Redi Gut Pastaim—Dispela Bai Kamapim Amamas
1 Taim yumi insait long wok autim tok, dispela i givim bikpela amamas long yumi. (Sng 89:15, 16) Pasin bilong redi gut pastaim em i wanpela bikpela samting bilong helpim yumi long kisim tru dispela amamas. Taim yumi redi gut long autim tok, yumi inap mekim bikpela wok moa, na taim yumi mekim bikpela wok, yumi kisim bikpela amamas.
2 Mekim Wok Long Ol Tul: Namba wan samting yu ken mekim bilong redi long wok autim tok em yu ken kirap long kaunim Wok Kingdom, na skelim gut ol tok bilong en. Planti taim Wok Kingdom i kamapim ol gutpela tok yumi ken mekim long ol man. Dispela tok i helpim yumi long kamapim gut tok bilong Kingdom long ol man na em i no hatwok long mekim. Na em i kamapim sampela gutpela tok bilong helpim yumi long mekim gut ol gobek, na bai yumi ken kirapim ol Baibel-stadi. Yu ken senisim ol dispela tok bambai em i stret long yu ken mekim wok long en. Na tu, yu gat buk Toktok Gut, em i kamapim planti narapela narapela pasin bilong kirapim tok na ol tok yu ken mekim bilong bekim tok long man i katim tok bilong yu. Dispela i helpim yu na bai yu inap autim gut tok long kain kain man yu bungim.
3 Lukim ol stori bilong buk o magasin yu bai tilim, na makim wanpela o tupela gutpela stori em yu ken kamapim long man bilong haus. Wanpela nius yu harim o ritim long niuspepa em inap kirapim tingting bilong ol man na opim rot bilong yu ken toktok wantaim ol. Tingim sampela tok ol man i save mekim planti taim bilong pasim yumi long toktok wantaim ol, na tingim sampela tok yu ken mekim bilong bekim tok bilong ol. Nau yu ken lusim sampela minit bilong lainim lainim dispela tok yu bai mekim long ol man.
4 Go Long Olgeta Miting Bilong Wok: Putim gut yau long ol tok long Miting Bilong Wok taim ol brata i stori long ol tok bilong Wok Kingdom long pasin bilong toktok wantaim ol man na taim ol i mekim ol soim samting. Tingim gut wanem ol tok yu ting yu inap mekim wok long en taim yu toktok wantaim ol man. Tingim ol pasin ol man i bin mekim planti taim long yu taim yu autim tok, na tingim sampela rot bilong mekim wok autim tok bilong yu i kamap gutpela moa. Toktok wantaim ol narapela pablisa long ol dispela samting paslain na bihain long ol miting.
5 Yu ken bilip tru olsem, sapos yu “redi long mekim olgeta kain gutpela wok,” bai yu kisim bikpela amamas na wok bilong yu long helpim ol narapela long painim rot i go long laip bai kamap gutpela.—2 Ti 2:21.