi lukim yupela i strong moa long mekim olgeta kain pasin bilong lotu.” (Ap. 17:22) Stiven na Pol i mekim gutpela tok bilong kirapim tok bilong ol, olsem na ol man i orait long harim ol narapela tok ol i kamapim.

Taim yu autim tok, long dispela taim tu yu mas kirapim ol man long putim yau long tok yu mekim. Sapos yu no bin pasim tok wantaim man long kam lukim em, ating man bilong haus bai bisi long mekim sampela samting. Long sampela hap, taim ol man i go nating long lukim wanpela man na em i no bin singautim ol, ol i mas tokaut kwik long as na ol i kam lukim em. Long sampela narapela hap, i gat sampela pasin yu mas bihainim pastaim na nau yu ken kamapim as na yu kam lukim ol.​—Lu. 10:5.

Maski ol man i bihainim wanem kain pasin, sapos yu mekim pasin pren long ol, dispela bai helpim yu long toktok gut wantaim ol. Em i gutpela long kirap stori long samting man i tingting long en. Olsem wanem yu ken save long tok bilong kamapim? Tingim, taim yu kam kamap long man, em i mekim wanem samting? Ating em i wok long gaden, stretim hap ausait long haus, stretim ka, kukim kaikai, wasim klos, o lukautim ol pikinini. Olsem wanem? Em i lukim niuspepa o lukim samting ol man long hap bilong em i mekim? Yu lukim ol samting i stap i makim olsem man i gat laik long ol spot samting, musik, hukim pis, raun lukim ol ples, ol kompiuta, o narapela samting? Planti taim ol man i save tingting planti long ol samting ol i harim long redio o lukim long TV. Wanpela askim o liklik tok i stori long kain samting olsem inap kirapim yutupela long toktok wantaim long pasin pren.

Pasin bilong Jisas long toktok wantaim meri Samaria long wanpela hulwara klostu long taun Sikar i stap olsem gutpela piksa long pasin bilong kirapim tok taim yu laik autim tok long narapela.​—Jo. 4:​5-26.

Yu mas redim gut ol tok yu laik mekim bilong kirapim tok bilong yu, na moa yet sapos kongrigesen bilong yu i save autim tok long wankain teritori long olgeta taim. Sapos yu no mekim olsem, ating yu no inap autim tok long ol man.

Kamapim Klia Samting Yu Stori Long En. Long kongrigesen Kristen, wanpela siaman o brata i mekim tok long program paslain long yu bai kolim het-tok bilong yu na singautim yu long mekim dispela tok. Tasol bilong helpim odiens i gutpela sapos yu mekim sampela tok long kirap bilong tok i kirapim ol long tingim samting yu bai stori long en. Yu ken kolim stret tim bilong tok, tasol i no olsem yu mas mekim. Isi isi tim bilong tok i mas kamap ples klia taim yu mekim tok i go. Long kirap bilong tok yu mas mekim sampela tok i kirapim ol man long putim tingting i go long samting yu stori long en.

Taim Jisas i salim ol disaipel long autim tok, em i kamapim klia ol tok ol i mas autim. “Yupela go na autim tok olsem, ‘Kingdom bilong heven em i kam klostu pinis.’ ” (Mt. 10:7) Jisas i stori long taim bilong yumi na em i tok: “Bai ol i autim dispela gutnius bilong kingdom bilong God.” (Mt. 24:14) Baibel i tokim yumi long “autim tok,” na taim yumi mekim olsem, yumi mas autim tok bilong Baibel. (2 Ti. 4:2) Planti taim, paslain long opim Baibel o kirap stori long Kingdom, yu mas stori long samting ol man i wok long tingting long en. Yu inap stori long pasin raskol, planti man i no gat wok mani, ol man i no mekim stretpela pasin, ol bikpela pait, rot bilong givim helpim long ol yangpela, ol sik, o indai. Tasol no ken pulim longpela stori long ol kain samting olsem; tok yu laik kamapim em gutpela tok. Wok long stiaim toktok bilong yutupela i go long Baibel na ol gutpela samting Kingdom bai mekim.

Soim Odiens Bilong Wanem Dispela Tok Em i Bikpela Samting Long Ol. Sapos yu bai mekim tok long kongrigesen, yu ken save olsem odiens bai i gat laik long harim samting yu laik stori long en. Tasol olsem wanem? Bai ol i putim yau long tok olsem wanpela man i mekim taim em i lain long wanpela samting em yet i insait long en? Bai ol i putim yau, long wanem, ol i save ol tok ol i harim i stret long sindaun bilong ol na tok yu mekim i wok long kirapim ol long mekim sampela samting? Ol bai mekim olsem sapos yu tingim gut odiens bilong yu taim yu redim tok, olsem tingim sindaun bilong ol, ol samting ol i tingting planti long en, na tingting bilong ol. Sapos yu bin mekim olsem, orait long kirap bilong tok kamapim sampela tok i soim olsem yu bin mekim olsem.

Maski yu sanap long pletfom na mekim tok o yu autim tok long wanpela man, wanpela gutpela rot bilong kirapim laik bilong ol man long harim tok em bilong soim ol olsem dispela tok em i bikpela samting long ol. Soim ol olsem wanem samting yu stori long en i stret long ol hevi bilong ol, o ol samting ol i mas kisim, o ol samting ol i gat askim long en. Sapos yu kamapim klia olsem yu no laik stori long antap antap tasol bilong ol dispela tok, na bai yu stori gut tru long ol wan wan bikpela samting, orait ol bai putim yau moa yet long tok bilong yu. Bilong mekim olsem yu mas redi gut.

Pasin Bilong Yu Long Kamapim Tok. Wanem tok yu mekim long kirap bilong tok em i nambawan bikpela samting, tasol olsem wanem yu kamapim dispela tok, dispela inap kirapim ol man long i gat laik long harim. Olsem na taim yu redim tok yu mas tingting long wanem tok yu bai mekim na bai yu mekim olsem wanem.

Bilong tok bilong yu i ken mekim wok yu laik bai em i mekim, ol wan wan tok yu laik kolim em i bikpela samting, olsem na i gutpela sapos yu redim gut tru namba wan, namba tu na namba tri sentens. Ol sentens i gutpela moa em ol sentens i sotpela na i no hatwok long kisim. Taim yu mekim wanpela tok long kongrigesen, ating bai yu laik raitim dispela tupela o tripela sentens long autlain bilong yu, o ating yu laik putim long tingting ol dispela sentens bambai ol tok yu mekim bilong kirapim tok i gat strong bilong kirapim tingting bilong odiens. Taim yu kamapim gutpela kirap bilong tok na yu no toktok hariap, dispela inap helpim yu long stap isi na mekim gut ol narapela hap bilong tok.

Redim Long Wanem Taim. I gat narapela narapela tingting long dispela samting. Sampela man i save gut long mekim tok ol i ting taim yu laik redim wanpela tok, yu mas redim kirap bilong tok pastaim. Sampela man ol i bin stadi long pasin bilong mekim tok long ai bilong ol man ol i ting yu mas redim namel bilong tok pastaim na bihain redim kirap bilong en.

Tru tumas, pastaim yu mas save gut long stori yu bai kamapim na ol bikpela tok yu tingting long kamapim, na bihain yu ken redim wanpela gutpela kirap bilong tok. Tasol olsem wanem sapos ol i givim yu wanpela autlain bilong redim tok bilong yu long en? Taim yu ritim autlain pinis, sapos yu gat tingting long wanpela kirap bilong tok, orait raitim long wanpela hap pepa. Tingim tu olsem, bilong kirap bilong tok i ken mekim gutpela wok yu mas tingim odiens bilong yu na ol tok autlain i kamapim.